Salam ¹ Ari Paulus, Silwanus, Timotius ngau jemaat de Tesalonika alam Allah Apai kita ngau Tuhan kita Yesus Kristus. ² Kasih karunia ngau damai sejahtera re Allah Apai kita, ngau Tuhan Yesus Kristus nyereta kitak. ³ Kami kalah ngucap sukur seruntik ngau Allah empadai kitak, bala menyadik, patut mek upa yak, empadai iman kitak makin betamah, kasih kitak ngau pangan makin kuat dentara kitak, ⁴ nyak nyuruh alam jemaat-jemaat Allah kami ngepah ke kitak, empadai ketabahan ngau iman kitak, alam penisa ngau peninas, te kitak tat: ⁵ sutik bukti tentang pengakiman Allah te adil nar te madah ke kitak layak jadi warga kerajaan Allah, kitak pitok te sisa empadai kerajaan yak. ⁶ Empadai mimang adil bagi Allah untuk malas ke peninas ngau sidak te ninas kitak ⁷ ngau kak merik kelegaan ngau kitak te detinas, ngau kami ugak, rama waktu Tuhan Yesus ralam surga madah ke Direk, tamai bala malaiakat-malaikat Ya, alam kuasaYa, alam api te bedilah, ⁸ udek malas sidak te ndai ngelala Allah ngau ndai taat ke Injil Yesus, Tuhan kita. ⁹ Sidak yak bakal nerimak ukuman benasa sampai selamak, dejauh ke hadirat Tuhan ngau ari kemuliaan kekuatan Ya. ¹⁰ Antik Ya datai pada ari yak untuk demulia ke dentara urang-urang kudus Ya ngau untuk depuji semua urang te pecayak, empadai kesaksian te kami baik ngau kitak udah kitak pecayak. ¹¹ Maka kami beedoa untuk kitak seruntik, isak Allah kita ngangap kitak layak bagi kumai Ya ,ngau kekuatan Ya, ngelengkap ke penekak kitak, untuk mulah te baik, ngau ngelengkap ke semua pekerjaan iman kitak, ¹² nyak nyuruh nama Yesus tuhan kita demulia ke alam kitak, ngau kitak alam Ya, nunak ke kasih karunia Allah kita ngau Tuhan Yesus Kristus.