¹ Siak ti pudno a puon, ken ti Amak ti mangpadpadakkel iti puon. ² Alaenna nga iyadayo ti tunggal sanga nga adda kaniak a saan nga agbunga, ken dalusanna ti tunggal sanga nga agbungbunga tapno ad-adu pay ti ibungana. ³ Nadalusankayon gapu iti mensahe nga imbagak kadakayo. ⁴ Agtalinaedkayo kaniak, ken kastaak met kadakayo. Kas iti sanga a saan nga agbunga iti bukodna, malaksid no agtalinaed iti puon, kasta met kadakayo, malaksid no agtalinaedkayo kaniak. ⁵ Siak ti puon; dakayo dagiti sanga. Siasinoman nga agtalinaed kaniak ket kastaak met kenkuana, isu iti agbunga iti adu, ta no awanak, awan ti maaramidanyo. ⁶ No siasinoman ti saan nga agtalinaed kaniak, maibelleng isuna a kas iti sanga ket magango; ket urnungenda dagiti sanga ket ipuruakda iti apuy ket mapuoranda. ⁷ No agtalinaedkayo kaniak, ken agtalinaed kadakayo, dagiti sasaok, dawatenyo ti aniaman a kayatyo ket maitedto kadakayo. ⁸ Maidaydayaw ti Amak iti daytoy, gapu ta adu ti bungayo ket iti kasta paneknekanyo a dakayo dagiti adalak. ⁹ Kas iti panagayat kaniak ti Ama, kastamet ti panagayatko kadakayo. Agtalinaedkayo iti ayatko. ¹⁰ No tungpalenyo dagiti bilinko, agtalinaedkayto iti ayatko a kas ti panangtungpalko kadagiti bilin ni Amak ket nagtalinaedak iti ayatna. ¹¹ Sinaritak dagitoy a banbanag kadakayo tapno ti ragsakko ket maadda kadakayo ken tapno ti rag-oyo ket agbalin a naan-anay. ¹² Daytoy ti bilinko, a masapul nga ayatenyo ti tunggal maysa a kas panagayatko kadakayo. ¹³ Awanen ti ayat a dakdakel pay ngem iti daytoy, a rumbeng nga ipaayna ti biagna para kadagiti gagayyemna. ¹⁴ Dakayo dagiti gagayyemko no aramidenyo dagiti banbanag nga ibilinko kadakayo. ¹⁵ Saankayon nga awagan nga adipen, ta saan nga ammo ti adipen no ania ti ar-aramiden iti amona. Inawagankayon a gagayyem, ta impakaammok kadakayo dagiti amin a banbanag a nangngegak manipud iti Amak. ¹⁶ Saan a dakayo ti nangpili kaniak, no di ket siak ti nangpili kadakayo ket dinutokankayo tapno mapankayo ket agbungakayo, ken tapno agtalinaed iti bungayo. Daytoy ket tapno aniaman a dawatenyo iti Ama iti naganko, itednanto kadakayo. ¹⁷ Imbilinko dagitoy a banbanag kadakayo, tapno ayatenyo ti tunggal maysa. ¹⁸ No guraennakayo ti lubong, ammoyo a ginuranak daytoy sakbay a ginuradakayo. ¹⁹ No addakayo ti lubong, ayatennakayo ti lubong a kas bukodna; ngem gapu ta saankayo a para iti lubong ken gapu ta pinilikayo manipud ti lubong, daytoy ti rason a guraennakayo ti lubong. ²⁰ Laglagipenyo ti sao nga imbagak kadakayo, 'Ti adipen ket saan a dakdakkel ngem ti amona.' No idadanesdak, idadanes dakayonto met; no tinungpalda ti saok, tungpalendanto met ti saoyo. ²¹ Aramidendanto amin dagitoy a banbanag kadakayo gapu iti naganko, gapu ta saanda nga am-ammo daydiay nangibaon kaniak. ²² No saanak nga immay ken nagsao kadakuada, saanda koma a naaddaan ti basol; ngem ita awan ti pambarda para kadagiti basolda. ²³ Siasinoman a gumura kaniak ket guraenna met iti Amak. ²⁴ No saanko nga inaramid dagiti trabaho nga awan pay ti siasinoman a nakaaramid kadagitoy, saanda koma a naaddaan ti basol; ngem ita nakitada ket guraendakami ken ni Amak. ²⁵ Dagitoy ket mapaspasamak tapno maipatungpal dayta a sao a naisurat kadagiti lintegda: 'Ginuradak nga awan gapuna.' ²⁶ No umayto ti Mangliwliwa, nga isu ti ibaonko kadakayo manipud iti Ama, dayta ket, ti Espiritu ti kinapudno, a naggapu manipud iti Ama, isuna ti mangpaneknek maipapan kaniak. ²⁷ Mangpaneknekkayo met gapu ta nakadkaduadak manipud pay idi damo.