¹ قال يسوع هاذا لكلام و من بعد هز عينيه للسماء و قال: "يا بابا, هاي حضرت الساعة. مجد ابنك باه حتى ابنك يمجّدك هو ثاني, ² كي عطيت لو السلطة على كل بشر باه يوهب لحياة الدايمة لكل من وهبتهم ليه. ³ و هاذي هي لحياة الدايمة: كي يعرفوك انت الاله الحقيقي وحدك و يسوع المسيح اللي بعثتو. ⁴ انا مجدتك على الارض. وقت اللي كملت الخدمة اللي بعثتني باه نديرها. ⁵ و ضرك مجدني انت يا بابا عند ذاتك بالمجد اللي كان ليّا عندك من قبل ما يتكون العالم. يسوع يصلي من اجل التلامذة ⁶ "انا بينت اسمك للناس اللي وهبتهم لي من العالم. كانوا ليك انت و وهبتهم لي, و هما طبقوا كلامك. ⁷ و اليوم عرفوا باللي كل ما وهبتلي هو من عندك, ⁸ على خاطر لكلام اللي وهبتني انا وهبتوا ليهم, و همّا قبلوه و تيقنوا باللي من عندك خرجت, و امنوا باللي انت اللي بعثتني. ⁹ على جالهم همّا نطلب. مش على جال العالم, بالصح على جال اللي وهبتهم ليّا على خاطرهم ليك. ¹⁰ كل اللي ليّا انا هو ليك انت, و كل اللي ليك انت هو ليّا, وانا نتمجد فيهم. ¹¹ انا ما نبقاش ف العالم اما همّا باقيين فيه, و انا جاي عندك. يا بابا القدوس, احفظهم ف اسمك الناس اللي وهبتهم ليّا, باه يكونوا واحد كيما انا واياك واحد. ¹² كي كنت معاهم ف العالم كنت نحفظهم ف اسمك. الناس اللي وهبتهم ليّا انا حفظتهم, و ما خسرت حتى واحد منهم غير ابن لهلاك باه يتم لكلام المكتوب. ¹³ اما انا راح نجي ليك. نتكلم هاذا لكلام و انا ف العالم باه تكون الفرحة تاعي كاملة فيهم. ¹⁴ انا اعطيتهم كلامك, و العالم يبغضهم على خاطر ما همش من العالم, كيما انا مانيش من هاذا العالم. ¹⁵ ما نطلبش تهزهم من العالم بالصح نطلب تحفظهم من شر الشرير. ¹⁶ ما همش من العالم كيما انا مانيش من العالم. ¹⁷ قدسهم ف الحق تاعك. كلامك هو الحق. ¹⁸ كيما بعثتني للعالم انا ثاني نبعثهم للعالم, ¹⁹ و على جالهم انا نقدس ذاتي, باه حتى همّا يكونوا مقدسين ف الحق. صلاة يسوع من اجل كل المومنين بيه ²⁰ "و ما نطلبش غير على جال هاذوك برك, بالصح نطلب ثاني على جال اللي رايحين يامنوا بيّا بسبة كلامهم, ²¹ باه يكونوا كلهم واحد, كيما انت يا بابا فيّا و انا فيك, باه يكونوا همّا ثاني واحد فينا, باه يامن العالم باللي راك انت هو اللي بعثتني. ²² انا اعطيتهم المجد اللي انت عطيتني, باه يكونوا واحد كيما انا و اياك واحد. ²³ انا فيهم و انت فيّا باه تكون الوحدة تاعهم كاملة, و يعرف العالم باللي انت اللي بعثتني, و حبيتهم كيما حبيتني. ²⁴ يا بابا هاذوك اللي وهبتهم لي نحب يكونوا معايا وين نكون انا, باه يشوفوا المجد تاعي اللي مديتلي, على خاطر حبيتني قبل تكوين العالم. ²⁵ يا بابا البار, العالم ما عرفكش, اما انا عرفتك, و هاذوك عرفوا باللي انت اللي بعثتني. ²⁶ و عَرّفتهم اسمك و راح نزيد نعرّفهم اكثر, اجعل ف قلوبهم الحب اللي حبيتني بيه. و نكون انا فيهم".