2

¹ Братъёс, сюлворыса куриськом тӥледды, асьмелэн Иисус Христос Кузёмылэн лыктонэз пумысен но асьмелэн Соин ӵошен огазеяськеммы сярысь,

² эн дыртэ куалектын визьмыныды, но эн кышкалэ духлэсь но кыллэсь но гожтэмлэсь но, кудзэ ми пе келямы Христослэн лыктон нуналыз вуиз ини шуыса.

³ Тӥледды нокин но нокызьы но медам пӧя, уго со нунал уз лыкты, Инмарлэсь чигнан вуытӵёзь но Солы пумит бугыръяськонъёс кутскытӵёзь но сьӧлыклэн адямиез, быронлэн пиез, усьтӥськытчёзь,

⁴ кудӥз Инмарлы но святынялы пумитъяське но вылтӥяське ваньмызлэсь вылӥе, уго пуксёз Инмарлэн храмаз, Инмар кадь ик, но асьсэ калыклы возьматоз Инмар интые.

⁵ Шат уд нӥ тодӥське, мон вералляй со сярысь, куке тӥ дорын вал?

⁶ Но табере тӥ тодӥськоды, мар уг сёты солы усьтӥськыны аслаз дыраз.

⁷ Уго законлы лушкем пумитъяськон вань ини, нош аслысьтыз ужъёссэ быдэсъяны уг быгаты, сое возись вань на бере.

⁸ Нош возись басьтэмын луиз ке, законлы пумитъяськись лыктоз, кудзэ Иисус Кузё виёз Аслаз ымысьтыз духеныз но быдтоз Аслаз лыктонэзлэн лыктэменыз,

⁹ кудӥз лыктоз сатаналэн юрттэменыз но возьматоз аслысьтыз кужымзэ, шонертэм пусъёсын но паймымон ужъёсын,

¹⁰ но котькыӵе шонертэмен пӧялоз бырись калыкъёсты, уго соос ӧз яратэ утиськонэ нуись зэмлыкез.

¹¹ Но со понна Инмар соосты пӧяськонние вуттэ но оскыны лэзе шонертэмлы.

¹² Судить каремын луозы ваньмыз, кин зэмлыклы ӧз оскы нош шонертэмез яратӥз.

¹³ Яратоно братъёс, нош ми котьку тау карыны кулэ Кузё-Инмарез тӥ понна, Духез освятить карем пыртӥ но зэмлыклы оскон пыртӥ, Инмар кутсконысен ик быръйиз тӥледды утӥськонлы шуыса,

¹⁴ кудаз ӧтиз тӥледды милям Ӟеч Ивор вераммы, Иисус Христос Кузёмылэн даназ ми мед пыромы шуыса.

¹⁵ Озьыен, братъёс, сылэ но возиське со борды, мае ми тӥледлы сётӥмы, марлы тӥ дышетскиды милесьтым вераммылэсь яке милям гожтэммылэсь.

¹⁶ Нош ачиз, милемды яратӥсь, Иисус Христос Кузёмы но асьмелэн Инмар Атаймы благодатен сётӥз милем буйгатскон но ӟеч оскиськон,

¹⁷ буйгатоз тӥлесьтыд сюлэмъёстэс но юнматоз тӥледды котькыӵе ӟеч ужын но кылын.