¹ يا سادة عاملوا العبيد تاعكم بالعدل و المساواة, عالمين باللي انتم ثاني عندكم سيد في السماوات. توصيات الختام ² داوموا على الصلاة ساهرين فيها على الشكر, ³ و صليو على جالنا احنا ثاني, باه يفتح لنا ربي باب و نهدروا بالسر تاع المسيح, اللي على جالو انا ثاني راني مسلسل في الحبس, ⁴ باه كي نخبر بيه تكلم كيما لازم الحال. ⁵ كونوا حكماء كيفاه تتصرفوا مع الناس اللي من برى لكنيسية, الفرصة اللي تكون اغتنموها. ⁶ خلي كلامكم ديما يكون بالنعمة لطيف مليح, باه تعرفوا كيفاه تجاوبوا كل واحد. تحيات الختام ⁷ احوالي كاملة ضرك يخبركم بيها الاخ لحبيب تيخكس, و الخادم الامين, و العبد معانا في الرب, ⁸ اللي بعثتو على جال هاذا الشيء بالذات, باه يعرف احوالكم و يفرح قلوبكم, ⁹ مع انسيمس الاخ الامين لحبيب اللي هو واحد منكم, و هما في زوز راح يخبروكم بكل واش صرى هنا عندنا. ¹⁰ يسلم عليكم ارسترخس رفيقي في الحبس, و مرقس ولد اخت برنابا, و هو اللي وصيتكم عليه, كان جا عندكم رحبوا بيه. ¹¹ و يسوع اللي يعيطولو يسطس, راهم غير هما برك من ليهود اللي خدموا معايا للملكوت تاع الله, و كانوا معينة ليّا. ¹² يسلم عليكم ابيفراس, اللي هو واحد منكم, عبد للمسيح, يجاهد في كل وقت على جالكم في الصلاة. باه تثبتوا في الكمال و تديروا الارادة تاع الله بالتمام. ¹³ انا نشهد ليه باللي يتعب ياسر في الخدمة على جالكم, و على جال المومنين اللي في لاودكية, و اللي في هيرابوليس. ¹⁴ يسلم عليكم الطبيب لوقا لحبيب, و ديماس, ¹⁵ سلموا على الخاوة اللي معاكم في لاودكية, و على نمفاس و على لكنيسية اللي في البيت تاعو. ¹⁶ و بعد ما تتقرى هاذي لبرية عندكم زيدوا اقراوها في لكنيسية تاع اللاودكيين, و انتم تقراو ثاني لبرية اللي بعثتها للكنيسية تاع لاودكية. ¹⁷ و قولوا لارخيبس: "احرص باه تمم الخدمة اللي قبلتها في الرب". ¹⁸ هاذا السلام بخط يدي انا بولس. اتفكروا السلاسل اللي مسلسلتني. النعمة تكون معاكم. امين. تكتبت هاذي لبرية لاهل كولوسي من روما على يد تيخكس و انسيمس.