¹ وانت يا وليدي اتْقَوى بالنعمة اللي في المسيح يسوع. ² و الشيء اللي سمعتو من عندي قدام شهود ياسر, سلموا لناس امناء, يكونوا قادرين يعلموه لواحد اخرين ثاني. ³ كون شريك في استحمال الصعوبات كيما عسكري صالح تاع يسوع المسيح. ⁴ ما كانش واحد يتجند و يبقى مقلق على امور الدنيا اذا كان حاب يرَضي القايد تاعو. ⁵ و المصارع ما ينالش تاج الفوز غير اذا صارع حساب القانون. ⁶ الفلاح اللي يحرث و يتعب, يكون هو اول واحد ياكل من الغلة. ⁷ افهم واش نقول. ربي يجعلك قادر تفهم كل شيء. ⁸ اتفكر يسوع المسيح اللي قام من بين الموتى, اللي جا من سلالة داود حساب بشارة الخير اللي قاعد نعلن فيها, ⁹ اللي على جالها قاسيت الصعوبات وصلت تكتفت كي المجرم. بالصح كلمة الله ما تتكتفش. ¹⁰ على جال هاذا انا صابر على كلشيء في خاطر المختارين, حتى ينالوا هما ثاني السلاك اللي بالمسيح يسوع مع الجاه الدايم. ¹¹ صادق هاذا لكلام: اذا كنا متنا معاه نحياو ثاني معاه. ¹² اذا كان صبرنا نملكو معاه. و اذا نكرناه هو ثاني ينكرنا. ¹³ اذا ما كناش امناء يبقى هو مولى امانة, ما يقدرش ينكر ذاتو. الخادم المقبول عند الله ¹⁴ فكرهم بهاذي الامور, واطلب منهم على وجه الله باه ما يتجادلوش بالكلام. هاذا الامر اللي ما يصلح لحتى شيء, يدمر برك الناس اللي يسمعوه. ¹⁵ اجتهد باه تكون راجل مقبول عند الله, باه تكون خادم ما عندو باه يحشم, باه تعلم كلام الحق باستقامة. ¹⁶ بعّد على لقوال الباطلة الفارغة, اللي ما تزيد اصحابها غير كفر, ¹⁷ كلامهم يسري كي الافة اللي منهم هيمينايس و فيليتس, ¹⁸ اللي زاغوا على الحق, كي قالوا: "بالي القيامة قامت و تمت" و دمروا ايمان بعض الناس. ¹⁹ بالصح الساس لمتين تاع الله يبقى ثابت, و مختوم بهاذا القول: "الرب يعرف الناس اللي ليه". و "و كل من يسمي اسم المسيح لازم يبعد على الشر". ²⁰ بالصح في الدار لكبيرة مايكونش المواعن الكل غير من الذهب و الفضة برك, كاين ثاني تاع اللوح و تاع الفخار, كاين اللي يخدموا بيها حاجة شريفة و كاين اللي يخدموا بيها حاجة دونية. ²¹ و اذا كان الواحد نقى روحو من كل هاذي الشرور, يكون ماعون شريف طاهر, نافع لسيدو, واجد لكل فعل صالح. ²² اما النزوات تاع الصغر اهرب منها, و تبّع البر و الايمان و لمحبة و السلام مع الناس اللي يدعيو ربي بقلب صافي. ²³ بعد على المباحثات اللتافهة واللي ما عندها حتى فايدة, على خاطر يجي منها غير العراك كيما تعرف, ²⁴ و الخادم تاع ربي ما لازمش يعارك, بالصح يكون حنين على الناس الكل, قادر يعلم لخرين, صابر على المشقة, ²⁵ يهدر غير بالشوية مع الناس اللي يقاوموا, و لعل يهديهم الله و يتوبوا و بعرفوا الحق, ²⁶ و يفيقوا مع ارواحهم و يخرجوا من الفخة تاع ابليس اللي حصلهم فيها و خلاهم يطيعوه.