Salam ¹ Ari Paulus, rasul Kristus Yesus penekak Allah untuk madah ke berita Injil tentang idup alam Kristus Yesus, ² salam ngau Timotius, anakku te kukasih: kasih karuniaa, rahmat ngau damai sejahtera ari Allah Apai ngau Yesus Kristus, Tuhan kita, nyerta mih. ³ Aku ngucap sukur ngau Allah, te kulayan ngau ati murni, upa te depulah akik ining ku. Aku kingat seruntik ke mih alam doa ngau pemuhun lawas malam. ⁴ Udek antik aku tekenang ke mih nyatuk ke aik mata, aku ining medak mih agik, isak penuh pengaga ati. ⁵ Empadai aku kingat ke iman mih te tulus ihklas, pertama-tama iman te idup ntang inik mih Lois, alam inai mih Eunike, te ku pecayak ugak bisik idup alam mih. ⁶ Nyak nyuruh ke ngingat ke mih untuk ngubar ke karunia Allah te bisik entang mih re penumpang jari aku katau mih. ⁷ Empadai Allah merik ngau kita bukai roh takut, tapi roh te nyuruh kuat, kasih ngau teratur (ketertiban). ⁸ Nang malu besaksi tentang Tuhan kita, nang malu ugak empadai aku suah dukum empadai nama Ya (Allah), tamai sisa lah mih bagi nama Ya ulih kekuatan Allah. ⁹ Ya mek te nyelamat ke kita, ngumai kita ngau pengumai kudus, bukai bedasar ke pempulah kita, tapi bedasar ke kasih ngau karunia Ya te dah deberik Ya ngau kita alam nama Yesus Kristus sapan mulai zaman, ¹⁰ ngau te pituk denyata ke ulih penatai Juruselamat kita Yesus Kristus, te ulih Injil udah matah ke kuasa maut, te ngenatai ke idup te ndai tau benasa. ¹¹ Untuk Injil tuk mek aku detetap ke sebagai pemadah berita, sebagai rasul ngau guru. ¹² Nyak mek nyuruh aku sisa semua tuk, tapi aku ndai malu; empadai aku ketau ngau sapa aku pecayak, ngau aku yakin bahwa Ya bekuasa meliara nama te dah depecayak Ya ngau aku sampai ari penatai Tuhan. ¹³ Pegai nama semua te dah mih dinga re aku, sebagai cuntuh ajaran te sehat, pulah semua yak alam iman ngau kasih alam Yesus Kristus. ¹⁴ Peliara reta te baik, te dah depecayak ke ngau kita, ulih Roh Kudus te nugau alam kita. ¹⁵ Mih ketau semua sidak re Asia mit, bebalik re aku; temasuk Figelus ngau Hermogenes. ¹⁶ Tuhan ngarunia ke rahmat Ya ngau keluarga Onesiforus te udah pisit nyegar ke ati aku. Ya ndai malu nyenguk aku alam penyara. ¹⁷ Rama de Roma, ya berusaha ngegak aku, ya udah betemu ngau aku. ¹⁸ Sekira Tuhan nunyuk ke rahmat ngau ya rama ari Ya. Betapa mayuh pelayanan te depulah ya de Efesus, mih lebih ketau repada aku.