¹ و كل رايس تاع كهنة يدِيوه من بين الناس و يحطوه يقدم خدمة للناس في الامور اللي تخص الله, باه يقدم قربان و ذبايح يكفر بيها على الذنوب, ² و يكون قادر باه يرفق بالجاهلين و بالضالين, على خاطر هو ثاني عندو ضعوفات كيما لخرين. ³ و على هاذا الشيء ملزم يمد كفارة على روحو هوثاني كيما يمد كفارة على الشعب . ⁴ و واحد ما يقدر يحط روحو بروحو في هاذي الخدمة, غير اذا كان دعاه الله كيما هارون. ⁵ هكذاك ثاني المسيح ما اداش الجاه هو لروحو باه يولي رايس تاع كهنة, بالصح الله هو اللي قالو: "انت ولدي, انا اليوم ولدتك". ⁶ كيما يقول ثاني في موضع واحد اخر: "انت كاهن على طول الزمان في مرتبة ملكي صادق". ⁷ و هو اللي كان في ايام حياتو البشرية يرفع في الصلاوات والدعاء و يعيط بالدموع لله القادر باه يمنعو من الموت, و استجاب لو على جال التقوى تاعو, ⁸ حتى وهو ابن تعلم الطاعة بالشيء اللي توجع بيه. ⁹ و كي وصل لدرجة الكمال ولى سبب خلاص ما يفناش للناس اللي يطيعوه, ¹⁰ مرَّسم من عند الله كاهن على مرتبة ملكي صادق. التحذير من الارتداد ¹¹ و عندنا كلام ياسر من جيهة هذا الموضوع, بالصح التفسير تاعو صعيب باه نهدروه, على خاطر وليتو ثقال باه تسمعوا. ¹² على حساب المدة انتوما كان من المفروض تكونوا معلمين بالصح راكم مازلتوا تحتاجوا لشكون يعلمكم الاركان لولى تاع اقوال الله, و وليتوا محتاجين للحليب, مش للماكلة القاوية. ¹³ على خاطر كل واحد مازال يشرب في لحليب ماعندوش خبرة في كلام البر على خاطرو مازال طفل صغير, ¹⁴ اما الماكلة القاوية للناس البالغين, اللي دربوا الحواس تاعهم باه يعرفوا كيفاه يميزوا بين الخير و الشر.