¹ Lelivi laSimakadze lafika kimi emnyakeni wemfica, enyangeni yelishumi, elangeni lelishumi lenyanga, latsi, ² ''Ndvodzana yemuntfu, tibhalele wena ligama lalelilanga, leli langa leli, ngoba lelilanga leli inkhosi yase Babylon itfumbe iJerusalema. ³ Ngako khuluma saga simelane nalendlu lenelidlame, umfanekiso. Tsani kubo, 'Inkhosi Simakadze isho naku: Beka lelibhodo lekuphekela. Libeke bese ufaka emanti kulo. ⁴ Hlanganisa tincetu tekudla ngekhatsi kulo, lonkhe licetu lelihle-litsanga kanye nelihlombe- uligcwalise ngematsambo lamahle. ⁵ Tsatsa lokuncono kulomhlambi bese upakisha ematsambo ngaphansi kwako. Kubilise bese upheka lamatsambo kuko. ⁶ Ngakoke Inkhosi Simakadze isho loku: Nako kulo lelidolobha lengati, libhodo lekuphekela lelitfombile kulo futsi nalokutfomba ngeke kusuke kulo. Tsatsa licetu emvakwe licetu kulo, kepha ungakhiphi lokunengi kwako. ⁷ Ngoba ingati yakhe isemkhatsini wakhe. Uyilungiselele etjeni lelishelelako; Akatange ayitsele ngephandle ebaleni kuyivala ngelutfuli, ⁸ ngako kuletsa intfukutselo ngalokufanako ekutiphindziseleni. Ngabeka ingati yakhe kulelitje lelibusheleleti kute ingetuvalwa. ⁹ Ngakoke, Inkhosi Simakadze isho loku: Nako kulo lelidolobha lengati. Ngitakukhulisa sitaki setinkhuni. ¹⁰ Lungisa tinkhuni bese wokhela umlilo. Upheke lenyama bese uhlanganisa netintfo tekuvanga bese uyekela lamatsambo ashe. ¹¹ Bese ulungisela lelibhodo lelingenalutfo emalahleni, khona utoshisisa bese ushisa lelitfusi, kute lokungahlobi ngekhatsi kulo kutoncibilika, kuguga kwalo kushe kuphele.' ¹² Sewukhatsele ngenca yemsebenti lomatima, kepha lokuguga kwalo akukaphumi kulo ngalomlilo. ¹³ Kutiphatsa kwakho kwemahlazo kusekungcoleni kwakho. Ngoba ngitamile kukugeza kepha ngeke ugezeke ekungcoleni kwakho, angeke usaphindze ugezeke ngite ngenelise intfukutselo yami kuwe. ¹⁴ Mine, Simakadze, sengikushito, futsi ngitakwenta. Angeke ngiyekele noma ngiphumule kuko. Njengoba tindlela takho betinjalo, kanye nalowakwenta, titakwehlulela!-Loku ngulokushiwo yiNkhosi Simakadze.'' ¹⁵ Lase livi laSimakadze lifika kimi, litsi, ¹⁶ ''Ndvodzana yemuntfu! Buka, ngitsatsa lokufiswa ngemehlo akho kuwe ngesifo, kepha kumele ungafukami noma ukhale, netinyembeti takho kumele tingehli. ¹⁷ Kumele ubhonse ngekuthula. Ungabenteli umngcwabo labafile. Ubofasa indvwangu yakho kuwe bese ubeka tincabule takho etinyaweni, kepha ungativali tinwele takho tebuso noma udle sinkhwa semadvodza lafukamele kutsi alahlekelwe bafati bawo.'' ¹⁸ Ngako ngakhuluma kulabantfu ekuseni, nemfati wami washona entsambama. Ekuseni ngenta bengitjelwe kona kutsi ngikwente. ¹⁹ Labantfu bangibuta, ''Ngeke usitjele yini kutsi letintfo leti tisho kutsini, letintfo lewutentako?'' ²⁰ Ngako ngatsi kubo, "Livi laSimakadze lifike kimi, litsi, ²¹ 'Tsani endlini yaka Israyeli, Inkhosi Simakadze isho loku: Buka! ngitosusa bungcwele endzaweni yami yekuphephela-leligcabho lemandla akho, injabulo yemehlo akho, nekulangatelela kwemphefumulo wakho, futsi emadvodzana kanye nemadvodzakati akho lowawashiya ngemuva atokuwa ngenkemba. ²² Utobese wenta njengobe nami ngentile: angeke utivale tinwele tebuso bakho, futsi ngeke udle tinkhwa temadvodza lafukeme! ²³ Esikhundleni, tindvwangu tenu titakuba setinhloko tenu, kanye netincabule etinyaweni tenu; angeke nifukame futsi ngeke nikhale, ngoba nitawuncibilika niphele etonweni tenu, futsi yonkhe indvodza itakubhonsela umfowabo. ²⁴ Ngako Ezekiyeli utawuba luphawu kuwe, ngoba konkhe lakwentile utakwenta loku nakufika. Utobese uyati kutsi ngiyinkhosi Simakadze!''' ²⁵ Kepha wena, ndvodzana yemuntfu, ngalelilanga lengitsatsa ngalo lithempela, leliyinjabulo yabo, ligcabho labo, naloku labakubonako nalabakulangatelelako - uma ngitsatsa emadvodzana nemadvodzakati abo- ²⁶ ngalelo langa, sikhoseli sitofika kuwe sikunike letindzaba! ²⁷ Ngalelo langa umlomo wakho utawuvuleka kuleso sikhoseli bese uyakhuluma-awuyuphindze uthule. Utawuba luphawu kubo khona batowati kutsi ngingu Simakadze.