¹ Kwatsi ngesikhatsi, ngesikhatsi Davide nalalamanye emadvodza sebafikile eZikilaga elangeni lesitsatfu, batfola kutsi ema-Amalekhi bekahlasele agcekeza eNegevu neZikilaga. Ema-Amalekhi ahlasela iZikilaga, bayishisa, ² batfumba bafati nawonkhe muntfu bekakhona, bonkhe labancane nalabakhulu. Kute labambulala, kepha babatsatsa bahamba nabo. ³ Nakefika Davide nalamadvodza kulelidolobha, belishisiwe, bafati babo, emadvodzana abo, nemadvodzakati abo bekangekho atfunjiwe. ⁴ Davide nalalamanye emadvodza bakhala bamemeta bakhala kwate kwaphela emandla ekuchubeka bakhale. ⁵ Bafati baDavide bobabili bebatfunjiwe, Ahinoyami umfati waseJezreyili, na-Abhigeli umfati waNabhali umKhenani. ⁶ Davide bekalimele kakhulu emoyeni, ngoba bantfu besebakhuluma ngekumgcoba ngematje aze afe, ngoba onkhe lamadvodza bekakwatile, ngayinye ngayinye ngenca yemadvodzana nemadvodzakati ayo latfunjiwe; kepha Davide wawatfola emandla kuSimakadze, Nkulunkulu wakhe. ⁷ Davide watsi ku-Abhiyatha indvodzana ya-Ahimelekhi, umpristi, ''Ngiyakuncenga, letsa lijazi lakho kimi.'' Abhiyatha waliletsa lijazi kuDavide. ⁸ Davide wathantaza kuSimakadze acela indlela, atsi, ''Nasingalandzela ema-Amalekhi, sitowakhandza yini endleleni?'' Simakadze wamphendvula watsi, ''Balandzele, vele utobakhandza endleleni, utsatse konkhe lokungekwakho.'' ⁹ Ngakoke Davide wahamba, yena nemadvodza lamakhulu lasitfupha bekakadze akanye naye; befika emfudlaneni iBesor, lokwafike kwasala khona lamanye emadvodza. ¹⁰ Kepha Davide wachubeka kulandzela ema-Amalekhi, yena nemadvodza langemakhulu lamane; ngoba langemakhulu lamabili akhona asala khona, besebete emandla ekuchubeka kuwela umfudlana iBesor. ¹¹ Asahamba lamadvodza atfola umGibhithe esigangeni bamutsatsa bamuletsa kuDavide, bamnika sinkhwa, wasidla; bamunika nemanti ekunatsa; ¹² phindze nelicetu lelikhekhe lemantulwa kanye nemagilebisi lonyisiwe. Kwatsi nasekadlile, wawatfola emandla, ngoba bekangakate wadla lokusinkhwa nobe wanatsa lokumanti sekwengce emalanga lamatsatfu nebusuku lobutsatfu. ¹³ Davide watsi kuye, ''Uwekuklezaphi? Uchamukaphi?'' Waphendvula watsi lomGibhithe, ''Ngilijaha laseGhibhithe, sigcila salomunye um-Amaleki; umnumzane wami ungishiyile lana emalangeni lamatsatfu lengcile ngoba ngacalwa kugula. ¹⁴ Sahlasela iNegevu yemaKerethi, nemaJuda, neNegevu yaCaleb, nasisha neZikilaga.'' ¹⁵ Davide wabuta watsi kuye, ''Ungakhona kuhamba nami uyongikhomba lelibutfo lekuhlasela?'' LomGibhithe waphendvula watsi, ''Ngitsembise embikwaNkulunkulu kutsi ngeke ungibulale nobe ungijikele ungibisele kulomnumzane wami, ngitobese ngiyakumikisa lentasi kulelibutfo.'' ¹⁶ Kwatsi ngesikhatsi lomGibhithe sekehlile naDavide, lamabutfo bawakhandza alele phasi asakateke yonkhe lendzawo, atidlela phindze atinatsela phindze agidza ngenca yakokonkhe lebebabuya kuyokweba endzaweni yemaFilisti nasendzaweni yemaJuda. ¹⁷ Davide wahlasela wabalwisa kusukela nakuhwalala kwate kwefika imini yelilanga lelilandzelako. Kute namunye lowaphunyula ngaphandle kwemadvodza lamakhulu lamane, lavele agibela emakamela awo abaleka. ¹⁸ Davide wabuyelwa ngukokonkhe kwakutsetfwe ngema-Amaleki; phindze kwabuya nebafati bakhe lababili. ¹⁹ Kute lokwashoda, lokuncane nobe lokukhulu, emadvodzana nobe emadvodzakati, nobe lokwakwetjiwe, nanobe ngayini lamabutfo bekabatsatsele kona. Davide wabuya nokokonkhe. ²⁰ Davide wabuya nemihlambi, lebeyichutjwa ngulamabutfu ngembili kwalenye imfuyo. Batsi, ''Luphango lwaDavide lolu.'' ²¹ Davide wefika kulamadvodza langemakhulu lamabili bekawashiye endleleni ngoba sekaphelelwe ngemandla, nalebebatjelwe kutsi basale nabo emfudlaneni iBesori. Lamadvodza amhlangabeta Davide kanye nalabo bekahamba nabo. Watsi Davide nakafika kulabantfu, wabavusela. ²² Kepha labo betinhlitiyo letimbi nekukhohlakala lebebahambe naDavide bakhuluma batsi, ''Ngoba lamadvodza lawa asala angahambi natsi, kute lesitobanika kona kulomphango lesibuya nawo. Kepha, indvodza ngayinye ingatsatsa umfati wayo nebantfwana bayo kuphela ihambe.'' ²³ Davide wabese ubaphendvula utsi, ''Ningenti kanjena, banaketfu, ngalesikunikwe nguSimakadze. Simakadze usiphephisile wasimikisa kulabatfumbi labasihlasela. ²⁴ Ngubani lotonilalela kulendzaba lena? Ngoba loku kwaloyo lowaya emphini, ngakoke loku kwakhe naye loyo bekasele ngemuva agadze titfo tetfu; kutogiyelwana kugiyelwane ngekufana.'' ²⁵ Akwenteke kanjalo ke itolo nanamuhla, ngoba Davide besekawentile lomtsetfo entela ema-Izrayeli. ²⁶ Kwatsi nakefika Davide eZikilaga, watfumela incenye yemphango kubaholi bakaJuda, nangani bakhe, atsi, ''Bukani, nasi sipho senu lesibuya eluphangweni letitsa taSimakadze.'' ²⁷ Watfumela lokunye kubaholi labahlala eBetheli, nalobo bebaseRamothi eningizimu, nalabo bebaseJithe, ²⁸ nalabo bebase-Arowa, nalabo bebaseSiphmoth, nalabo bebase-Eshtemoa. ²⁹ Watfumela lokunye kubaholi bebaseRakali, nalabo bebasemadolobheni emaJerahmeelite, nalabo bebasemadolobheni emaKenites, ³⁰ nalabo bebaseHoma, nalabo bebaseBor Ashan,nalabo bebase-Athak, ³¹ nalabo bebaseHebron, natotonkhe letinye tindzawo Davide nalamadvodza bebaya kuto.