Peringatan ngau urang kaya ¹ Urang kaya, jadi pituk kitak tau nyabak empadai sensara te bakal ningang kitak! ² Kekaya kitak dah buntau, pengau kitak demakai gegat! ³ Mas ngau pirak dah bekarat, karat yak mek jadi saksi teradap kitak, ngau makai dagin kitak upa api. KItak ngumpul ke reta ben'a pada ari kebaduk. ⁴ Sebenar udah tedinga ingan sidak menciak, empadai upah buruh te kitak tan. Sidak udah letih ngumpul asil uma kitak, tanguh sidak dah sampai ke pening Tuhan semesta alam. ⁵ Alam kemiwah kitak, kitak udah idup befuya-fuya de bumi, kitak dah muas ke ati kitak, upa rama ari nyemelih gawai. ⁶ Kitak udah ngukum, dah munuh urang te benar, ngau sidak ndai dapat ngelawan kitak. ⁷ Bala menyadik, sabar lah kitak sampai ari penatai Tuhan! Petani sabar nunguk asil te berega re tanah sidak, sabar sampai udah turun ujan musim jatuk, ngua ujan musim bebunga. ⁸ Kitak sik mek kalah sabar, neguh ke ati, empadai penatai Tuhan dah damping! ⁹ Nang kitak ngerungut ngau sama nyalah ke pangan, isak kitak nang dukum. Empadaai Hakim dah bediri de mua lawang. ¹⁰ Bala menyadik tunak ke telaadan penisa ngau kesabar bala nabi te udah banai alam nama Tuhan. ¹¹ Kami madah ke sidak yak urang bahagia, sidak te tekun; kitak ninga penekun Ayub, kitak ketau nama te desiap ke Tuhan bagi ya, empadai Tuhan maha penyayang ngau penuh belas kasih. ¹² Tapi te terutama, bala menyadik, nang kitak besumpah demi surga, bumi, atau te bukai. Antik auk madah auk, antik ndai madah ndai, isak kitak nang kenak ukum. ¹³ Antik bisik urang dentara kitak te pedih, ya kalau bedoa, antik bisik urang dentara kitak te senang, ya kalah menyanyi! ¹⁴ Kalau bisik dentara kitak te pedih, baik ya ngumai urang jemaat te tuai, untuk bedoa ke ya, ngerupus ya ngau minyak alam nama Tuhan. ¹⁵ Doa te lahir re iman bakal nyemuh ke urang te pedih yak, ngau Tuhan bakal ngangkak ya; antik ya mulah dosa, dosa yak dampun. ¹⁶ Maka kitak kalah sama ngakuk dosa ngau pangan, sama bedoa ke pangan ugak isak kitak semuh. Doa urang benar , antik dedoa ke ngau yakin, besai kuasa. ¹⁷ Elia yak mensia biasa upa kita, ya bedoa bebenar isak nang turun ujan, ujan sik ndai turun selamak tiga taun enam bulan. ¹⁸ Lalu ya bedoa ugak, langit nurun ke ujan, ngau bumi ngeluara ke buah. ¹⁹ Bala menyadik, antik dentara kitak bisik te nyelimpanag re jalai te benar, udek bisik uraang te nyuruh ya bekalih ke jalai te baik, ²⁰ ketau ke, barangsapa te mulah urang bedosa bekalih re jalai ya te sesat, ya nyelamay ke jiwa urang yak re maut ngau nutup mayuh dosa.