Kewajiban urang tuai, urang mudak ngau hamba ¹ Tapi kitak, padah ke nama te sesuai ngau ajaran te sehat: ² Bala urang tuai bakas kalah idup sederhana, terhormat, bijaksana, sehat alam iman, alam kasih ngau ketekunan. ³ Piyak ugak bala inuk te tuai, sidak kalah idup sebagai urang beribadah, nang mempitnah, nang jadi hamba anggur, tapi lihai ngajar bala hal te baik ⁴ ngau upa yak sidak nidik bala ibuk biak untuk ngasih laki ngau anak-anak sidak , ⁵ isak bijaksana ngau suci, rajin ngatur rumah tangak, baik ati, taat ngau laki, isak firman Allah ndai dehujat urang. ⁶ Piyak ugak bala urang mudak, nasihati sidak, isak sidak nguasai dirik alam semua hal ⁷ ngau jadi ke dirik kitak teladan alam mulah te baik. Kitak kalah jujur ngau benar-benar alam pengajaran kitak, ⁸ sehat ngau ndai becela alam pemadah kitak, isak lawan jadi malu, empadai ndai sik hal-hal jaik te sidak tau sebar tentang kita. ⁹ Bala hamba kalah taat ngau tuan ya alam segala hal, bekenan ngau sidak, nang mantah, ¹⁰ nang curang, tapi kalah tulus ngau setia, isak sidak memuliaa ke ajaran Allah Juruselamat kita alam semua hal. ¹¹ Kasih karunia Allah te nyelamat ke semua mensia udah nyata. ¹² Ya nidik kita isak ke kita nudi kefasikan ngau pengining bala hal deniawi, ngau isak kita idup bijaksana, adil ngau beribadah alaam denia te pitok ¹³ ngau nunguk ke pengenapan pengarap kita te penuh ngau pengaga, ngau penyata kemulia Allah te maha besai ngau juruselamat kita Yesus Kristus, ¹⁴ te udah nyerah kedirik untuk kita, ngebibas ke kita ari semua te jaik, untuk ngudus ke umat bagi Ya, empu Ya, te rajin mulah te baik. ¹⁵ Padah ke semua tuk, nasihati ngau detupal ke benar bala urang ngau semua kewibawaan kitak. Nang sampai bisik urang te ngangap kitak ndai bereti.