¹ و بعد هاذا زاد ظهر يسوع للتلامذة تاعو ف بحر طبرية. و هكّا كيفاه ظهر: ² كان سمعان بطرس, و توما اللي يسموه التومي, و نثنائيل اللي من قانا الجليل, و اولاد زبدي ف ثنين, و زوز من التلامذة لخرين كانوا مع بعضاهم. ³ قال لهم سمعان بطرس: "انا اني رايح نصيد". قالوا: "حتى احنا نروحوا نصيدوا معاك". و خرجوا ركبوا ف لفلوكة. بالصح ما صيدوا والو ف هاذيك الليلة. ⁴ و كي وصل الصبح, وقف يسوع على شط لبحر. و التلامذة ما كانوش عارفين باللي او يسوع. ⁵ قال لهم يسوع: "يا لولاد كاش ما عنكم مصيد؟". قالوا: "لا!". ⁶ قال لهم: "ارموا الشبكة على الجيهة ليمنى تاع لفلوكة ضرك تصيدوا". و كي رماو الشبكة كيما قال لهم, ما قدروش يجبدوها من كثرة الحوت اللي فيها. ⁷ قال هاذاك التلميذ اللي كان يسوع يحبو لبطرس: " هاذا او الرب!". كي سمع سمعان بطرس باللي هو الرب, لبس قشو على خاطر كان عريان, و رمى روحو ف لبحر. ⁸ اما التلامذة لخرين جاو بالفلوكة, على خاطر ما كانوش بعاد على الشط غير ميتين ذراع, و كانوا يجروا ف الشبكة تاع الحوت معاهم. ⁹ و كي وصلوا للشط لقاو الجمر شاعل و فوقو حوت و معاه الخبز. ¹⁰ قال لهم يسوع: "هاتوا من الحوت اللي صيدتوه ضرك". ¹¹ طلع سمعان بطرس و جبد الشبكة للرض, مليانة بالحوت لكبير, ميا و ثلاثة و خمسين حوتة. هاذا الكل و ما تقطعتش الشبكة. ¹² قال لهم يسوع: "ارواحوا تاكلوا!". و واحد من التلامذة ما قدر يسقسيه: شكون انت؟ على خاطر كانوا عارفين باللي هو الرب. ¹³ وقدم يسوع و هز الخبز و اعطاهم و زاد هز الحوت ثاني و اعطاهم. ¹⁴ هاذي المرة الثالثة اللي ظهر فيها يسوع للتلامذة بعدما قام من بين الموتى. بطرس يرجع للمكانة تاعو لولى ¹⁵ و بعد ما كلاو قال يسوع لسمعان بطرس: "ا سمعان بن يونا, انت تحبني اكثر من هاذوك؟". قال لو: "نعم يا ربي, اك عارف باللي نحبك". قالو: "ارعى الخرفان تاعي". ¹⁶ و زاد قالو للمرة الثانية: "ا سمعان بن يونا, تحبني؟". قالو: "نعم يا ربي, انت عارف باللي انا نحبك". قالو: "ارعى خرفاني". ¹⁷ زاد قالو ثالث مرة: "يا سمعان بن يونا, تحبني؟". حزن بطرس على خاطر زاد سقساه ثالث مرة: تحبني؟ قالو: "يا ربي, انت تعلم كل شيء. و تعرف باللي نحبك". قالو يسوع: "ارعى خرفاني. ¹⁸ نقول لك الحق الحق: كي كنت صغير كنت تتحزم و تروح وين تحب. بالصح كي تولي شايب انت تمد يدك و واحد اخر يحزمك. و يديك وين ما تحبش تروح". ¹⁹ قال يسوع هاذا لكلام و كان يشر على الميتة اللي راح يموتها بطرس و بيها يمجد الله. و كي قال هاذا زاد قالو: "تبعني". ²⁰ تلفت بطرس و شاف التلميذ اللي كان يسوع يحبو يتبع فيه, و هو اللي كان متكي على صدرو وقت لعشاء, و قال: "يا سيدي, شكون راح يخونك؟". ²¹ كي شافو بطرس يتبع فيهم , قال ليسوع: "يا ربي, و هاذا واش راح يكون لو؟" ²² قالو يسوع: "لو كان نحب نخليه يبقى حتى نجي, واش يهمك؟ انت تبعني!". ²³ و تنشر هاذا لكلام بين الخاوة: باللي هاذاك التلمبذ ماهوش راح يموت. بالصح يسوع ما قالش او مش راح يموت, بالصح قال: "اذا كان حبيت نخليه يبقى حتى نجي, انت وش يهمك؟". ²⁴ هاذا هو التلميذ اللي يشهد بهاذا و هو اللي كتب هاذا. و عارفين باللي الشهادة تاعو حق. ²⁵ و حوايج اخرى ياسر دارها يسوع, لو كان تكتبت واحدة بوحدة, ما نضنش باللي العالم كامل ف ذاتو يقدر يهزها. امين