¹ "Saanyo nga itulok a mariribukan dagiti pusoyo. Mamatikayo iti Dios; mamatikayo met kaniak. ² Idiay balay ni Amak ket adu dagiti lugar a pagianan; no saan, imbagak koma kadakayo, ta apanko isagana ti lugar nga maipaay kadakayo. ³ No mapanak ket mangisaganaak iti lugar a maipaay kadakayo, umayakto manen ket awatenkayto tapno iti kasta sadinoman ti ayanko addakayo met koma. ⁴ Ammoyo ti dalan no sadino iti papanak." ⁵ Kinuna ni Tomas ken ni Jesus, "Apo, saanmi nga ammo no sadino iti papanam; kasanomi a maammoan ti dalan?" ⁶ Kinuna ni Jesus kenkuana, "Siak ti dalan, ti pudno, ken ti biag; awan iti makaapan iti Ama malaksid no babaen kaniak. ⁷ No am-ammodakon, am-ammoyo metten ti Ama; manipud ita am-ammoyon isuna ken nakitayon isuna." ⁸ Kinuna ni Felipe ken ni Jesus, "Apo, Ipakitam kadakami ti Ama, ket umdasen dayta para kadakami." ⁹ Kinuna ni Jesus kenkuana, "Nagtalinaeddak kadakayo iti nabayag, ket saandak pay laeng nga am-ammo, Felipe? Siasinoman a nakakita kaniak nakitana metten ti Ama; kasanom nga ibaga, 'Ipakitam ti Ama kadakami'? ¹⁰ Saankayo kadi a mamati nga addaak iti Ama, ken ti Ama ket adda kaniak? Dagiti sasao nga ibagbagak kadakayo ket diak sao-en manipud iti bukodko a pannakabalin, no diket ti Ama nga agtataeng kaniak ar-aramidenna dagiti trabahona. ¹¹ Mamatikayo kaniak, nga addaak iti Ama, ket ti Ama adda kaniak; wenno mamatikayo kaniak gapu kadagiti aramidko. ¹² Pudno, pudno, ibagak kadakayo, dagiti mamati kaniak, dagiti aramid nga ar-aramidek ket aramidennanto dagiti dakdakkel ngem dagitoy agsipud ta mapanak iti Ama. ¹³ Aniaman dagiti dawatenyo iti naganko, aramidekto daytoy tapno iti kasta maitag-ayto koma ti Ama iti Anak. ¹⁴ No dumawatkayo iti aniaman a banag iti naganko, dayta ket aramidekto. ¹⁵ No ayatendak, tungpalenyonto dagiti bilbilinko. ¹⁶ Ken agkararagakto iti Ama, ket ikkannakayonto iti maysa pay a Mangliwliwa tapno iti kasta addanto isuna kadakayo iti agnanayon, ¹⁷ ti Espiritu iti kinapudno. Saanto nga awaten ti lubong isuna gapu ta saan a makita isuna wenno am-ammo isuna. Ngem am-ammoyo isuna, ta makipagnaed kadakayo ken addanto kadakayo. ¹⁸ Saan kayonto a panawan nga agmaymaysa; agsubliakto kadakayo. ¹⁹ Iti apagbiit laeng a tiempo ket ti lubong saannakton a makita, ngem dakayo makitadakto. Gapu ta agbiagak, isunga agbiagkayonto met. ²⁰ Iti dayta nga aldaw maammoanyonto nga addaak ken ni Amak, ken addakayo kaniak, ken addaak kadakayo. ²¹ Siasinoman nga adda kenkuana dagiti bilbilinko ken mangtungpal kadagitoy isu ti mangay-ayat kaniak; ken ti agay-ayat kaniak,ayatento ni Amak, ken ayatekto met isuna ken iparangarangkonto kenkuana ti bagik." ²² Judas (saan a ni Iscariote) kinunana ken ni Jesus, "Apo, apay nga ipakitam ti bagim kadakami ken saan nga iti lubong?' ²³ Simmungbat ni Jesus ket kinunana kenkuana, "No siasinoman nga agay-ayat kaniak, tungpalenanto ti saok. Ayatento ni Amak isuna, ken mapankaminto kenkuana ken aramidenminto ti pagnaedan a lugar a kaduatayo isuna. ²⁴ Siasinoman a saan nga agayat kaniak, saanna a tungpalen dagiti sasaok. Ti sao a mangngeganyo ket saanko a kukua ngem iti Ama a nangibaon kaniak. ²⁵ Inbagak kadakayo dagitoy a banbanag, kabayatan nga agtaltalinaedak kadakayo. ²⁶ Nupay kasta, ti Mangliliwa, ti Santo Espiritu, nga isu iti ipatuludto ti Ama iti naganko, nga agisuronto kadakayo kadagiti amin a banbanag ken mangiyegto iti pakalaglagipanyo amin nga imbagak kadakayo. ²⁷ Kappia iti ibatik kadakayo; itedko ti kappiak kadakayo. Saanko nga ited daytoy kas iti it-ited ti lubong. Saanyo nga itulok nga mariribukan dagiti pusoyo, ken saanyo nga itulok iti agbuteng. ²⁸ Nangngegyo no kasano iti panangibagak kadakayo, 'Umadayoak, ket agsubliakto kadakayo.' No inayatdak, nagrag-okayo koma gapu ta mapanakon iti Ama, ta ti Ama ket dakdakkel ngem Siak. ²⁹ Tatta imbagakon kadakayo sakbay a mapasamak tapno iti kasta, inton mapasamak daytoy, mamatikayonto. ³⁰ Diak makapagbayagen nga makipagsao ti adu kadakayo, ta umayen ti agturay iti daytoy a lubong. Awan ti pannakablinna kanyak, ³¹ ngem tapno a maammoan ti lubong nga ay-ayatek iti Ama, masapul nga agtungpalak iti Ama kas imbaonnak. Tumakder tayon ket pumanawtayo ditoy.