¹ Mana hatunga zuwo lyenyi; hasonga nguji shimbiali kukatuka mumawa. ² Hashiha yimuna jenyi, hachinga vinyu yenyi hasa mesa yenyi. ³ Hatuma tuvumbi twenyi amapwo; kanasanika ha chihela cha hyana a limbo, ⁴ " iya chizuzuke? Eze anjile muno!" Yoze keshi nyi nyongo lipema yahanjika. ⁵ " Tweya, lyako kulya chami, nyi kunwa vinyu yino nachinga. ⁶ Hichikenu yilinga ya yizuzuke nukatwame nyi mwono; nukende mujila ya malinjekela. ⁷ Mweswe mafumba mukwa kulenya mamukolesa sonyi, nyi mweswe makatenukina mukwa ungulungulu malikokela kupiya. ⁸ Kanda ukanjisa mukwa kulenya, mwokomwoko makuvwila kole; kanjisa mukwa mana, mba makuzanga. ⁹ Hana kuli mukwa mana, nyi yiye maliwezela mana; longesa mukwa ululi, nyi yiye mali wezela longeso. ¹⁰ Woma wa Yehova we wuputukilo wa mana, nyi kunyingika mwe musandu chapwa malinjekela. ¹¹ Mumu kapalikila muli yami matangwa je makwoka, nyi myaka ya mwono we muyili kaliweza kuli yenu. ¹² Nyiwuli mukwa mana, mana je makuwahisa yena mwene, alyose nyi mulenya, muchimbata yena mwene." ¹³ Pwo chihepuke kakupwa nyi zungo; kapwa chizuzuke kanyingine nyi chimwe. ¹⁴ Kakutwama ku chikolo cha zuwo lyenyi, ha chitwamo cha mu yihela ja limbo. ¹⁵ Kakusanyika waze anapalika mumajila kuli atu akwenda mu majila jo. ¹⁶ " Ngwenyi chizuzuke mweswawo anjila muno," kanambe kuli waze keshi nyi malinjekela. ¹⁷ "Meya akwiya ayema, nyi mbolo ya kulya kutenga cho kupema." ¹⁸ Alyoze kanyingikine ngwenyi afu aliko, nyi ngeji jenyi mwe mu shiole ali.