¹ Jadi, empadai Kristus udah sisa tubuh, kitak kalah ugak ngelengkap ke dirik ngau pemikir te piyak,- empadadai sapa te dah sisa tubuh, ya baduk mulah dosa-, ² isak ke waktu te agik tesisak, nang kitaka nguna ke ngau te ndai sik reti (keinginan daging), tapi nunak penekak Allah. ³ Empadai dah mayuh waktu kitak guna ke untuk nunak penekak urang te ndai ngelala Allah. Kitak dah idup menurut hawa nafsu, pengining, kemabukan, pesta pora, minum ngau berhala. ⁴ Maka sidak iran, kitak ndai tamai sidak ngerja te ndai senunuh, nyak nyuruh sidak memfitnah kitak. ⁵ Tapi sidak kalah merik petangung jawab ngau Ya (Allah) te dah siap ngakim urang idup ngau urang mati. ⁶ Nyak mek nyuruh injil depadah ke ugak ngau urang2 mati, isak sidak sama upa mensia, dehakim secara badani, tapi ulih roh tau idup nunak penekak Allah. ⁷ Pengabis (kesudahan) nama semua dah damping. Maka kuasai dirik, tenang, isak kitak tau bedoa. ⁸ Tapi te terutama: kasih ke bala pangan benar-benar, empadai kasih menutupi mayuh nar dosa. ⁹ Berik ke tumpangan ngau pangan ndai sah ngau ngerungut. ¹⁰ Layan pangan sesuai ngau karunia de perulih re kasih Allah. ¹¹ Antik bisik te banai, baik kalau ya banai sebagai urang te nyampai ke firman Allah; antik ya ngelayan, baik ya kekuatan re anugerah Allah, isak Allah demulia ke alam semua utai empadai Yesus Kristus. Ya yak te empu kemuliaan ngau kuasa sampai selamak-lamaknya! Amin. ¹² menyadik te kukasih, nang kitak iran bisik dilah api penisa te datai ngau kitak sebagai ujian, sulah-ulah bisik utai te besai tejadi ngau kitak. ¹³ Tapi kitak kalah gaga kebak, sesuai ngau jatah te kitak ulih re penisa Kristus, isak kitak tau ugak gaga rama ari Ya nyata ke kemulia Ya. ¹⁴ Kitak kalah gaga, kalau denista empadai nama Kristus, empadai Roh kemuliaan, Roh Allah bisik ntang kitak. ¹⁵ Nang sampai dentara kitak bisik te sisa empadai munuh, ncuri, pengacau. ¹⁶ Tapi antik kitaka sisa sebagai urang Kristen, maka ndai sah malu, melain ke ya memulia ke Allah alam nama Kristus yak. ¹⁷ Tuk dah senta pengakiman demulai, ngau rumah Allah te peruba dehakim. Antik pengakiman yak demulai re kita, tipa kejadi sidak te ndai pecayak ke Injil Allah? ¹⁸ Antik urang benar aampir-ampir ndai selamat, tipa kejadi ngau urang fasik ngau urang bedusa? ¹⁹ Nyak nyuruh, lebih baik sidak te kalah sisa empadai penekak Allah, nyerah ke jiwa sidak ngau cara mulah te baik seruntik, ngau pencipta te setia.