¹ ما لازمش يكثروا فيكم الناس اللي يعلموا يا خاوتي, و راكم عارفين واش من حساب نتحاسبوا احنا المعلمين! ² على خاطر كلنا نغلطوا في حوايج ياسر. و اللي ما يغلطش في كلامو هاذاك راجل كامل و قادر ثاني يحكم في بدنو الكل. ³ شوفوا لحصُنَّه, نحطوا اللجام في فمها باه تطاوعنا, و نقدروا نسوقوها. ⁴ و حتى البابور ثاني على قد ما هو كبير و على قد ما الريح قاوية, اللي يحركو دفة صغيرة خلاص يدَورها الرايس وين يحب. ⁵ هكا ثاني اللسان, عضو صغير و هو يدير حوايج كبار. شوفوا نار صغيرة خلاص قداه من غابة تحرق! ⁶ اللسان نار! عالم تاع ذنوب. هكا تحط في الاعضاء تاعنا اللسان, اللي قادر ينجس البدن كامل, يشعل النيران في الدنيا الكل بنار من جهنامة. ⁷ يقدر بنادم يربي الوحوش و الطيور و حتى الحيوانات اللي يزحفوا كل ما في البر و البحر, تتربى وتخضع للانسان. ⁸ اما اللسان, واحد ما يقدر عليه. هو شر ما تقدرش تسيطر عليه, مليان بالسم القتّال. ⁹ بيه نباركوا الله الآب, و بيه نسبوا الناس اللي خلقهم ربي على صورتو. ¹⁰ من فم واحد تخرج دعوة الخير وتخرج دعوة الشر! و هاذا الامر ما لازمش يكون يا خاوتي! ¹¹ كاش ما كاين عين تاع ماء تخرج من ينبوع واحد ماء حلو و ماء مالح؟ ¹² يا خاوتي كاش ما كاين كرمة تجيب الزيتون, و الا دالية تجيب الكرطوس؟ هكا حتى عين تاع الماء الواحدة ما تقدرش تخرج ماء مالح و ماء حلو! زوز انواع تاع حكمة ¹³ اللي فيكم حكيم و فاهم, يبين فعالو بالحكمة و الوداعة و حسن التربية. ¹⁴ بالصح اذا كانت في قلوبكم لمرارة تاع الحسد و الغيرة, ما تفخروش بارواحكم و تكذبوا على الحق. ¹⁵ حكمة كيما هاذي ماهيش نازلة من عند الله, راهي حكمة دنياوية انسانية شيطانية. ¹⁶ على خاطر وين يكون الحسد و النزاع, يكون التشويش و الشرور الكل. ¹⁷ و اما الحكمة اللي جاية من لفوق هي قبل كل شيء طاهرة, و ما تأذي حتى واحد, و متسامحة, و حنينة, و مليانة بالرحمة و الصلاح, لا فيها شك و لا نفاق. ¹⁸ و البر هو الثمرة تاع الشيء اللي زرعوه في السلام الناس اللي يسعاو للسلام.