Pesan-pesan penutup ¹ Padah sidak isak sidak tunuk ngau pemerintah ngau bala penguasa, taat ngau siap mulah bala pekerja te baik. ² Nang sidak memfitnah, nang betangkap, ramah, lemah lembut ngau semua urang. ³ Empadai kita subak sik me idup alam kejahilan: ndai taat, sesat, mayuh te kining alam hawa nafsu, jaik, dengki, kejam, sama ngemencik pangan. ⁴ Tapi dah nyata kemurahan Allah, juruselamat kita ngau kasih Ya ngau mensia, ⁵ rama yak Ya dah nyelamat ke kita, bukai empadai pempulah baik te kita pulah, tapi empadai rahmat Ya ulih pemandian kelahiran kembali, ngau ulih pembaharuan te dekerja ulih Roh Kudus, ⁶ te udah delimpah ke Ya ngau kita ulih Yesus Kristus, Juruselamat kita, ⁷ isak kita sebagai urang te debenar ke ulih kasih karunia Ya, berhak nerimak idup te kekal, sesuai ngau pengarap kita. ⁸ Anai tuk benar, ngau aku kak isak kitak yakin nguat ke ya, isak sidak te udah pecayak ngau Allah benar-benar berusaha mulah kerja te baik. Yak mek te beguna bagi mensia. ⁹ Tapi tangkis ke bala urus te sengaja degegak, ngau te budu, su'al selisih, bepadu, ngau pekelai su'al ukum Taurat, empadai semua yak ndai sik guna ngau sia-sia belaka. ¹⁰ Surang bidat, antik dah sekalik dua kalik kitak nasihati, tangkis ke ya udek. ¹¹ KItak ketau urang semacam yak sesat, ngau dosa sidak dah ngukum dirik. ¹² Udah kukirim Artemas atau Tikhikus ngau kitak, berusaha lah datai ngau aku de Nikopolis, empadai dah kuputus ke kak nugau diak selamak musim celap. ¹³ Tulung ke sebebaik Zenas, ahli Taurat yak, ngau Apolos, alam pejalai sidak, isak ke sidak ndai kurang nama-nama. ¹⁴ Isak ke urang-urang kita belajar mulah kerja te baik, untuk nyucup ke bala te penting, isak idup sidak nang sampai ndai bebuah. ¹⁵ Salam re semua sidak te tamai aku dituk, padah ke salam aku ngau sidak te ngasih kami alam iman. Kasih karunia nyerta kitak semua.