¹ Emnyakeni welishumi nakubili wekubusa kwa-Ahaz inkhosi yakaJuda, umbuso waHoshea indvodzana ya-Elah wacala. Wabusela eSamaria abusa Israyeli iminyaka leyimfica. ² Wenta lokubi emehlweni aSimakadze, wangafani nemakhosi aka-Israyeli labekakhona embikwakhe. ³ Shalmaneser inkhosi yase-Assyria wamhlasela, wase Hoshea uba sisebenti sakhe wamletsela imitselo. ⁴ Inkhosi yase-Assyria yase iyabona kutsi Hoshea bekasolo ahlela lokubi ngaye ngoba Hoshea besekatfumele titfunywa kuSo inkhosi yaseBibhithe; lokunye, kute umtselo lawunika inkhosi yase-Assyria njengoba bekasolo enta ngemnyaka ngemnyaka. Ngakoke inkhosi yase-Assyria iyamthulisa Hoshea yamfaka ejele. ⁵ Yase inkhosi yase-Assyria ihlasela live lonkhe, wahlasela neSamaria wayivimbetela iminyaka lemitsatfu. ⁶ Ngemnyaka wesiphohlongo wembuso waHoshea inkhosi yase-Assyria yatsatsa iSamaria wetfwala nebantfu wabayisa e-Assyria. Wababeka eHalah, nasemfuleni wemikhumbi yaseGozan, kanye nasemadolobheni aseMedes. ⁷ Lokutfunjwa loku kwenteka ngenca yekutsi bantfu baka-Israyeli bona kuSimakadze Nkulunkulu wabo lowabakhipha eGibhithe ngephasi kwesandla saPharaoh inkhosi yaseGibhithe. Labantfu bebasolo bakhonta bonkulunkulwana ⁸ futsi bahamba ngetindlela taletive Simakadze labakhipha eveni embikwema-Israyeli, benta nangetindlela temakhosi aka-Israyeli bekadze enta ngato. ⁹ Bantfu baka-Israyeli benta ngansense lokungavumelani naSimakadze Nkulunkulu wabo. Batakhela tindzawo letiphakeme madolobha onkhe, kusukela embonisweni kuya enqabeni. ¹⁰ Bakha netinsika tematje netithico ta-Asherah kuyoyonkhe intsaba kanye nakusosonkhe sihlahla lesuluhlata. ¹¹ Lapho bashisela khona timphepho kutotonkhe tindzawo letiphakeme njengoba bekwenta letive letacoshwa nguSimakadze embikwabo. Ema-Israyeli enta tintfo letikhohlakele tekuhlokolota Simakadze ate atfukutsele; ¹² bakhonta tithico labekadze Simakadze atse kubo,''Ningayenti lentfo lena.'' ¹³ Nobe Simakadze bekakhulunile ku-Israyeli nakuJuda kuwonkhe umprofethi, nakuye wonkhe umboniswa, atsi, ''Sukani etindleleni tenu letimbi nigcine imitsetfo netimiso tami, futsi nicaphele nigcine yonkhe imitsetfo lengayiyala boyihlo, nalenganitfumela yona ngetinceku tami baprofethi.'' ¹⁴ Kodvwa abalalelanga; esikhundleni saloko babalukhuni njengaboyise labangazange batsembele kuSimakadze Nkulunkulu wabo. ¹⁵ Batala timiso nesivumelwano Simakadze bekakadze asente nabokhokho babo, natotonkhe teluleko labebanikwe tona. Balandzela tintfo letinganamsebenti nabo bagcine sebangenamsebenti. Balandzela tive lebetisemaceleni abo, leto Simakadze abebayale kutsi bangatilingiseli. ¹⁶ Bayifulatsela yonkhe imitsetfo yaSimakadze Nkulunkulu wabo. Bakha ngensimbi tithico letimatfole abamabili batotikhonta. Bakha nesika ya-Asherah, bakhonta nako konkhe lokusesibhakabhakeni baphindze bakhonta naBaal. ¹⁷ Benta emadvodzana nemadvodzakati abo kutsi engce emlilweni, basebentisa kubhula nebutsakatsi, batitsengisa kulobekukubi embikwaSimakadze, bamuhlokolota kutsi akwate Simakadze. ¹⁸ Ngakoke Simakadze bekatfukutselele kakhulu ema-Israyeli wawasusa embikwakhe. Kute ngisho namunye lowasala ngaphandle kwesive saJuda sodvwa. ¹⁹ Ngisho naJuda akayigcinanga imitsetfo yaSimakadze Nkulunkulu wakhe, walandzela tindlela letatentiwa ma-Israyeli. ²⁰ Ngakoke Simakadze wase uyatala tonkhe titukulwane taka-Israyeli; wabehlisa , wabanikela etandleni talabo labatawukubemuka kwabo njenge mphango ate abesuse embikwakhe. ²¹ Simakadze wadzabula kubusa kwakaDavide, wase wenta Jeroboam indvodzana yaNeba kubayinkhosi. Jeroboam wasusa Israyeli ekulandzeleni Simakadze wabenta benta sono lesikhulu. ²² Bantfu baka-Israyeli balandzela tonkhe tono taJeroboam bangasuki kuto, ²³ ngakoke Simakadze wabasusa embikwakhe njengoba bekashilo ngentinceku baprofethi bakhe bonkhe kutsi utokwenta. Ngakoke Israyeli wasuswa eveni labo waya e-Assyria, solo kunjalo nalamuhla. ²⁴ Inkhosi yase-Assyria yaletsa bantfu baseBabylon, nebaseKuthah, nebase-Avva, nebaseHamath, nebaseSepharvaim, wababeka emadolobheni aseSamaria endzaweni yema-Israyeli. Bayitsatsa iSamaria bahlala emadolobheni ayo. ²⁵ Kwenteka ngesikhatsi sekucala sekuhlala kwabo kutsi abamuhloniphanga Simakadze. Ngakoke Simakadze watfumela emabhubesi kubo abulala incenye yabo. ²⁶ Ngakoke bakhuluma enkhosini yase-Assyria batsi, ''Letive lotisusile watiletsa kulamadolobha aseSamaria akatati tindlela letifunwa ngulonkulunkulu welive. Ngako ubatfumelele ngemabhubesi, buka, emabhubesi abulala bantfu lapha ngoba abatati tindlelo letifunwa ngulonkulunkulu wendzawo.'' ²⁷ Inkhosi yese-Assyria yayala yatsi, ''Tsatsani munye webapristi kulabo lenabatsatsa lapho nimvumele ahambe ayohlala lapha, abafundzise tindlela letifunwa ngunkulunkulu walelive.'' ²⁸ Ngakoke munye weba pristi labebakadze bamsuse eSamaria weta wahlala eBethel; wabafundzisa kutsi bamhloniphe kanjani Simakadze. ²⁹ Ngesive ngesive setihambi satakhela bonkulunkulwana baso sababeka etindzaweni letiphakeme letatakhiwe ngemaSamaria--tonkhe tive tetihambi emadolobheni letihlala khona. ³⁰ Bantfu baseBabylon bakha Sukkoth Benoth; bantfu baseKuthah bakha Nergal; bantfu baseHamath bakha Ashima, ³¹ ema-Avvites wona akha Nibhaz kanye naTartak. Ema-Sepharvites ashisa bantfwababo emlilweni ku-Adrammalek kanye na-Anammelek bonkulunkulwana bemaSepharvites. ³² Nabo bamhlonipha Simakadze, bakhomba emkhatsini wabo bapristi betindzawo letiphakeme, umpristi bekabentela imihlatjelo emathempelini etindzaweni letiphakeme. ³³ Bamhlonipha Simakadze futsi bakhonta nabonkulunkulwana babo ngedlela yetive letasuswa lapho. ³⁴ Kuze kube kunamuhla bachubeke njalo ngetindlela tabo letindzala. Abahloniphanga Simakadze nobe balandzele timiso, netindlela , nemitsetfo noma imitsetfo Simakadze layinika situkulwane saJacob lowetsiwa nguSimakadze kutsi ngu-Israyeli. ³⁵ Ngesikhatsi Simakadze enta sivumelwano nabo wabayala watsi, ''Ngeke nisabe labanye bonkulunkulu nobe nibakhotsame, nobe nibadvumise , nobe nibentele imihlatjelo. ³⁶ Kodvwa Simakadze, unikhiphe eveni laseGibhithe ngemandla lamakhulu nangemkhono loweluliwe, nguye leniyawukumhlonipha, nguye leniyakumkhotsamela, futsi nguye leniyakumentela imihlatjelo. ³⁷ Timiso kanye nemiyalo, nemitsetfo kanye nemitsetfo nalibhalela yona niyawukuyigcina phakadze naphakadze. Ngako ningesabi labanye bonkulunkulu, ³⁸ kanye nesivumelwano lengisente nani ngeke nisikhohlwe; futsi ningabahloniphi labanye bonkulunkulu. ³⁹ Kodvwa Simakadze Nkulnkulu wenu nguye lenitomhlonipha. Simakadze utonilamulela emandleni etitsa tenu. ⁴⁰ Bebangalaleli ngoba bachubeka benta labebakwenta kadzeni. ⁴¹ Ngako letive leti tamhlonipha Simakadze taphindze takhonta tithico letibatiwe, nebantfwababo benta njalo-kanye nebantfwana bebantfwababo. Bachubeka kwenta lobekwentiwa bokhokho babo kuze kube kunamuhla.