¹ و من بعد زاد خاير الرب سبعين واحد اخرين, و بعثهم زوز بزوز باه يروحوا يسبقوه لكل مدينة و كل مضرب ناوي يروح ليه. ² و قال لهم: "الصابة ياسر, و الحصادة قلال. اطلبوا من رب لحصاد باه يبعث حصّادة للصابة تاعو". ³ روحوا! انا نبعثكم كيما خرفان وسط الذيابة. ⁴ لا تهزوا شكارة و لا مزود و لا سباط زايد و لا تسلموا على واحد في الطريق. ⁵ و اي دار تدخلوا ليها قولوا قبل: السلام لهاذا الدار. ⁶ و اذا كان فيه ابن سلام السلام تاعكم يخيم عليه, و اذا ما كانش يرجع سلامكم ليكم. ⁷ و اقعدوا في هاذاك الدار ماكلين شاربين من الشيء اللي عندهم, على خاطر الخدّام يستاهل الاجرة تاعو. ما تبقاوش تدوروا من دار لدار. ⁸ و اي مدينة تدخلوها و يقبلوكم فيها, كولوا من الشيء اللي يمدولكم, ⁹ و اشفوا المرضى اللي فيها, و قولوا لهم: او قرّب منكم الملكوت تاع الله. ¹⁰ و اي مدينة تدخلوها و ما يقبلوكمش, اخرجوا لشوارع تاعها و قولوا: ¹¹ حتى لغبار اللي لصق في رجلينا من مدينتكم ننفضوه. بالصح اعرفوا هاذا الشيء: او الملكوت تاع الله قَرّب منكم. ¹² و نقول لكم: في هاذاك اليوم راح تكون حالة سدوم و عمورة خير من حالة هاذيك لمدينة. ¹³ "يا ويلك يا كورزين! يا ويلك يا بيت صيدا! على خاطر لو كان داروا في صور و في صيداء المعجزات اللي داروها فيكم, راهم تابوا بكري و قعدوا فوق الرماد و لبسوا الخيشة. ¹⁴ بالصح صور و صيداء تكون حالتهم نهار لاخرة خير من حالتكم. ¹⁵ و انت يا كفرناحوم الطالعة في السماء! راح تهبطي للهاوية. ¹⁶ اللي يسمع منكم يسمع مني, و اللي يكرهكم يكرهني, و اللي يكرهني يكره اللي بعثني". ¹⁷ و كي رجعوا التلامذة السبعين رجعوا و هما فرحانين و قالوا: "يا رب, حتى الشواطن تطيع امرنا بأسمك!". ¹⁸ قال لهم: "شفت الشيطان طايح من السماء كيما لبَرق. ¹⁹ نعطيكم سلطان تعفسوا على الحنوشة و لعقارب و كل قوة العدو, و شيء ما يضركم. ²⁰ بالصح مش بهاذا الشيء تفرحوا: باللي الجنون تخضع لكم, بالصح افرحوا باللي اساميكم تكتبت في السماوات". ²¹ و في هاذيك الساعة فرح يسوع بالروح القدس و قال: "نحمدك يا الاب, رب السماء و لرض, على خاطر حجبت هاذي الامور على الحكماء و الفهماء و كشفتها للصغار. نعم يا الاب, على خاطر هاكذا تكون رضايتك". ²² و تلفت للتلامذة و قال لهم: "كل شيء جاني من عند بابا. واحد ما يعرف شكون هو الابن غير الاب, و واحد ما يعرف شكون هو الاب غير الابن, و اللي حب الابن يكشفلو عليه". ²³ و تلفت للتلامذة تاعو و قال لهم وحدهم: "يا سعد العينين اللي يشوفوا واش راكم تشوفوا! ²⁴ على خاطر نقول لكم: انبياء و ملوك ياسر حبوا يشوفوا الشيء اللي انتوما شفتوه و ما شافوش, و حبوا يسمعوا الشيء اللي انتوما سمعتوه وما سمعوش". لمثل تاع السامري الصالح ²⁵ و وقف واحد من العلماء تاع الشريعة حب يجربو و قالو: "يا معلم, واش ندير باه نورث لحياة الدايمة؟". ²⁶ رد عليه يسوع وقال: "واش مكتوب في الشريعة. كيفاه تفسرو؟". ²⁷ جاوب و قال: "تحب الرب الهك من كل قلبك و من كل جوارحك, و من كل القدرة تاعك, ومن كل الفكر تاعك, و تحب قريبك كيما ذاتك". ²⁸ قال يسوع: "هاذا هو الصواب. اعمل هاذا الشيء تحيا". ²⁹ اما هوعلى خاطر حاب ينجي روحو, قال ليسوع: "وشكون هو قريبي؟". ³⁰ رد عليه يسوع و قال: "كان واحد الراجل هابط من اورشليم رايح لاريحا, شوية طاحو بيه سرارقة, عروه, و ضربوه, و هربوا و خلاوه بين الحياة و الموت. ³¹ و كان واحد الكاهن معدي من هاذيك الطريق, و كي شافو عدى عليه و خلاه. ³² و زاد عدى واحد لاوي من ثمة, و كي وصل بحذاه شافو و عدى عليه و خلاه. ³³ و كان واحد السامري من السامرة مسافر كي شافو, جا يجري و حن عليه, ³⁴ قدملو و مسح لو لجراح تاعو, و صب عليها زيت و خمر و ركبو فوق لبهيم تاعو, و داه للفندق و تهلى فيه. ³⁵ و غدوة كي جا رايح جبد زوز دينار و اعطاهم لمولى الفندق, و وصاه عليه و قالو: استحفظ بيه, و اي حاجة تصرفها كي نجي نخلصك. ³⁶ بين هاذوك في ثلاثة شكون منهم ولى يقرب لهاذاك اللي طاح في يد السرارقة؟". ³⁷ قال: "اللي دار معاه الرحمة". قالو يسوع: "روح انت ثاني و اعمل هكّا". يسوع في دار مريم و مرثا ³⁸ و همّا ماشيين دخل لواحد القرية, عَرضاتو واحدة لمرى اسمها مريم لدارها. ³⁹ و كانت عندها اختها اسمها مريم, جات قعدت عند رجلين يسوع و بقات تسمع فيه واش يقول. ⁴⁰ اما مرثا كانت مقلقة عندها خدمة ياسر. وقفت و قالت: "يا رب, ما تولهتيش باللي اختي خلاتني نخدم وحدي؟ قول لها توقف تعاونني!". ⁴¹ رد عليها يسوع وقال: "ا مرثا, ا مرثا, انت تخممي و تقلقي على امور ياسر, ⁴² بالصح الحاجة غير لواحد برك. و مريم خايرت النصيب الي يصلح و اللي واحد ما ينحيه".