¹ Phindze, livi laSimakadze lefika kimi, litsi ² ''ndvodzana yemuntfu, pholofetha umelane nebaPholofethi laba pholofetha ka Israeli, futsi utsi labo labapholofetha ngekucabanga kwabo, ''lalelani livi laSimakadze. ³ Inkhosi lenguSimakadze isho naku: nalo lulaka kubapholofethi labatilima labalandzela imimoya yabo, kodvwa bangakaboni lutfo! ⁴ Israyeli, bapholofethi bakho bebafanana nabo jakalazi etindzaweni letilahla lokungenamsebenti. ⁵ Awukayi kuletindvonga elubondzeni lolugegeletele indlu yaka Israyeli kute utoyilungisa, kute itomelana nemphi ngelilanga laSimakadze. ⁶ Bantfu banemibono yekweduka baphindze baphengule emanga, labo labatsi, ''Loku naloku kushiwo nguSimakadze''. Simakadze akazange abatfume, kodvwa, babentile bantfu kutsi betsembe kutsi lemilayeto yabo itaba liciniso. ⁷ Awukase yini ube nemibono lengasiyo, wena lotsi,''loku naloku kushiwo nguSimakadze'' ngibe mine ngingakakhulumi. ⁸ Ngako ke Inkhosi Simakadze isho naku, ngoba ube nemibono lengemanga waphindze wakhuluma emanga- ngako ke lona ngumlayeto weNkhosi waSimakadze lomelene nawe: ⁹ Sandla sami sitawumelana nebapholofethi labanemibono lengemanga kanye nekuphengula lokungemanga. Angeke babe semkhambatsini webantfu bami, nobe babhalwe emibhalweni yendlu yaka Israyeli: bangahambi baye endzaweni yaka Israyeli. Ngaloko utawukwati kutsi ngiyinkhosi Simakadze!. ¹⁰ Ngenca yaloku, futsi ngoba badukise bantfu bami batsi,''Kuthula! kube kute kuthula, bakha lubondza labatalupenda ngampende lomhlophe. ¹¹ Shano kulabo labampenda lubondza lubemhlophe, ''lutawuwela phansi; kutawuba nekwehla kwemvula, ngitawutfumela sangcotfo kulenta luwele phansi, kanye nemoya losihhushuhhushu kuze lutochekeka. ¹² Buka, lubondza lutawuwela phansi. abakakutjeli yini kutsi,''Uphi lompende lomhlophe lomufake kulo?'' ¹³ Ngako ke iNkhosi Simakadze itsi: Ngitawutfumela sihhushuhhushu elulakeni lwami, futsi kutawuba netikhukhula temvula entfukutselweni yami! Sangcotfo elulakeni lwami sitawubhubhisa ngalokuphelele. ¹⁴ Ngako ngiyawuphihlita phansi lolubondza lolumbonywe ngampende lomhlophe, futsi ngitawulubhidlitela phansi emhlabatsini ngikhombise tisekelo talo. Lutawubese luyawa, futsi wena uyawungcwatjwa ngulolubondza. Lapho ke uyawungati kutsi nginguSimakadze. ¹⁵ Ekutfukutseleni kwami ngiyawukhombisa lolubondza kanye nalabo labalumpendile lwaba mhlophe. Ngiyawukutsi kuwe,''Lubondza alusekho, kanjalo nebantfu labalumpenda- ¹⁶ baPholofethi baka Israyeli laba pholofetha ngeJerusalema nalabo lebebanemibono yekuthula ngaye. Kodvwa kute kuthula!-Lona ngumbiko weNkhosi Simakadze.'' ¹⁷ Ngako wena, ndvodzana yemuntfu, guculela buso bakho kumadvodzakati ebantfu bakho laba pholofetha lokusengcondvweni yabo, bese uyapholofetha umelane nabo. ¹⁸ Tsani, ''Inkhosi Simakadze isho naku: Maye kulabafati labatfunga tintfo temlingo etandleni tabo baphindze bente emaveyili etinhloko tabo talolonkhe luhlobo, bayisebentise kutingela bantfu. Ungabatingela yini bantfu bami kephanisindzise timphilo tenu? ¹⁹ Ungihlambalatile emkhatsini webantfu bami kute utfole incenyana yakolo netimvutfu tesinkhwa, kutobulala bantfu lokungakamele bafe, futsi kulondvolotwe timphilo talabo lokungakamele kutsi baphile, ngenca yemanga laya kubantfu bami labeve wena. ²⁰ Ngako ke iNkhosi Simakdze isho naku: ngimelene nemilingo yenu leniyisebentisile kuphuphutsekisa timphilo tebantfu shengatsi bebatinyoni. Nembala, ngitawutidzabula emikhonweni yenu; futsi labantfu lebewubatsiyile njengetinyoni- ngitawubakhulula: ²¹ Ngitawudzabula emaveyili akho ngiphindze ngisindzise bantfu bami esandleni sakho, kute bangaphindzi bavaleleke etandleni takho. Uyawungati kutsi ngingu Simakadze. ²² Ngoba ujabhisa inhlitiyo yemuntfu lolungile ngemanga, Noma ke bengingafisi kujabhiswa nguye, futsi ngoba bengingafisi kujabhiswa nguye, futsi ngoba ugcugcutele tento temuntfu lomubi khona anganophendvuka endleleni yakhe yekusindzisa imphilo yakhe- ²³ Ngakoke ungeke usaba nayo imibono lengemanga noma uchubeke uphengule, ngoba ngiyawusindzisa bantfu bami esandleni sakho. Uyawungati kutsi nginguSimakadze.