Hawa nafsu, bekaban ngau denia ¹ Reni penatai sengkita ngau betangkap dentara kitak? Ndai mek re hawa nafsu te berumak lam tubuh? ² KItak ining ke utai tapi ndai mampu bulih, lalu kitak munuh, kitak iri, tapi kitak ndai ncapai tujuan kitak, lalu kitak bekelai, betangkap. Kitak ndai bulih nama-nama empadai kitak ndai bedoa. ³ Atau kitak bedoa tapi ndai bulih nama-nama, empadai kitak salah bedoa, te kitak pintak untuk muas ke hawa nafsu. ⁴ KItak bala urang te ndai setia! Ndai nama kitak ketau, antik bekaban ngau denia bererti bemunsuh ngau Allah? Jadi sapa te kak jadi kaban denia tuk, ya nyadi ke direk munsuh Allah. ⁵ Nang kitak nyangka kalau kitab suci ndai sik alasan banai miak: "Roh te detaruh Allah alam dirik kita, diningYa ngau kemuru!" ⁶ Tapi kasih karunia te danugerah ke ya ngau kita lebih besai re pada yak. Maka nyak Ya banai: "Allah nentang urang cungkak, tapi ngasih urang te rendah ati." ⁷ Maka, tunuk lah ngau Allah, ngau Ya ngelawan iblis, maka ya bakal rari re kitak! ⁸ Damping ngau Allah maka Ya bakal damping ngau kitak. Tahir ke jari kitak, urang bedusa! suci ke ati kitak, urang te becabang ati! ⁹ Sadar ke kemalangan dirik, beduka ngau meratap lah; ganti tawak kitak ngau ratap, pengaga ngau dukacita. ¹⁰ Renah ke dirik dadap Tuhan, ngau Ya bakal ningik ke kitak. ¹¹ Bala menyadik, nang kitak memfitnah pangan! Barangsapa te memfitnah lalu ngakim menyadik ya, mencela ukum ngau ngakim; antik kitak ngakim ukum, maka kitak bukai penunak ukum, tapi hakimnya. ¹² Cuma bisik surang pemulah ukum ngau akim, yak Ya te bekuasa nyelamat, ngau ngemenasa urang. Tapi kitak yak sapa, kak ngakim sesama pangan? ¹³ Jadi pito, kitak te banai: "Ari tuk atau pagi kami angkat ke kuta anu, nugau din setaun, sereta bulih untung", ¹⁴ sedang ke kitak ndai ketau nama te bakal tejadi pagi. Nama rete idup kitak? Idup kitak upa uap te kenak pedak sekejap lalu ayap. ¹⁵ Sebenar kitak kalah banai: "Antik Tuhan kak, kami kak mulah tuk yak." ¹⁶ Tapi kitak megah ke dirik alam cungkak kitak, semua kemegahan te piyak salah. ¹⁷ Jadi antik sikuk ketau tipa ya kalah bebuat baik, tapi ndai ngelaksana ke yak, ya bedusa.