1 ف البدية كان الكلمة, و الكلمة كان عند الله, و كان الكلمة الله. 2 هاذا كان ف البدية عند الله. 3 كل شيء بيه كان, و بلا بيه ما كان شيء من اللي كان. 4 فيه كانت لحياة, و لحياة كانت نور الناس, 5 و النور يضوي ف الظلام, و الظلام ما يلحقش النور. 6 كان انسان مبعوث من عند الله اسمو يوحنا, 7 جا باه يشهد للنور, باه يامنوا الناس الكل على يدو. 8 ما كانش هو النور, بالصح جا باه يشهد للنور. 9 النور تاع الصح اللي ينوّر كل بشر كان جاي للعالم. 10 كان ف العالم, و بيه توجد العالم, بالصح العالم ما عرفوش. 11 جا لمواليه, بالصح مواليه ما عرفوهش. 12 اما كل اللي قبلوه عطاهم سلطان باه يوَليوْ اولاد الله, يعني المومنين باسمو. 13 مش هاذوك اللي ولدوا من الدم, و لا برغبة جسد, و لا برغبة راجل, بالصح من عند الله. 14 و الكلمة ولّى جسد و جا بيناتنا, و احنا شفنا الجاه تاعو جاه تاع ابن فريد من الاب, مليان بالنعمة و الحق. 15 شهد ليه يوحنا و نادى و قال: "هاذا هو اللي قلت عليه: اللي يجي ورايا يولّى قدامي, على خاطر كان قبلي". 16 من فيض نعمتو احنا الكل نلنا, نعمة فوق نعمة. 17 على خاطر الشريعة جات على يد موسى, اما النعمة و الحق نلناها بيسوع المسيح. 18 لا واحد عمرو شاف الله. بالصح الابن الفريد اللي ف حضن الاب هو اللي خبرنا عليه. يوحنا المعمدان يقول باللي هو مش المسبح 19 و هاذي هي الشهادة تاع يوحنا, وقت اللي بعثوا ليهود كهنة و لاويين من اورشليم باه يسقسيوه: "شكون انت؟". 20 استعرف و ما نكرش, و قال: "انا خاطي مش انا المسيح". 21 سقساوه: "مالا شكون انت؟ انت ايليا؟". قال: "لا خاطي انا". "انت نبي؟". قال: "لا". 22 قالوا: "شكون انت, باه نديو جواب للناس اللي بعثونا؟ واش تقول على روحك؟". 23 قال: "انا صوت ينادي ف الصحراء و يقول: اعدلوا طريق الرب, كيما قال اشعياء النبي". 24 والناس المبعوثين كانوا من العلماء تاع الشريعة, 25 سقساوه و قالوا: "مالا علاه تعمد كي عدّت مش انت هو المسيح, و لا ايليا, و لا نبي؟". 26 رد عليهم يوحنا وقال: "انا نعمد بالماء, بالصح كاين ف وسطكم اللي ما تعرفوهش. 27 هو اللي يجي من بعدي, صبّح قدامي, اللي انا ما نستاهلش نحل سيور السباط تاعو". 28 هاذا كامل صرى ف بيت عيرة ورى نهر الاردن من لهيه وين كان يوحنا يعمد. يسوع لخروف تاع الله 29 و غدوة شاف يوحنا يسوع جاي عندو, قال: "هاذا هو لخروف تاع الله اللي راح يهز المعصية تاع العالم! 30 هاذا هو اللي قلت عليه: يجي من بعدي, راجل يولي هو قدامي, على خاطر كان قبلي. 31 و انا ماكنتش نعرفو. بالصح انا جيت نعمد بالماء باه يظهر لاسرائيل". 32 و شهد يوحنا وقال: "انا شفت الروح نازل عليه كيما لحمامة من السماء و حط عليه. انا ما كنتش نعرفو, 33 بالصح اللي بعثني نعمد بالماء, هو اللي قالي: اللي تشوف الروح نزل و حط عليه, هاذاك هو اللي يعمد بالروح القدس. 34 وانا شفت و نشهد باللي هاذا هو ابن الله". التلامذة لولين 35 و اليوم وغدوة كان يوحنا واقف هو و زوز من التلامذة تاعو, 36 كي شاف يسوع ماشي, قال: "هاذا هو لخروف تاع الله". 37 و كي سمعوه التلامذة, راحوا يتبعوا ف يسوع. 38 تلفت لهم يسوع و لقاهم يتبعوا فيه, قال لهم: "واش طالبين؟". قالوا: "ربي" اللي معناها: يا معلم. "وين تسكن؟". 39 قال لهم: "ارواحوا ضرك تشوفوا". راحوا معاه و شافوا وين يسكن, و قعدوا معاه هاذاك اليوم. و كانت الساعة قريب العشرة. 40 و كان اندراوس خو سمعان بطرس واحد من التلامذة ف زوز اللي سمعوا يوحنا و تبعوه. 41 هاذا لقى قبل خوه سمعان و قال لو: "لقينا المسيّا" اللي معناه: المسيح. 42 و جابو عند يسوع. شاف فيه يسوع وقال: "انت سمعان بن يونا. نسميك صفا" اللي معناه: بطرس. يسوع يعرض فيليبس و نثنائيل 43 و اليوم و غدوة حب يسوع يروح للجليل, لقى فيليبس قال لو: "تبعني". 44 و كان فيليبس من بيت صيدا, من مدينة اندراوس و بطرس. 45 و فيليبس لقى نثنائيل و قال لو: "لقينا اللي كتب عليه موسى ف الشريعة و الانبياء يسوع بن يوسف اللي من الناصرة". 46 قال لو نثنائيل: "كيفاه من الناصرة تخرج حاجة تصلح؟". قال لو فيليبس: "ارواح تشوف". 47 و كي شاف يسوع نثنائيل جاي ليه, قال عليه: "هاذا اسرائيلي حر ماهوش مخلط". 48 قال لو نثنائيل: "منين تعرفني؟". رد عليه يسوع وقال: "قبل ما يعيطلك فيليبس كي كنت تحت شجرة الكرطوس, شفتك". 49 رد عليه نثنائيل و قال: "يا معلم, انت ابن الله! انت الملك تاع اسرائيل!". 50 قالو يسوع: "امنت كي قتلك شفتك تحت شجرة الكرطوس؟ راح تشوف ما اعظم من هاذا!". 51 و قال لو: "نقولك الحق الحق: من اليوم تشوفوا السماء محلولة, و الملايكة تاع الله يطلعوا و يهبطوا على ابن الانسان".