¹ Nanami, bomnaketfu, angikhonanga kukhuluma kini njengebantfu labakuMoya, kepha njengakubantfu benyama, njengakubantfwana labancane kuKhristu. ² Nganondla lubisi, hhay kudla lokucinile, ngoba beningakakulungeli; nanyalo nisengakakulungeli. ³ Ngoba solo nisebantfu benyama. Ngoba lapho umona nekucabana kusemkhatsini wenu, aniphili ngekwenyama na, futsi anihambi ngekwemazinga ebantfu na? ⁴ Ngoba uma munye atsi, ''Ngilandzela Pawula,'' nalomunye atsi, ''Ngilandzela Appollos? ⁵ Ngubani Apollos? Ngubani Pawula? Tisebenti lenikholwe ngato, kumunye nangamunye iNkhosi ibanike imisebenti. ⁶ Ngahlanyela wase Apollos uyanisela, kepha Nkulunkulu waniketa kukhula. ⁷ Ngako ke, kute lolutfo kulohlanyelako noma loniselako. Kepha nguNkulunkulu loniketa lokukhula. ⁸ Nyalo loyo lohlanyelako naloyo loniselako bamunye, nguloyo utawutfola umholo ngekwemsebenti wakhe. ⁹ Ngoba sitisebenti kanye naNkulunkulu. Uyingadze yaNkulunkulu, sakhiwo saNkulunkulu. ¹⁰ Ngekwemusa waNkulunkulu lowaniketwa kimi njengamakhi losezingeni lelisetulu, ngakha sisekelo kantsi lomunye uyakha kuso. ¹¹ Ngoba kute longakha sisekelo ngaphandle kwaleso lesesakhiwe, lesingu, Jesu Khristu. ¹² Nangabe kukhona lowakha kulesisekelo ngeligolide, lisiliva, ngematje ladulile, ngesigodvo, ngetjani noma ngetinhlanga, ¹³ umsebenti wakhe utawuvetwa, ngoba kukhanya kutakuveta. Ngoba kutawuvetwa emlilweni. Umlilo utawuva kutsi loko naloko kwenteni. ¹⁴ Nangabe umsebenti wanoma ngubani usala, utawemukela umvuzo; ¹⁵ kepha uma umsebenti wanoma ngubani usha uphela, utawulahlekelwa, kepha yena matfupha utawusindziswa, njengekubaleka emlilweni. ¹⁶ Anati yini kutsi nili thempeli laNkulunkulu nekutsi Umoya waNkulunkulu uphila kini? ¹⁷ Uma kunalobhubhisa lithempeli laNkulunkulu, Nkulunkulu utamubhubhisa loyo muntfu. Ngoba lithempeli laNkulunkulu lingcwele, nani ninjalo. ¹⁸ Akubete lotiyengako. Uma emkhatsini wenu kukhona locabanga kutsi uhlakaniphile kulesikhatsi, akabe ''silima'' kute atewuhlakanipha. ¹⁹ Ngoba buhlakaniphi balomhlaba bubulima kuNkulunkulu. Ngoba kubhaliwe, '''Ubamba labahlakaniphile ebucilini babo.'' ²⁰ Kantsi futsi, ''INkhosi iyati kutsi kucabanga kwalabahlakaniphile akunamsebenti.'' ²¹ Ngalesizatfu lesi, akubebete lotikhukhumeta kubantfu. Tonkhe tintfo ngetakho, ²² noma Pawula, noma Apollos, Cephas, noma lomhlaba, noma imphilo, noma kufa, noma tintfo letikhona, noma tintfo letitako. Tonkhe tintfo ngetakho, ²³ futsi nibaKhristu, naKhristu waNkulunkulu.