¹ Maye mine! sengifanana nekubutfwa kwesitselo sasehlobo, futsi njengemagelebisi lakhothoziwe; sekute sikhehle semagelebisi lesitawudliwa, kute umkhiwa losheshe wavutfwa lofiswa ngumphefumulo wami. ² Labatsembekile banyamalele eveni; kute locondzile kubo bonkhe bantfu. Bonkhe bamele kucitsa ingati; Ngulowo munye utingela umnakabo ngelinetha. ³ Tandla tabo tiyakutsandza kwenta lokubuhlungu: umbusi ucela imali, Umehluleli ulungele kutsatsa umdizo, futsi nemuntfu lonemagunya ukhuluma kubantfu loko lafuna kukuzuza. Ngako bahlela kanye kanye. ⁴ Loncono kubo ufanana nemanyeva, locondze kakhulu mubi kwendlula umtsangala wemanyeva. Lilanga lelabikwa balindzi bakho, lilanga lekujeziswa kwakho. Lesi sikhatsi sekuphumphutsekiswa kwabo. ⁵ Ungetsembi noma ngangumuphi makhelwane; ungabeki litsemba kunoma ngumuphi umngani. Caphela kutsi utsini kulomfati lolala etandleni takho. ⁶ Ngoba indvodzana iyawukwala uyise, nendvodzakati iyawuvukela unina, futsi namalokatana amelane neninatala. Titsa tendvodza bantfu bendlu yakhe. ⁷ Kepha nakungimi mine ngitawubuka Simakadze. Ngiyawumela Nkulunkulu wensindziso yami; Nkulunkulu wami uyawungiva. ⁸ Ungajabuli ngami, sitsa sami. Nase ngiwile, ngitawuvuka. Nangihlala emnyameni, Simakadze utawuba kukhanya kwami. ⁹ Ngoba ngonile kuSimakadze, Ngiyawutfwala intfukutselo yakhe aze angilwele, phindze akhiphe sijubo sami. Utangiletsa ekukhanyeni, futsi ngitamubona angephula ebulungisweni bakhe. ¹⁰ Ngako titsa tami tiyawukubona loku, futsi nelihlazo liyawukwengama lowo lowatsi kimi, ''Uphi Simakadze Nkulunkulu wakho?'' Emehlo ami ayawumubuka; uyawunyatseleka njengeludzaka etitaladini. ¹¹ Lilanga lekwakha tindvonga litawufika; ngalelolanga imincele iyawunwetjelwa khashane. ¹² Ngalelolanga bantfu bakho batawuta kuwe, Kusuka eAsiriya kanye nasemadolobheni eGibhithe, kusuka eGibhithe kuye Emfuleni, kusuka elwandle kuye elwandle, kanye nekusuka entsabeni kuye entsabeni. ¹³ Kepha indzawo itawubabete lutfo ngenca yalabantfu labaphila khona, ngenca yetitselo tetento tabo. ¹⁵ Yelusa bantfu bakho ngendvuku yakho, umhlambi welifa lakho. Kuhlala kodvwa emahlatsini, emkhatsini endzaweni yemadlelo. Tiyekele tidle eBhashani nase Gileyadi njengetinsuku takudzala. ¹⁴ Njengetinsuku lapho waphuma khona eGibhithe, Ngitawubakhombisa timanga. ¹⁶ Tive tiyawubona phindze tihlazeke ngemandla ato tonkhe. Titawufaka tandla tato emilonyeni yato; tindlebe tato titawuba tihhulu, ¹⁷ Bayawukhotsa lutfuli njengenyoka, njengetidalwa letihamba ngetisu emhlabeni. Titawuphuma etibayeni tato ngekwesaba, tiyawukuta ngekwesaba kuwe, Simakadze Nkulunkulu wetfu, futsi titawukwesaba ngenca yakho. ¹⁸ Ngubani Nkulunkulu lonjengawe- losusa tono, lowendlulisa kwephulwa kwemtsetfo walabasala welifa lakhe? Akakugcini kutfukutsela kwakhe phakadze, ngoba ujabulela kuphumelelisa sivumelwano sakhe ngekwetsembeka. ¹⁹ Uyawuphindze ubeneluvelo kitsi; uyagcobagcoba tonkhe tono tetfu ngaphansi kwetinyawo takho. Uyawuphonsa tonkhe tono tetfu ekhatsi ematfunjini elwandle. ²⁰ Uyawunika liciniso kuJakobhe ne kwetsembeka kwesivumelwano kuAbrahama, njengaloku wafunga kubokhokho betfu endvulo.