¹ Metuh iyah, tege antara jama'at Antiokhia, nabi-nabi rang kan guru iyah am Barnabas, Simon am dijoku Niger, Lukius mula Kirene, Manahem am hirup mula koni sampai bakah bauma raja Herodes, raja wilayah, rang nua Saulus. ² Samantara urang-urang itie metuh sambayang kan Hattlla am puasa, Roh Barasih bapaner, "Khusus akan aku Barnabas rang nua Saulus akan parintah am iti Aku jadi manimai urang." ³ Limah iyah, metuh urang bapuasa langsung berdoa, lalu maomah jarinya ka urang tinggi Barnabas rang nua Saulus, urang mautus rang nua badari. (Barnabas rang nua Saulus ka Pulau Siprus) ⁴ Metuh, jadi kona utus badari lai Roh Barasih, Barnabas rang nua Saulus turun kaSeleukia, mula koyah urang balayar ka Siprus. ⁵ Metuh urang jadi sampai kaSalamis, urang mamaner firman Hatalla kaSinagoge-Sinagoge urang Yahudi, lalu urang manaing Yohanes jadi palayan urang. ⁶ Metuh urang badari mangaliling uras pulau sampai kaPafos, urang badapat kan pramaya, nabi am palsu urang Yahudi, am banama Baryesus. ⁷ Inya barota kan Jabatan Sergius Paulus, urang am pintar, maminta Barnabas rang nua Saulus datang ka inya lai hona manongar firman Hatalla. ⁸ Tapi, Elimas tukang pramaya iyah, lai bira iyah memang arti nama henya, malawan Barnabas rang nua Saulus, inya bausaha mamelok Prokosul iyah mula imamnya. ⁹ Lai Saulus tie jam dikenal sabagai Paulus, diponuh lai Roh Barasih, maila Elimas ¹⁰ lalu bapaner, "o kolai, am ponuh lai tipu manipu lai sagala kajahat, kolai yah ana iblis, kolai munsuh mula sagala kabai, hinta hona kah kolai bahonti mamelok jalan Tuhan am jadi lurus? ¹¹ Cuba ila, jari Tuhan jadi katingimu kolai akan buta hinta tahu maila mata ari palamat babarapa ari." Metuh iyah jam, kabut kapotang turun katingi inya badari bakaliling mangau urang honi marigap jarinya. ¹² Limah, prakosul iyah jadi parcaya metuh maila apa am tajadi lai inya naharu akan palajaran mula Tuhan (Paulus rang nua Barnabas Badari Ka Kota Antiokhia ka Wilayah Pisid) ¹³ Metuh iyah, urang-urang am balayar barota inya mula Pafos sampai ka Perga, ka Pamfilia tapi Yohanes maningal urang lalu baulang ka Yarusalem. ¹⁴ Tapi, Saulus rang nua Barnabas totap mangaruh pajalan rang nua mula Perga sampai Antiokhia, ka Pisidia. Metuh ari mengo, urang badari ka Sinagoge lalu duru koyah. ¹⁵ Metuh mamaca Hukum Taurat mula kitab para nabi, kapala-kapala Sinagoge manyuruh urang bapaner ka rang nua rasul iyah, "Manyari-manyari amun kolai tege bungi paner parami akan urang iti, Cuba paner" ¹⁶ Metuh, Paulus badiri mamori isyarat honi jari nya lalu bapaner, "o urang-urang Israel kolay am gola akan Hatalla, dongar itie! ¹⁷ Hatalla bangsa Israel itie jadi mamilih hia umuh am jadi maningi bangsa diri salama urang diam ka tanah Mesir honi jari am taangkat, inya mamimpin urang maluar mula diah. ¹⁸ Palamatnya sakitar ompat puluh tahun, Inya basabar maharap tingkah laku urang ka padang pulau kayu. ¹⁹ Metuh inya, mampati tujuh bangsa katanah Kanaan, Inya mamori hak tanah iyah. ²⁰ Uras itie tajadi kira-kira salama 450 tahun. Lipas iyah Hatalla manyorah akan hakim-hakim sampai ka masa Nabi Samuel. ²¹ Metuh, urang maminta siku raja lalu Hatalla mamori urang Saul, ana kalaki bin kish, urang mula suku Benyamin, salama ompat puluh tahun. ²² Limah Hatalla mausir Saul, Hatalla mahuas Daut akan jadi raja urang, Hatalla tie jadi basaksi lalu bapaner, 'Aku jadi manapat Daud, ana kalaki isai, urang am manotap ka hati-Ku, am hona mangaruh apa kahona-Ku.' ²³ Mula katurunan itie, Hatalla, sasuai janyi-Nya, manaing ka Israel siku urang Juruselamat, iyah am Yesus. ²⁴ Sahompan panatang Yesus, Yohanes jadi mamori kabar sahompan baptisan pangampunan akan uras urang Israel. ²⁵ Samantara Yohanes manyadi gawi nya, inya tarus bapaner, 'Kolai kira aku itie sapa? Aku bukan inya. Cuba, ila itie, siku datang sahompan aku, sanal kakaki-Nya yah gin aku honta pantas malopasnya.' ²⁶ Manyari-manyari, katurunan kaluarga Abraham urang-urang antara kolai am gola kan Hatalla, akan diri dibori kasalamatan am jadi dipaner. ²⁷ Lai urang am tingal ka Yarusalem uras para pamimpin rang, am honta mangasene inya honta mamaham paner uras nabi, am jadi dibaca satiap mengo, jadi sagonap am di paner uras nabi iyah mahukum Yesus. ²⁸ Sakali pun, urang hinta manapat alasan itie iyah honi mahukum mati, urang manyuruh Pilatus mamati-Nya. ²⁹ Metuh urang manyimpul am ditulis tentang inya, urang manurun-Inya mula salib langsung mangaling inya lalam kuburan. ³⁰ Metuh iyah Hatalla mahuas urang mati, ³¹ salama baari-ari, Yesus manampa kan kaniri ka urang-urang am barota akan-Inya mula Galilea sampai ka Yarusalem, am wayah itie jadi saksi-saksi-Nya akan bangsa itie ³² Kami, manaing barita bai tentang janyi Hatalla hia umuh diri, ³³ lai Hatalla jadi manopat janyi itie akan diri, ana-ana urang, honi mahua Yesus, bira am tatulis lalam kitab Mazmur pasal dua: 'Kolai yah ana-Ku. Ari itie, aku tie jadi Ompai-Mu.' Mazmur 2:7 ³⁴ Tentang am mahuas Yesus antara urang mati, hinta akan mula baulang kakamatian, Hatalla langsung bapaner' 'Aku kan mamori kakolai kuasa am kudus tahu diparcaya, am dibori kan Daud.'Yesaya 55:3 ³⁵ Iyah am lai nya inya bapaner lalam Mazmur am bukan, 'Kolai hinta akan maubah urang am Kudus-Mu maila kamatian.'Mazmur 16:10 ³⁶ Sabab, Daud jadi katurunan kaniri lai kahona Hatalla, lalu mati , diomah helat hia umuhnya, lalu maila kabinasaan, ³⁷ tapi Yesus yah Hatalla am dihuas mula urang mati, hinta maila kabinasaan. ³⁸ Lai iyah, nauh nya am diingat lai kawan manyarimu, bahwa mula Inya tie am pangampunan sagala kasalah mu yah, ³⁹ lantaran-Nya satiap urang am parcaya dilopas mula sagala halnya mula kolai hinta tahu dilopas lai Hukum Taurat Musa. ⁴⁰ Limah iyah, bajaga-jaga nyaman hal-hal am dipaner mu kalam kitab uras nabi honta kona kolai: ⁴¹ Ila itie, uii uras pahina! Tagiat langsung mati, lai aku jadi ngaruh gawi ka zamanmu, lai pangawi am hinta kolai parcaya, amun tege urang tege urang mamori panjelasan ka kolay."'Habakuk 1:5 ⁴² Samantara Petrus rang nua Barnabas maluar, urang-urang mamohon nyaman urang mangabar firman itie metuh mengo pagi. ⁴³ Limah urang badapat ka Sinagoge iyah jadi, banya urang Yahudi am gola akan Tuhan uma paulus rang nua Barnabas, am bapaner kaurang banya nyaman manorong urang tarus diam kalalam Anugerah Hatalla. ⁴⁴ Amun ari mengo pagi, hona uras urang am ka kota bakumpul lai manongar firman Hatalla. ⁴⁵ Tapi metuh urang-urang Yahudi maila karami iyah urang diponuhi lai kahiri hati lipas iyah urang langsung malawan apa am dipaner Paulus samil mahasutnya ⁴⁶ Limah iyah, Petrus rang nua Barnabas manimatnya honi karani langsung bapaner, "Hal itie penting lai firman Hatalla harusnya diparah mu holu. Lai kolai manolak nya lai kolai mansai kaniri nya honta pantas bagora pahirup am abadi, ila kami bapaling mula bangsa-bangsa am bukan. ⁴⁷ Lai, bira itie Hatalla mamori parintah akan kami: 'Aku jadi mangaruh kolai torang akan urang-urang bukan nyaman kolai tahu manaing kasalamatan sampai ka hujung dunia."'Yesaya 49:6 ⁴⁸ Metuh urang-urang Yahudi manongar hal itie, urang basukacita mamuliakan firman Hatalla. Sabanya am jadi kona tentu honi pahirup am abadi, tahu parcaya. ⁴⁹ Lai iyah firman Hatalla maluas kasaluruh wilayah itie. ⁵⁰ Tapi, urang-urang Yahudi maadu domba labini-labini Saleh am tahormat urang-urang penting ka kota, mahuas, lalu malai Paulus rang nua Barnabas, lalu mausir urang nua ka luar mula daerah parbatasan urang. ⁵¹ Samil mangipas dabu mula kaki urang Yahudi kakoyah, Paulus rang nua Barnabas badari ka Ikonium. ⁵² Uras murid, diponuhi karami lai Roh Barasih.