¹ Kanda uvwila ukwa atu api, chipwe kuzanga kulikata no, ² mumu mbunge jo kujakuzanga ndombo nyi mivumbo yo yakuhanjika kuhuka. ³ Kupalikila mu mana zuwo lyakutungiwa nyi kumalinjekela kakulikolesa. ⁴ Ku yinyingi yipatulo yakuzala nyi upite upema wa ndando yinene. ⁵ Mukwa kutakama wamana kajikiza, nyi lunga wa chinyingi. Kakwokesa kutakama; ⁶ Mumu ku yiyulo muhasa kwasa jika nawa ku unji wakwa yiyulo kwatwama ku kumba. ⁷ Mana asuha naye kuli chihepuke; aye muchota keshi kupakula kanwa lyenyi. ⁸ Kwatwama yoze wakunyonga kuli yipi - atu kakumuhika ngwo mwata wa yihulya. ⁹ Nyonga lya uhepuke kulyapwa shili nanwa mukwa kulenya kapwa chizelwokeso kuli atu. ¹⁰ Nyi walezumuka nyi woma mu tangwa lya lamba, acho tachi je jikehe. ¹¹ Pulula waze anatwala ku kufwa nyi ku lamwina waze amakokela kuchishihilo. ¹² Chipwe mwamba ngwe, "Talenu, kutwachinyingikine nyichimwe ha chino," Shina yoze wakupezalisa mbunge kanyingika yize unambe nyi ? Yoze wakufunga mwono we, kachinyikine nyi? Te Zambi kechikahana kuli mweswe kulita nyi chize anatela? ¹³ Mwanami, lyako wuchi mumu upema, mulonga kusotwoka cha wuchi chiyema mu kanwa lye. ¹⁴ Achino emana a mwono we - nyi wa wana, mukukapwa kwonona nyi kutalatala che kuchichi kapatuka. ¹⁵ Kanda uswaminyina nyi kushimbwia ngwe mutu chingulungulu yoze wa kupupa zuwo lya mukwa ululi! ¹⁶ Mumu mukwa ululi kakulimbuka yisuho shimbyali hindu makatuka nawa, alyoze yingulungulu kakuhukana ha lamba. ¹⁷ Kanda uwahilila ha kuholoka chga mukwa kole we, nyi mbunge ye kanda yiwahilila muze mahukana, ¹⁸ neka Yehova mamona nawa kechi ku wahilila nyi kuchizaho ufwatulo wenyi hali yiye. ¹⁹ Kanda wivwa uli hamulonga wa akwakulinga yipi, nawa kanda wivwa ukwa wa atu yingulungulu, ²⁰ mumu mutui mupi keshi kwonona nawa makajima ndeya ya chingulungulu. ²² Vwila woma Yehova, nyi myanangana, mwanami; kanda ulyendela nyi waze akuzanga kwalumukina, ²¹ mumu susumuku lamba llyo mulikasoloka, yiya mahasa kunyingika kwenyeka chize kuli wano aali? ²³ Yino neyo yihanjika yakwa mana. Kupwa nyi katonde hakupatwila kuchapemene. ²⁴ Mweswe yoze wakwambila yingulungulu ngwenyi, "Uli mukwa ululi," makamushinga kuli atu nawa mavungu mamuvwila lwaji. ²⁵ Alyoze waze akufumba yingulungulu makawahilila nyi yiwape yipema muyikakaula. ²⁶ Yoze wakuhana kumbululo lipema kakuhana mbeju hamivumbo. ²⁷ Lulika, milimoye ya haze, nawa lulika yuma yeswe mu wande we; hanyima ya chocho, tunga zuwo lye. ²⁸ Kanda upwa chela wakuhisa mukwenu chitela chakuhi nawa kanda ulyonga nyi mivumbo ye. ²⁹ Kanda wamba ngwe, "Chize yiye angulinga mungu mulingacho; mungumufweta ha yize halinga." ³⁰ Napalikile ku wande wa chilenda, napalikile ku munda wa uva wa yoze keshi mbunge. ³¹ Mingonga hiyinasoko kweswe, hashi heswe hihanajiki nyi tunjate, nyi chipanga cha mawe hichina puzuka. ³² Mba natalile nyi kuchizewula kanawa; namwene nyi kutambula longeso. ³³ Tulo amwe akehe, kunongwoka hakehe, kulindanganyisa cha moko ha kuhwima - ³⁴ chocho uswale muwiza hali yena, nawa kuhona che muchiza ngwe kajita nyi yitwa yenyi.