1 Kalpasan a naibaga ni Jesus dagitoy a sasao, rimuar isuna agraman dagiti adalanna iti sabali a bangir ti karayan Kidron nga ayan ti maysa a hardin nga simrekanda kadwana dagiti adalanna. 2 Ita ni Judas, a manglipot kenkuana, ammona met ti lugar, ta masansan a pappapananda Jesus ken dagiti adalanna. 3 Kalpasanna, ni Judas nangidaulo iti bunggoy dagiti soldado ken dagiti sumagmamano nga opisyal manipud kadagiti panguloen a papadi ken dagiti Fariseo, napanda idiay nga addaan iti silaw, tubong a pagsilawan, ken ar-armas. 4 Kalpasanna ammo ni Jesus, amin a banbanag a mapasamak kenkuana, sinabatna ida ken nagsaludsod kadakuada, "Siasino ti birbirukenyo?" 5 Simmungbatda kenkuana "Ni Jesus a taga-Nasaret." Imbaga ni Jesus kadakuada, "Siak." Ni Judas a nangliput kenkuana ket agtaktakder pay a kadua dagiti soldado. 6 Isu nga idi naibagana kadakuada a, "Siak," napasanudda ket natuangda iti daga. 7 Kalpasanna, nagdamag manen isuna kadakuada, "Siasino aya ti birbirukenyo?" Imbagada manen, "Ni Jesus a taga-Nasaret." 8 Simmungbat ni Jesus, "Imbagakon kadakayo a Siak isuna; isu a no siak ti birbirukenyo, ipalubosyo a pumanaw dagitoy a tattao." 9 Daytoy ket tapno maipatungpal ti sao nga imbagana: "Kadagiti amin nga intedmo kaniak, awan uray maysa a napukawko." 10 Kalpasanna ni Simon Pedro nga adda idi kampilanna, inasutna daytoy ken tinagbatna ti adipen ti kangatoan a padi ket naisina ti makinkannawan a lapayagna. Ita ti nagan ti adipen ket Malco. 11 Kinuna ni Jesus kenni Pedro, "Isublim dayta kampilanmo iti kalubna. Ti kopa nga inted kaniak ti Ama, saanko aya nga inumen daytoy?" 12 Isu a ti bunggoy dagiti soldado ken ti kapitan, ken dagiti opisial dagiti Judio, tinilewda ni Jesus ket ginalutanda isuna. 13 Inyapanda nga umuna kenni Anas, ta isu ti katugangan ni Caifas, isuna ti kangatoan a padi iti dayta a tawen. 14 Ita ni Caifas ti nangted ti pammagbaga kadagiti Judio a nasaysayaat no maysa a tao ti masapul a matay para kadagiti tattao. 15 Sinurot ni Simon Pedro ni Jesus, ket kasta met ti sabali nga adalan. Ita dayta nga adalan ket mabigbig ti kangatoan a padi, ket simrek isuna a kakuyog ni Jesus iti pangukoman ti kangatoan a padi; 16 ngem ni Pedro ket agtaktakder iti ruar ti ridaw. kasta met ti sabali nga adalan, nga am-ammo ti kangatoan a padi, rimmuar ket nakisarita iti adipen nga agbanbantay iti ridaw ket pinaunegna ni Pedro. 17 Ket imbaga ti adipen a babai nga agbanbantay iti ridaw kenni Pedro, "Saan aya a maysaka met kadagiti adalan daytoy a tao?" Kinunana "Saan a siak." 18 Ita agtaktakder dagiti adipen ken opisial sadiay; nangpasgedda iti apuy kadagti uging, ta nalam-ek, ket pabaraenda dagiti bagbagida. Adda met idi ni Pedro a nakatakder ti asidegda nga agpabpabara ti bagina.. 19 Kalpasanna nagsaludsod ti kangatoan a padi kenni Jesus maipapan kadagiti adalanna ken kadagiti insursurona. 20 Simmungbat ni Jesus kenkuana, "Nagsaoak a nawaya iti lubong; Nagisuroak a kanayon kadagiti sinagoga ken iti templo a pagtataripnongan dagiti amin a Judio. Awan ti imbagak iti nalimed. 21 Apay nga agsaludsodkayo kaniak? Damagenyo kadagiti nagdengngeg kaniak maipapan kadagiti imbagak. Ammo dagitoy a tattao dagiti banbanag nga imbagak." 22 Kalpasan a naibaga ni Jesus daytoy, maysa kadagiti opisial nga agtaktakder ti nangtungpa kenni Jesus ket imbagana, "Kasta kadi no kasano ti panangsungbatmo iti kangatoan a padi?" 23 Simmungbat ni Jesus kenkuana, "No adda ti imbagak a saan a nasayaat, paneknekam a dakes. No pay kasta, no simmungbatak a nasayaat, apay a tungpaennak?" 24 Inpayapan ngarud ni Anas ni Jesus a sirereppet kenni Caifas a kangatoan a padi. 25 Ita agtaktakder ni Simon Pedro nga agpabpabara. Ket kinuna dagiti tattao kenkuana, "Saan aya a maysaka met kadagiti adalanna?" Inlibakna daytoy ket kinunana, "Saan." 26 Maysa kadagiti adipen ti kangatoan a padi, a kabagian ti lalaki nga piningas ni Pedro ti lapayagna, ti nagkuna, "Saan aya a sika ti nakitak a kaduana idiay hardin? 27 Naglibak manen ni Pedro, ket dagus a nagtaraok ti kawitan. 28 Kalpasanna impanda ni Jesus manipud kenni Caifas nga agturong idiay hedkuarter ti gobierno. Nasapa unay ti bigat, ket saanda a simrek iti hedkuarter ti gobierno tapno saanda a matulawan ken tapno makapanganda iti Fiesta. 29 Isu a rimmuar ni Pilato kadakuada ket imbagana, "Ania ti pangidarumanyo maibusor iti daytoy a tao? 30 Simmungbatda ket kunada kenkuana, "No daytoy a tao ket saan nga agar-aramid iti dakes, saanmi koman nga idatag kenka." 31 Imbaga ngarud ni Pilato kadakuada, "Alaenyo isuna, ket ukomenyo isuna a maiyannurot iti paglinteganyo." Kinuna dagiti Judio kenkuana, "Saan a nainkalintegan kadakami ti mangipataw a mapapatay ti siasinoman." 32 Imbagada daytoy tapno maipatungpal ti sao ni Jesus, ti sao a naibagana a naisaad no ania a kita ti patay a pakatayanna. 33 Immuneg manen ni Pilato iti hedkuarter ti gobierno ken inayabanna ni Jesus ket kinunana kenkuana, "Sika kadi ti ari dagiti Judio?" 34 Simmungbat ni Jesus, " nagsao ka kadi manipud iti bukodmo wenno adda sabali a nagsao kenka maipapan kaniak? 35 Simmungbat ni Pilato, "Saanak a Judio, saan kadi? Dagiti kailiam ken dagiti panguloen a papadi ti nangidatag kenka kaniak, ania aya ti inaramidmo?" 36 Simmungbat ni Jesus, "Ti pagariak ket saan nga iti daytoy a lubong. No ti pagariak ket paset daytoy a lubong, ngarud makigubat koman dagiti adipenko tapno saanak a maidatag kadagiti Judio. Ngem ita ti pagariak ket saan nga aggapu ditoy." 37 Imbaga ngarud ni Pilato kenkuana, "No kasta ngarud maysaka nga ari?" Simmungbat ni Jesus "Nakunamon nga maysaak nga ari. Ta iti daytoy a panggep naiyanakak, ken iti daytoy a panggep immayak iti daytoy a lubong tapno paneknekak iti kinapudno. Tunggal maysa a maibilang iti kinapudno ket dumngegda iti timekko." 38 Kinuna ni Pilato kenkuana, "Ania ti kinapudno?" Idi naibagana daytoy, rimmuar manen isuna a napan kadagiti Judio ket kinunana kadakuada, "Awan masarakak a basol iti daytoy a tao. 39 Adda ti kaugallianyo a masapul a mangwayawayaak iti maysa a tao kada Fiesta. Isunga kayatyo kadi a wayawayaak kadakayo ti Ari dagiti Judio?" 40 Ngem impukkawda ket imbagada, "Saan a daytoy a tao, ngem ni Barabas." Ita ni Barabas ket maysa nga tulisan.