Bedoa ngau bekerja ¹ Udah yak, u bala menyadik, bedoa untuk kami, isak firman Tuhan tau maju ngau demulia ke, upa te udah tejadi dentara kitak, ² isak kami lepas re bala pengacau ngau urang-urang jaik, empadai ndai semua urang bisik iman. ³ Tapi Tuhan yak setia. Ya nguat ke ati kitak ngau nyaga kitak ari te jaik. ⁴ Ngau kami pecayak alam Tuhan, nama te kami pesan ngau kitak, kitak pulah. ⁵ KIranya Tuhan tetap nunyuk ke ati kitak ngau kasih Allah ngau ketabahan Kristus. ⁶ Tapi kami bepesan ngau kitak, bala menyadik, alam nama Tuhan Yesus Kristus, isak kitak nyauh ke dirik re urang te ndai ngerja pekerjaan ngau te ndai nunak ajaran te udah kitak terimak re kami. ⁷ Empadai kitak kedirik dah ketau, tipa kitak kalah nunak teladan kami, empadai kami ndai lalai bekerja dentara kitak, ⁸ ngau ndai makai ruti urang percuma, tapi kami berusaha bejerih payah lawas malam, isak nang jadi beban sapa-sapa dentara kitak. ⁹ Bukai empadai kami ndai behak untuk yak, tapi kami kak nyadi ke dirik kami teladan bagi kitak, isak kitak tunak. ¹⁰ Empadai, rama kami nugau dentara kitak, kami udah madah ngau kitak: antik urang ndai kak bekerja, ya ndai tau makai. ¹¹ Kami madah tuk empadai kami ninga, bisik urang te idup ndai teratur ngau ndai kak bekerja, tapi sibuk ngau hal-hal te ndai beguna. ¹² Urang te upa yak kami padah ngau kami nasihat alam Tuhan Yesus Kristus, isak sidak tetap tenang ngerja ke pekerjaan sidak, ngau antik upa yak, makai pemakai dirik. ¹³ Udek kitak, bala menyadik, nang kitak jemu mulah nama te baik. ¹⁴ Antik ndai sik urang te kak ninga nama te kami padah alam surat tuk, kecelik ke ya, nang kitak begaul ngau ya, isak ya malu. ¹⁵ Tapi nang ngangap ya munsuh, tapi rara ya sebagai menyadik. ¹⁶ Ya, TUhan damaia sejahtera, ngarunia ke damai sejahtera Ya seruntik, alam semua hal, ngau kitak, Tuhan nyerta kitak semua. ¹⁷ Salam re aku, Paulus. Salam tuk kutulis ngau jari aku kedirik. Tuk mek kecelik alam setiap surat: upa tuk mek tulis aku. ¹⁸ Kasih karunia Yesus Kristus, Tuhan kita, nyerta kitak semua!