Idup sengkalik laki bini ¹ Upa yak ugak kitak bala bini, kalah tunuk ngau laki, isak antik bisik dentara sidak te ndai taat ngau firman, sidak ndai sik anai, demenang ke ulih pempulah bini, ² antik sidak medak tipa murni saleh idup bini sidak. ³ Periasan kitak nang secara lahiriah, upa ngepit buk, ngau mas, ngau pengau te baik, ⁴ tapi periasan kitak kalah secara batiniah, te ndai kenak pedak, te ndai tau benasa, berasal re roh te lemah lembut, ngau tenteram, palin berega de mata Allah. ⁵ Empadai upa yak mek bala inuk kudus jaman subak belagak (dandan), bala inuk te naruh arapan ngau Allah; sidak tunuk ngau laki, ⁶ upa Sara taat ngau Abraham, ngau ngumai laki ya Tuan. Kitak yak anak-anak ya, antik kitak mulah te baik ngau ndai takut gap (ancaman). ⁷ Piyak ugak kitak bala laki, idup bijaksana ngau bini kitak, sebagai kaum te lebih lemah! Hurmat ke sidak sebagai kaban pewaris kasihk karunia: idup, isak doa kitak ndai tehalang. ⁸ Pengabis, kitak kalah seia sekata, seperasai, ngasih pangan, penyayang, ngau rendah ati, ⁹ nang malas pengenyaik ngau jaik, caci maki ngau caci maki, sempalik yak, kitak kalah merkat urang, untuk yak mek kitak dekumai, isak bulih berkat. Empadai: ¹⁰ "Sapa te sayang ngau idup, ngau kak medak ari-ari baik, ya kalah nyaga dilah ya teradap te jaik, ngau mulut ya teradap anai-anai te nipu. ¹¹ Ya kalah jauh re te jaik ngau kalah mulah te baik, ya kalah ngegak damai, berusaha bulih e. ¹² Empadai mata Tuhan tetuju ngau urang-urang benar, pening Ya ngau pemuhun orang mintak tulung, tapi mua Tuhan nentang urang-urang te pempulah jaik." ¹³ Sapa te kak jaik ngau kitak, antik kitak rajin mulah te baik? ¹⁴ Sekalikpun kitak sisa empadai kebenar, kitak bakal bahagia. Maka kitak ndai sah takut, nama te ketakut sidak, nang gentar. ¹⁵ Tapi kudus ke Kristus alam ati kitak sebagai Tuhan! Ngau kitak kalah siap seruntik untuk merik petangung jawab ngau sidak te mintak, tentang pengarapan te bisik ntang kitak, tapi kalah ngau hurmat ngau lemah lembut, ¹⁶ ngau ati nurani te murni ugak, isak sidah te empitnah kitak jadi malu, medak pengidup kitak te saleh alam Kristus. ¹⁷ Lebih baik sisa empadai mulah te baik, antik yak penekak Allah, repada sisa mulah te jaik. ¹⁸ Empadai Yesus mati sekalik untuk semua dusa kita, Ya te benar untuk mensia te ndai benar, isak Ya ngemaik kita ngau Allah; te udah debunuh alam keadaan Ya sebagai mensia, tapi udah debangkit menurut Roh, ¹⁹ alam Roh yak ugak mek Ya angkat madah ke Injil ngaau roh-roh te alam penyara, ²⁰ ngau roh sidak te subak zaman Nuh ndai taat ngau Allah, rama Allah sabar nunguk Nuh nyiap ke perau, te bisik sikit, cuma sidak lapan te deselamat ke re aik bah. ²¹ Kitak te deselamat ke ugak ngau Baptisan-bukai untuk mersih ke najis jasmani, tapi muhun ke ati nurani te baik ngau Allah-empadai pemangkit Yesus Kristus, ²² te duduk desepiak kanan Allah, se udah Ya naik ke surga, seudah bala malaikat, kuasa ngau penguat detakluk ke ngau Ya.