¹ Yishima ya Solomone. Mwana wa mana kakuneha kuwahilila kuli tato alyoze mwana chihepuke kakuneha chinyengo kuli naye. ² Upite wakuwanyina mu ungulungulu ushi kufumbuka, alyoze ululi wakupulula ku kufwa. ³ Yehova keshi kwecha mukwa ululi kufwa nyi zala, alyoze kakuchinda solo lya chingulungulu. ⁴ Kwoko lya chilenda lyakupwisa mutu uswale, alyoze kwoko lya chikanyame lyakuneha upite. ⁵ Mwana wa mana kakukungika ha shimbu ya mbuto, alyoze chasonyi kuli yoze wa kupomba ha shimbu ya kucha. ⁶ Kisu lya kuli Zambi lyakupwa hali yoze mukwa ululi. alyoze kanwa lya chingulungulu kulyakufuka luvundo. ⁷ Mukwa ululi kakuneha uwahililo kuli waze akumwiwuluka, alyoze jina lya chingulungulu kumulikapola. ⁸ Yoze uli nyi mbunge ya mana matambula shimbi alyoze chihepuke mukwa kumbambula kumaka limbuka. ⁹ Yoze wakwenda nyi kutuwika cha mbunge kakwenda mukujikiza, alyoze mukwa kuhengesa maliji jenyi, kumakamunyingika. ¹⁰ Yoze matenya liso kakuneha chinyengo, alyoze chihepuke mukwa kulimbambwila makalyenyeka. ¹¹ Kanwa lya mukwa ululi kulyapwa fuji lya meya a mwono, alyoze kanwa lya chingulungulu kulyakufuka luvundo. ¹² Kole kuyakuvundula ndombo, alyoze zango lyakufuka kutanguka cheswe. ¹³ Mana katwama ha mivumbo ya mukwa maselyeka, alyoze mbwechi yamunyima ya yoze keshi kunyonga. ¹⁴ Akwa mana kakupachikila yinyingi, alyoze kanwa lya chihepuke lya kuneha lwenyeka mukamwihi. ¹⁵ Upite wa pichi wapwa lye limbo lyenyi likolo; mba uswale wa chiswale mwe lwenyeka wenyi. ¹⁶ Fweto ya mukwa ululi yakutwala ku mwono; mba kufumbuka cha chingulungulu chakutwala ku shili. ¹⁷ Kwatwama jila ya mwono kuli yoze matayiza kumufumba, alyoze mweswe machina ku mwolola makapyanguka. ¹⁸ Yoze masweka kole katwama nyi mivumbo ya mahuza, nyi yoze mukwa kulamikiza kapwa chihepuke. ¹⁹ Nyi maliji hoka, kutanguka kuchishi kuhona, alyoze yoze wakulyanjeka nyi yize akuhanjika wa mana. ²⁰ Limi lya mukwa ululi lili palata yipema; mba mbunge ya chingulungulu kuyafwika yikehe wika. ²¹ Mivumbo ya mukwa ululi yakulisa anji, alyoze yingulungulu kakufwa mumu wakuhona kunyonga. ²² Kisu ya Yehova lyakupichisa nawa keshi kuwezako chinyengo. ²³ Ungulungulu kuheha cha yihepuke, alyoze mana kapwa chakuwahilila kuli mukwa malinjekela. ²⁴ Chize chingulungulu akuvwila woma muchimuwana, alyoze chize mukwa ululi mazanga mamwahacho. ²⁵ Yingulungulu kapwa ngwe chijimbi chize chakupalika keshika nawa, alyoze mukwa ululi kapwa fundamentu ya mutolo. ²⁶ Ngwe chize yapwa yinenga ku mazo nyi wishi ku meso, chenacho apwa chilenda kuli waze akumutuma. ²⁷ Kuvwila woma Yehova chakwokesa matangwa, alyoze myaka ya chingulungulu muyikatepuluka. ²⁸ Kutalatala cha akwa ululi chili kuwaha cho, alyoze kutalatala cha yingulungulu muchikatoka. ²⁹ Jila ya Yehova che kujikiza cha waze atuwika ma mambunge, alyoze chapwa kulyemyeka kuli akwa uhenga. ³⁰ Mukwa ululi kechi kamukumba, alyoze chingulungulu kechi katwama muchihela. ³¹ Mukanwa lya mukwa ululi mwakukatuka mana, alyoze limi lya mupi makalitetamo. ³² Mivumbo ya mukwa ululi lya nyingika chize chinapemena, alyoze kanwa lya chingulungulu, lya myimgika chize chapihya.