¹ ما تبخصش راجل كبير بالصح اهدر معاه كيما باباك, و الصغار اهدر معاهم كيما خاوتك, ² و العزايز كيما امك, و النساء الصغار كيما خواتاتك, بكل عفة. ³ كون كريم مع الارامل اللي يكونوا صح ارامل. ⁴ بالصح اذا كانت الارملة عندها اولادها و الا اولاد اولادها, قبل كل شيء يتعلموا كيفاه يعاملوا الاهل تاعهم بالتقوى و يديروا الواجب مع والديهم, على خاطر هاذا شيء تاع صلاح و مقبول عند الله. ⁵ بالصح اللي تكون ارملة صح و وحدانية, و حاطة رجاها على الله, تصلي و تدعي ليه ليل و نهار. ⁶ بالصح اللي استسلمت للملذات هاذيك تسمى ماتت بالحياة. ⁷ وصيهم بهاذا الشيء باه يكونوا بلا لوم. ⁸ و اذا كان الواحد ما يقدرش يتهلى في اهلو, و بالخصوص اماليه, يسمى نكر الايمان, و هو اشر من اللي ما يامنش. ⁹ تتسجل ارملة, كل واحدة ما يقلش عمرها على ستين سنة, متزوجة مرة واحدة, ¹⁰ مشهود ليها بالصلاح, تكون ربات لولاد, و ضيفت الغرباء, و غسلت رجلين القديسين, عاونت الناس اللي كانوا في ضيقة, و دارت لحوايج الكل تاع الصلاح. ¹¹ اما الارامل اللي صغار في لعمر ما تسجلهمش, على خاطر كان حبوا يتزوجوا يتخلاو على المسيح. ¹² و هكا يتخلاو على عهدهم لول ليه, و يكونوا اهل للدينونة, ¹³ و زيد يتعلموا الكسل, و يقعدوا يدوروا من دار لدار. و يتعلموا غير الهدرة بلا فايدة و و الاهتمام بالامور اللي ما تخصهمش. ¹⁴ على هاذا الشيء نطلب من الارامل الصغار في لعمر يتزوجوا و يجيبوا لولاد و يتولهوا بديارهم, باه ما يكونش للخصم حتى شيء يحكموا علينا. ¹⁵ على خاطر منهم وحايد اللي راحوا في طريق الشيطان. ¹⁶ اذا كان لواحد مؤمن و الا مؤمنة ارامل, يعاونوهم و ما يثقلوش على لكنيسية, اللي قاعدة تعاون في الارامل المحتاجين صح. ¹⁷ اما شيوخة لكنيسية اللي يقوموا بالواجب تاعهم على احسن وجه يستاهلوا تقدير اكبر, و بالخصوص اللي يتعبوا في التبشير و التعليم, ¹⁸ لكتاب يقول: "ما تحطش كمامة على فم الثور و هو يدرس", و "اللي يخدم يستاهل الاجرة تاعو". ¹⁹ كي واحد يجي يشكي من شيخ تاع كنيسية ما تقبلش لكلام تاعو غير كي يجيب زوز شهود و الا ثلاثة, ²⁰ اللي يغلطوا لومهم قدام الناس الكل, باه لخرين يخافوا. ²¹ نطلب منك بالجاه تاع الله و الرب يسوع المسيح و الملايكة المختارين, باه تمشي بهاذي لوصية بالمساواة, و ما تعمل حتى شيء تفضل فيه واحد على واحد. ²² ما تتسرعش في حطان يدك على اي واحد و ما تكونش شريك في ذنوب غيرك. احفظ نفسك دايما طاهر. ²³ من اليوم و رايح ما تشربش غير الماء وحدو, بالصح اشرب شوية شراب مليح ليك للمعدة و امراضك اللي كثرت. ²⁴ كاين ناس اللي ذنوبهم باينة حتى قبل ما يتحاسبوا, و كاين اخرين ما تبانش ذنوبهم حتى يتحاسبوا. ²⁵ هكذاك ثاني الاعمال تاع الصلاح باينة, و اللي ما تبانش ما هيش راح تبقى مستورة.