Peneraka sapan penatai Tuhan ¹ Tentang penatai Tuhan kita Yesus Kristus, ngau tekumpulnya kita ngau Ya, kami mintak ngau kitak bala menyadik, ² isak kitak nang gesak bingung ngau gelisah, baik ulih ilham roh, atau ulih pemadah, atau surat te depadah re kami, sulah-ulah ari Tuhan dah datai. ³ Nang sampai kitak ngayu ke dirik desesat ke urang ngau mayuh macam cara! empadai sapan ari yak, kalah datai dulau murtat, ngau kalah depadah dulau mensia neraka te kalah benasa, ⁴ yak mek lawan te ningik kedirik datau semua te detelah atau desemah sebagai Allah. Bahkan ya duduk de Bait Allah, kak madah ke direk sebagai Allah. ⁵ Ndai nama kitak kingat, hal yak dah pisit kupadah ngau kitak, rama aku gik nugau tamai kitak? ⁶ Udek pitok kitak ketau nama te ngetan ya, yak nyuruh ya kak madah ke direk nunguk waktu te detetap ke bagi ya. ⁷ Empadai secara resia, peneraka dah mulai kerja. Tapi pitok agik sik te ngetan. Antik te ngetan yak udah dulih, ⁸ rama yak mek, si peneraka baruk kak madah ke direk, tapi Tuhan Yesus kak munuh ya ngau penyuan mulut Ya, udek ngemusna ke ya antik ya datai agik. ⁹ Penatai si peneraka yak mek kerja sitan, deserta ngau mayuh pempulah ajaib, kecelik-kecelik ngau mujizat-mujizat pelsu, ¹⁰ ngau rupa-rupa tipu daya jahat teradap urang-urang te kalah benasa, empadai sidak ndai nerimak ngau ngasih kebenaran te tau nyelamat ke sidak. ¹¹ Nyak mek nyuruh Allah natai ke kesesatan ngau sidak, te nyebab ke sidak pecayak ngau kemulak, ¹² isak dukum semua urang te ndai pecayak ngau kebenaran, te tuju ngau kejahatan. ¹³ Tapi kami kalah ngucap sukur seruntik empadai kitak, bala amenyadik te dekasih Tuhan, empadai Allah re perubah dah milih kitak, untuk deselamat ke alam roh te ngudus ke kitak alam kebenaran te kitak pecayak. ¹⁴ Untuk yak mek Ya udah ngumai kitak ulih Injil te kami padah, isak kitak tau bulih kemuliaan Yesus Kristus, Tuhan kita. ¹⁵ Maka, bediri teguh, bepegai ngau ajaran-ajaran te kitak terimak re kami, baik lansung atau ngau surat. ¹⁶ Ya, Tuhan kita Yesus Kristus, ngau Allah Apai kita, alam kasih karunia Ya, dah ngasih kita, ngau te udah merik pengiburan abadi, ngau pengaraapan baik ngau kita, ¹⁷ Sekira ngibur ngau nguat ke ati kita, alam pekerjaan ngau anai te baik.