¹ Kinuna ni Jesus dagitoy a banbanag, kalpasanna ket intangadna dagiti matana iti langit ket kinunana, "Ama, dimtengen ti oras; padayawam toy Anak mo tapno ti Anak padayawannaka-- ² a kas iti panangtedmo kenkuana ti turay kadagiti amin a lasag tapno mangted isuna ti biag nga agnanayon kadagiti amin nga intedmo kenkuana. ³ Daytoy ti biag nga agnanayon: Nga am-ammodaka, ti maymaysa a pudno a Dios, ken ti imbaonmo, ni Jesu-Kristo. ⁴ Indaydayawka ditoy daga, nalpaskon ti trabaho nga intedmo kaniak nga aramiden. ⁵ Ita, Ama, padayawannak agraman ti bagim iti dayag nga adda kaniak sakbay a naparsua ti lubong. ⁶ Impakaammok ti naganmo kadagiti tattao nga intedmo kaniak manipud iti lubong. Kukuam ida; ket intedmo ida kaniak, ket tinungpalda ti saom. ⁷ Ita ammodan nga amin nga inted mo kaniak ket naggapu kenka, ⁸ ta intedko kadakuada ti amin a sasao nga intedmo kaniak. Inawatda dagitoy ket pudno nga ammoda a naggapuak kenka, ket namatida nga imbaonnak . ⁹ Agkararagak para kadakuada , saanko nga ikararag ti lubong, no diket kadagiti intedmo kaniak, ta kukuam ida. ¹⁰ Amin a banbanag a kukuak ket kukuam, ken amin a banbanag a kukuam ket kukuak; ket maidaydayawak kadakuada. ¹¹ Awanakon iti lubong, ngem dagitoy a tattao addada iti lubong, ket umayakon kenka. Nasantoan nga Ama, pagtalinaedem ida iti naganmo nga intedmo kaniak tapno agmaymaysada, a kas kadata a maymaysa. ¹² Bayat iti kaaddaak kadakuada, sinalaknibak ida babaen iti naganmo, nga intedmo kaniak; Binantayak ida, ket awan kadakuada iti uray maysa a nadadael, malaksid ti anak iti pannakadadael, tapno ti kasta matungpal dagiti nasantoan a sursurat. ¹³ Itan umayakon kenka; ngem ibagbagak dagitoy a banbanag iti lubong tapno nan-anay ti ragsakko kadakuada. ¹⁴ Intedko kadakuada ti saom; ket ginura ida ti lubong agsipud ta saanda a taga lubong, a kas kaniak a saan a taga lubong. ¹⁵ Saanko nga dawaten kenka a masapul nga alaem ida manipud ditoy lubong ngem tapno salaknibam ida manipud iti managdakdakes. ¹⁶ Saanda a taga lubong a kas kaniak a saan a taga lubong. ¹⁷ Ilasinmo ida babaen iti kinapudno, ta ti saom ket kinapudno. ¹⁸ Kas imbaonnak iti lubong, isunga imbaonko ida iti lubong. ¹⁹ Maipaay iti pagimbaganda indatonko ti bagik kenka tapno maidatonda met dagiti bagbagida iti kinapudno. ²⁰ Saanko laeng nga ikarkararag dagitoy, ngem uray pay dagiti asinoman a mamati kaniak babaen iti saoda, ²¹ tapno mabalinda amin iti agmaymaysa, a kas kenka, Ama, addaka kaniak, ket addaak kenka. Sapay koma ta makikaysadamet kadata tapno mamati ti lubong nga imbaonnak. ²² Ti dayag nga intedmo kaniak--intedko kadakuada, tapno kasta agmaymaysada, a kas met kadata a maymaysa. ²³ Addaak kadakuada, ken addaka kaniak, tapno agbalinda a naan-anay iti panagmaymaysa; iti kasta maammoan ti lubong nga imbaonnak, ken inayatmo ida, a kas iti panangayatmo kaniak. ²⁴ Ama, kayatko a kaduak dagiti intedmo kanyak ket addada koma kanyak no sadino ti ayanko, tapno makitada ti dayagko, ti dayag nga intedmo kaniak gapu ta inayatnak manipud pay idi sakbay iti pannakabangon ti lubong. ²⁵ Nalinteg nga Ama, saannaka nga am-ammo ti lubong, ngem am-ammoka; ken ammo dagitoy nga imbaonnak. ²⁶ Impakaammok ti naganmo kadakuada, ket ipakaammok daytoy tapno ti ayat a panangayatmo kaniak ket maadda koma kadakuada, ken addaakto met kadakuada."