¹ مالا يا خاوتي القديسين لمشاركين في اللمة تاع الله, شوفوا ليسوع المسيح رسول اعترافنا و رايس الكهنة تاعنا, ² كيفاه كان مولى امانة للي خايرو, كيما كان موسى ثاني مولى امانة على جميع بيت الله. ³ بالصح يسوع يستاهل جاه اكثر من تاع موسى, كيما الجاه اللي يديه الواحد اللي يبني الدار اكثر من جاه الدار في ذاتها. ⁴ على خاطر كل بيت كاين شكون بناه, و اللي بنا كل شيء هو الله. ⁵ موسى كان مولى امانة على جميع بيت الله على خاطر كان يخدم و يشهد على الشيء الجاي اللي راح يبينو الله. ⁶ اما المسيح هو مولى امانة على خاطر هو ابن الله في بيت الله. و احنا همّا البيت تاعو اذا كان حكمنا بثقة في الرجاء و فخرة ما تتزعزعش حتى للاخر. التحذير من عدم الايمان ⁷ على هاذيك كيما يقول الروح القدس: "اليوم, اذا كان سمعتوا صوتو, ⁸ ما تقسِيوْش قلوبكم, كيما درتوا نهار العصيان, نهار المحنة في الصحراء ⁹ وين جربوني جدودكم. جربوني وشافوا اعمالي مدة ربعين سنة. ¹⁰ على هاذيك غضبت على الجيل تاعهم, و قلت: ديما كاين الكفر ف قلوبهم, و عمرهم ما عرفوا طريقي. ¹¹ و حلفت عليهم باليمين وقت الغُش: باه مايدخلوش في لهناء تاعي". ¹² اتولهوا يا خاوتي, ما يكونش بينكم اللي قلبو معمر بالشر و بالكفر واللي يبعد على الله الحي. ¹³ بالصح كل يوم شجعوا بعضاكم, ما دامنا مازلنا نقولوا اليوم, باه ما تغركمش المعصية و تقسي قلوبكم. ¹⁴ على خاطر ولينا متشاركين مع المسيح, اذا كان حكمنا حتى للاخر في الثقة تاع لمرة لولى, ¹⁵ كيما يقول لكتاب: " اليوم, اذا كان سمعتوا صوتو, ما تقسِيوْش قلوبكم. كيما درتوا نهار المحنة". ¹⁶ و شكون همّا اللي عصاوه بعدما سمعوا صوتو؟ مش هاذوك الكل اللي خرج بيهم موسى من مصر؟ ¹⁷ و على من غضب الله مدة ربعين سنة؟ مش على هاذوك اللي داروا المعصية, حتى طاحوا في الصحراء ميتين؟ ¹⁸ و على من حلف باليمين: "ما يدخلوش في لهناء تاعو", غير على هاذوك اللي ما حبوش يطيعوا؟ ¹⁹ و نشوفوا باللي ما قدروش يدخلوا على خاطر ما عندهمش ايمان.