¹ "انا هو الكرمة تاع الصح و بابا هو الكرّام. ² و كل عرف فيّا ما يجيبش ثمار يقصو, و كل عرف يجيب ثمار ينقيه باه يزيد يجيب ثمار اكثر من قبل. ³ انتم اليوم طاهرين بسبة لكلام اللي قلت لكم عليه. ⁴ اثبتوا فيّا و انا فيكم. كيما العرف ما يقدرش يجيب ثمار من ذاتو لو ما يكونش لاصق ف الكرمة, هكذاك انتم ثاني ما تجيبوش ثمار لو كان ما تثبتوش فيّا. ⁵ انا الكرمة و انتم لعراف. اللي يثبت فيّا و انا فيه هاذا يجيب ثمار ياسر, على خاطر بلا بيّا ما تقدروا تديروا حتى شيء. ⁶ اللي ما يثبتش فيّا يطَيَش لبرى كي العرف, وييبس و يلموه و يرموه ف النار, و يتحرق. ⁷ اذا ثبتّوا فيّا و ثبت كلامي فيكم تطلبوا واش تحبوا يكون لكم. ⁸ بهاذا يتمجد بابا: كي تجيبوا ثمار ياسر و تكونوا التلامذة تاعي. ⁹ انا نحبكم كيما يحبني الاب. اثبتوا ف محبتي. ¹⁰ اذا طبقتوا الوصايا تاعي تثبتوا ف محبتي, كيما طبقت انا الوصايا تاع بابا و نثبت ف محبتو. ¹¹ قلت لكم هاذا لكلام باه تثبت الفرحة تاعي فيكم و تتم الفرحة تاعكم. ¹² "هاذي هي وصايتي ليكم تحبوا بعضاكم كيما حبيتكم انا. ¹³ ما كان حتى محبة اعظم من هاذي: كي لواحد يضحي بحياتو على جال حبابو. ¹⁴ انتم همّا احبابي اذا كان درتوا كيما وصيتكم. ¹⁵ ما نزيدش نسميكم عبيد, على خاطر العبد ما يعرفش واش راح يدير سيدو, بالصح انا سميتكم لحباب على خاطر خبرتكم بالشيء كامل اللي سمعتو من عند بابا. ¹⁶ مش انتم اللي خايرتوني انا اللي خايرتكم, و بعثتكم باه تروحوا و تجيبوا ثمار, و تدوم ثماركم, باه يعطيكم الاب كل ما تطلبوا باسمي. ¹⁷ بهاذا انا نوصيكم تحبوا بعضاكم. العالم يكره يسوع و التلامذة تاعو ¹⁸ "اذا كان كرهكم العالم اتفكروا باللي كرهني انا قبلكم. ¹⁹ لو كان جيتوا من اهل العالم العالم يحب اماليه. بالصح على خاطر انتم ماكمش من العالم, بالصح انا خايرتكم من وسط العالم, على هاذا يكرهكم العالم. ²⁰ اتفكروا كلامي اللي قلت لكم: ما يكونش العبد اعظم من سيدو. اذا كان اضطهدوني انا راح يضطهدوكم انتم ثاني و اذا كان طبقوا كلامي راح يطبقوا كلامكم انتم ثاني. ²¹ بالصح راهم يديروا لكم هاذا الشيء كامل على جال اسمي, على خاطر ما يعرفوش اللي بعثني. ²² لو كان ما جيتش و ما كلمتهمش, ما يكون عندهم حتى ذنب, اما اليوم ما عندهم حتى عذر على ذنبهم. ²³ اللي يكرهني يكره بابا ثاني. ²⁴ لو كان ما درتش قدامهم اعمال حتى واحد ما يديرها غيري, ما يكون عندهم ذنب, اما اليوم شافوا بعينيهم و كرهوني انا و بابا. ²⁵ بالصح باه تتم الكلمة المكتوبة اللي ف الشريعة تاعهم: بلا سبة كرهوني. ²⁶ و كي يجي المعزي اللي راح نبعثهولكم انا من عند بابا, روح الحق, اللي ينبثق من عند الاب, و هو راح يشهد لي. ²⁷ و انتم ثاني راح تشهدوا لي على خاطر كنتوا معايا من لول.