Salam ¹ Re Paulus, rasul Yesus Kristus menurut perintah Allah, Juruselamat ngau dasar pengarap kita, ² ngau Timotius, anakku te sah alam iman: kasih karunia, rahmat, ngau damai sejahtera re Allah Apai ngau Yesus Kristus, Tuhan kita, nyereta mih. ³ Rama aku kak ngelanyut ke pejalai ke welayah Makedonia, aku dah nesak mih, isak mih nugau de Efesus ngau nesihat ke urang-urang te depilih isak sidak ndai ngajar ke ajaran bukai ⁴ ataupun sibuk ngau engkana te ndai putus-putus, te ngasil ke masalah, bukai tertib idup te deberik Allah alam iman. ⁵ Tujuan nesihat yak kasih te timul re ati te suci, ati te merni, ngau iman te tulus ikhlas. ⁶ Tapi bisik urang te ndai datai ke tujuan yak, sesat ngau anai te sia-sia. ⁷ Sidak yak kak jadi pengajar ukum Taurat, tapi ndai paham anai sidak kedirik ngau pukuk-pukuk ke kak sidak padah. ⁸ Kita ketau ukum Taurat yak baik kalau tepat guna, ⁹ ngau insaf kalau ukum Taurat yak bukai untuk urang benar, tapi untuk sidak te neraka, lalim,fasik, ngau urang bedusa, urang denia, ndai beragama, te munuh apai inai, pemunuh, ¹⁰ bagi urang cabul, ncuri mensia, pemulak, urang makai sumpah, bala semua te betentang ngau pengajar te baik ¹¹ te bedasar ajaran Injil re Allah te mulia upa te dah depecayak ngau kitak. ¹² Aku besukur ngau Ya te nguat ke aku, Yak mek Yesus Kristus, Tuhan kita, empadai Ya ngangap aku setia, ngau pecayak ke pelayanan tuk ngau aku - ¹³ aku te subak urang te tugam mejah (menghujat), ngau urang te tugam nisa ngau ganas, tapi aku dekasih Ya, empadai semua tuk dah kupulah ngau ndai sik penemu (pengetahuan) yak mek (yaitu) deluar iman. ¹⁴ Malah kasih karunia Tuhan kita yak dah dekaruni ke ngau aku belimpar-limpar ngau iman ngau kasih alam Kristus Yesus. ¹⁵ Anai tuk benar, patut deterimak semua: "Kristus Yesus datai ke denia untuk nyelamat ke mensia bedusa," ngau dentara sidak, aku tuk mek te palin bedusa. ¹⁶ Tapi malah yak mek nyuruh aku dekasih, isak alam aku urang bedusa tuk, Yesus Kristus nunyuk ke penyabar Ya. Tuk mek aku jadi cuntuh sidak udek te pecayak ngau Ya ngau bulih idup te kekal. ¹⁷ Hurmat ngau kemuliaan sampai selamak-lamanya bagi Raja segala zaman, Allah kekal, ndai nampak, te esa! Amin. ¹⁸ Tugas tuk kuberik ngau mih, Timotius anakku, sesuai ngau nama te dah denubuat ke tentang mih, isak dekuat ke ulih nubuat yak mih bejuang ke pejuangan te baik ngau iman ngau ati nurani te merni. ¹⁹ Bisik kedak sidah dah ngai nerimak ati nurani te merni, nyak nyuruh iman sidak kandas, ²⁰ sidak yak mek Himeneus ngau Aleksander, te udah kuserah ngau Iblis, isak sidak jerak mejah (menghujat).