¹ نتوسل ليك قدام الله و الرب يسوع المسيح اللي راح يدين الحيين و الموتى نهار اللي يبان و يجي الملكوت تاعو. ² بشّر بكلام الله و اوقف عليه في كل وقت مناسب و غير مناسب. لوم, و انذر, اوعظ بكل صبر في التعليم. ³ على خاطر راح يجي وقت يولِيو الناس ما يستحملوش فيه التعليم الصحيح, بالصح يتبعوا اهواهم و يحطوا معلمين يكلموهم بالشيء اللي يحبوا يسمعوه, ⁴ يبعدوهم على الحق و يجروهم للخرافات. ⁵ اما انت كون دايما متوله لكل شيء. استحمل المشقات. اعمل عمل المبشر, تمم خدمتك على احسن حال. ⁶ انا ظرك راني قاعد نَطْفَى بالشوية و ساعتي قرّبت. ⁷ جاهدت الجهاد الطيب, و تممت رحلتي و حافظت على الايمان, ⁸ و راه يسنى فيّا تاج البر, اللي راح يكافيني بيه الرب الدّيان العادل في هاذاك اليوم. و مش غير ليّا انا وحدي بالصح ثاني لجميع المتشوقين ليه وقتاه يظهر. لوصية لخرى ⁹ ازرب روحك باه تجيني, ¹⁰ على خاطر ديماس خلاني و راح يطلب في هاذي الدنيا هو سافر لتسالونيكي, و كريسكيس سافر لغلاطية, و تيطس سافر ل دلماطية. ¹¹ قعد معايا غير لوقا برك. جيب معاك مرقس على خاطر ينفعني ياسر في الخدمة. ¹² اما تيخيكس راني بعثتو ل افسس. ¹³ كي تجي, جيبلي معاك البرنوس تاعي اللي خليتو عند كاربس في ترواس, و ثاني جيبلي الكتب و بالخصوص المصاحف تاع الجلد. ¹⁴ اسكندر النحاس دار فيّا شر كبير, ربي يجازيه على الشيء اللي دارو. ¹⁵ رد بالك منو انت ثاني, على خاطر ما قبلش لكلام اللي قلناه و عارضو معارضة كبيرة. ¹⁶ واحد ما وقف معايا كي دافعت على روحي في المرة لولى, الكل خلاوني. ربي يسامحهم. ¹⁷ بالصح ربي وقف معايا و قواني, حتى كملت التبشير, و سمّعت الامم الكل, منعت من فم الصيد. ¹⁸ و مازال ربي يزيد ينجيني من كل شر و يحفظني للملكوت تاع السماوات. اللي ليه الجاه لدهر الدهور. امين. تحيات الختام ¹⁹ سلم على فرسكا و اكيلا و بيت انيسيفورس. ²⁰ اراستس قعد في كورنتوس. اما تروفيمس خليتو مريض في ميليتس. ²¹ ماذابيك تجي قبل ما يدخل الشتاء. يسلم عليك افبولس و بوديس و لينس و كلافدية و الخاوة الكل. ²² الرب يسوع المسيح يكون معاك. النعمة معاكم الكل. امين.