1 2 3 Нонанкана Төрэн бисин, нян Төрэн Хэвкилэ бисин, бэйды-дэ Төрэн Хэвки бисин. 2.Тарак нонаптукун Хэвкилэ бисин. 3.Эйду як биси Ноҥандулин-такан ичурич ини билрин, ач Ноҥнач як-та эч ичурич билрэ, як нонаптукун ичурич билчэ. 4 5 4.Ноҥандулан ин бисин, ин-нен бэилду ҥэриҥэтэн бисин. 5.Ҥэрин ҥэриҥчири химҥэндулэ, химҥэн-дэ Ноҥман эч хатарди дасса. 6 7 8 6.Хэвкидук эмэсэмкэмрин Иоанн гэрбэ бэй. 7.Ноҥан мэтунэрин Ҥэрин эмривэн, ноҥандулин кубэччур бэил долдаридюр тэдедэтэн. 8.Ноҥан эч ҥэрин бис, Ҥэрин дюгулин-тэкэн укчэндэн хөрукэмчэ. 9 9.Эливэн айдитчин Ҥэрин бисин, элэ бугла эмритэну Ҥэринди ҥэримутти. 10 11 10.Ноҥан элэ бугла бэил долатан бисин, буг-да нонапач Ноҥандулин ичурич билрин, нян бэил Ноҥман эчил тамкар.11.Ноҥан мэнҥилтэкий эмрин, Ноҥҥилни-нян Ноҥман эчил мэ̀рҥигчимур алимрá. 12 13 12.Ноҥман-нян аич алимчáлду, Ноҥан гэрбэвэн тэдечэлду, Хэвки хурэлгэчинни́ италкáн эҥигэтэн бөрин,13.этидук хуҥэлдук балдачал, этидук булгис некэмсидукун бис,этидук бэй некэмсидукун-дэ бис, таракаси Хэвкидук биси. 14 15 14.Төрэн ичури булгисэлкэн один, мутнюн-дэ бисин, аю бөрич милтэрэҥчири эливэнь тэдекичич-тэ.Бу Ноҥан эскэкич ҥэримэн көеривун, эскэкичкэчин Амандукий Өмэснэ эскэкич ҥэримэн.15.Ноҥан дюгулин Иоанн укчэнрин игэч мэтуникэн:“Эрэк, тек Тарак мин гөндиччэву, мин амардадуву Ҥэнэдди мин дюлдэлэву илран, миндук дюллэ балдатла. 16 17 18 16.Ноҥан милтэрэдукун мут айнюн аилба гадит,17.Моисейли итун бөптин, нян аю бөтти тэдекич-тэ айдит Иисус Христосли эмрин.18.Хэвкив ок-та ҥи-дэ-тит эч көер- Ноҥман Ноҥан Өмнин Хутэн ичукэнин, Амми долан бидди”. 19 20 21 19. Эр эррөчин Иоанн ичукэнин укчэнэкэн бисин, Иерусалимдук иудеямҥал нэҥэдюкэмҥэлбу левитэлбу-дэ ноҥантакин улгэмэвкэнчэлтэкитэн:“Хи ҥи бисэнри?”20. Ноҥан хáмаччин баргуттин, арникан бисѝгчинни дяпканикáн:“Би эсэм Христос бис”.21. Ноҥантакин улгэмрэ:“Ҥи-си бисэнри хи? Или ягу?”Ноҥан гөнин: “Эсэм”.“Көевýн?” Ноҥан баргурин: “Эсэм”. 22 23 22. Таракам ноҥартан улгэмрэ: “Ҥи-си хи бисэнри ? Он барагдиру муну улгэмэвкэнчэлтэки: яв хи мэн дюгулий гөндинри?”23. Ноҥан баргун: “Би ги́ндула иркадди дилганни бисэм: “ Ҥунрурилрэ Хунҥиду ҥэнэнмэйгэн”- көевун Исайя гөҥрэчэгчинни” 24 25 24.Эмчэл фарисеилдук бисил биситэн. 25.Тарал ноҥантакин улгимиритэн: “Хи эникэн Христос бис, эникэн Илия бис, эникэн көевун-дэ бис, тарбач ями хи хэвкилэкэчидинри?”. 26 27 28 26. Иоанн ноҥартакитан барагрин: “ Би мөч хэвкилэрэм, тарбач хун дулакандуласан илаттан ху Ноҥман этисэн хар.27.Ноҥан мин амардадуву Ҥэнэдди, дюлдэлэву илран. Хэлэсэчивки би эннэву-дэ-тит Ноҥан унтан дялипкиррóн-да-тит аталра”.28.Эрэк Вифанияла эчин некэддитэн, окат Иордан далидун, Иоанн хэвкилэдеклэн. 29 30 31 29.Гяла инэҥнэ Иоанн ноҥантакин ҥэнэддив Иисусу иттин, гөнин-дэ:“Эр Хэвки Энкэчэчэнни, ҥунмерэл төнҥэкичилбутэн Мэндулэй гадин. 30. Эрэк Ноҥан дюгулин би гөниву:“Мин амардадуву Ҥэнэдди, дюлдэлэву илран, миндук дюллэ Ноҥан эсипчи эрэглэ бидди биси”.31.Би Ноҥман эчу хар, тарбач би мөлэ хэвкилэдэй эмриву, Ноҥан Израильла ичулэбдэн”. 32 33 34 32. Иоанн мэтурин гөникэн:“Би Хэвки Мураман көериву няниндук тикэргэддив, гираван урэччөн, Ноҥандулан дориди бидилрив.33.Би Ноҥман эчу хар, тарма Ҥи мину эвэски эмэсэмкэнчэ, мөлэ би хэвкилэддэку, минтэки гөнин: “Ҥилэ Мурам итчинри өйгич доддив Ноҥандулан эмэптив, Тарак Хэ́рэпчэч Мура́нь хэвкилэри бидин”. 34.Би тарав көериву ичурич тэлэҥриву-дэ Ноҥан- Хэвки Нярудáн бисивэн. 35 36 35.Гяла инэҥнэ Иоанн нян-да илачиддин дьөрнюн мэн хупкуттилнюми.36.Иттиди Иисус Ҥэнэддивэн, Иоанн гөнин:“Эр Хэвки Энкэчэҥэн”. 37 38 39 37. Дьөрин хупкуттиҥэлни ноҥан гөнивэн долдаридюр, Иисус амардадун бодаснитан. 38. Иисус эсэнин, ноҥартан Ноҥандун бодаддивутан иттин. Ноҥан таралтаки улгэмрин:“ Яч ху дьогалáс?” Ноҥартан Ноҥантакин барагритан:“ Хупкучимҥэ, Хи илэ инэнри?” 39. “Хөргэр, мэркэр-дэ итчис” - Ноҥан барагрин ноҥартакитан. Тарал хөрритэн, иттитэн-дэ илэ Ноҥан инивэн нян Ноҥандулан инэҥ мудаклан биддитэн. Мянтаки частаки далилрин. 40 41 42 40. Гя таралдук Иоанндук Иисус дюгулин долдачалдук Ноҥандун бодасанчалдук Андрей бисин Симон Петр нөн. 41. Тарак дюлэгэч мэн акми Симом бакрин, ноҥантакин гөнин-дэ: “Бу Мессияв (Христосу-Хэрэпчэв) бакру”. 42. Андрей Симом Иисустэки эмукэнин. Иисус Симом көечиснин нян гөнин: “Хи- Симон, Иоанн нярудан бисэнри, тар-нян хину Кифач гэрбугрэдир, эрэк унувкачинҥан: “Дьол, нюлкá-вул (Петр)”. 43 44 45 43. Гяла инэҥнэ Иисус Галилеятки хөрэмэлрин. Ноҥан Филиппу бакрин, тартаки гөнин-дэ:“Минду бодли”. 44. Филипп Андрейнюн Петрнюн-дэ өмэндук городдук бисил биситэн- Вифсаидадук. 45. Филипп Нафанаилу бакрин нян ноҥантакин гөнин: “Бу бакру, Тарав Ҥи дюгулин итундула Моисей, көевурэ́л-дэ дуккарачавутан. Эрэк Иисус Назареттук биси, Иосиф Нярудан Хутэн”. 46 47 48 46. Тарбач Нафанаил ноҥантакин улгэмрэн: “Янир-гал аиста Назареттуккал бимнэнгэл?” Филипп ноҥантакин барагрин: “ Ҥэннилу, итнэли”. 47. Иисус Нафанаилу иттиди, Ноҥантакин дагамаддив, Ноҥан тарак дюгулин гөнин : “Эр тэдекичич израильамҥа, ач өлэклэч бинич биси”. 48. Нафанаил Иисустэки улгэмрэн: “Идук Хи мину ханри?” Иисус тартаки барагрин: “Филипп хину эдлэн ҥатта, Би хину инжир хякитан хатлан көериву”. 49 50 51 49. Тали Нафанаил Ноҥантакин гөнни: “Равви-Хупкучимҥэ! Хи- Хэвки Нярудан Хутэн бисэнри, Хи - Израиль Тэгэмэрэн бисэнри”. 50. Иисус ноҥантакин барагрин: “Хи тэденри Би хинтэки гөнчэливу: “Би хину көериву инжир хякитан хатлан”, - эдук эгдедмэру иткэрэдинри!” 51. Унэт-тэ ноҥантакин гөнин: “Тэдекич тэдю хунтэки гөнэм: ху текэрэптукун нянин аҥаттив көегрэдис, Хэвки ангелалбан-да, ойчикачиддилба эвкэчиддилбу-дэ Бэй Нярудтакин- Хуттэкин”