¹ Muze mutwama nyi kulya nyi mukwa kuyula, tala kanawa yize ili halutwe lye, ² sako poko ku miliu ye nyi uli mutu mukwa kulya chinji. ³ Kanda uzanga kulya chenyi chipema, mumu chapwa kulya cha kwongo. ⁴ Kanda uzata chikolo hanga upwa nyi upite; litwamine ku mana ja yena mwane. Musela meso je ku chuma chize ku chishiko? ⁵ Muchiya, mumu chamwenemwene wakulisokela mapulwa ngwe pupa yoze wakuhumuka mwilu ⁶ Kanda utambula kulya cha yoze uli nyi liso lipi - kanda uzanga kalya chenyi chipema, ⁷ mumu che apwa iye ka kwalula ndando ya kulya. "Lyako nyi nwako! " Mamba kuli yena, alyoze mbunge yenyi kuyishiko kuli yena. ⁸ Muwiza kasaza koma kaze hiwalya nyi maliji je apema makatoka. ⁹ Kanda uhanjika mu matwi ja chihepuke, mumu malelesa mana a maliji je. ¹⁰ Kanda usosolola njiza chikulu chipwe kunjila mu minda ya shiwa, ¹¹ mumu chilamwina tachi ali nacho nyi kulemba ha kusopa nyi yena hakachi ko. ¹² Sela munge ye kukufumba nyi matwi je ku maliji a yinyingi. ¹³ Kanda ulitwamina kufumba mwana, mumu nyi wamulamba nyi shikote, kechi kufwa. ¹⁴ Yena mwene watela kumu lamba nyi shikote nyi kumupulula mwono wenyi kuma kwa kufwa. ¹⁵ Mwanami, nyi mbunge ye mwipwa nyi mana, nawa mbunge yami mwipwa nyi chiseke; ¹⁶ Njiso jami muji kawahilila muze mivumbo ye mwikahanjika yuma ya ululi. ¹⁷ Kanda wecha mbunge ivwilile mukwa shili ipululu, alyoze pwako nyi woma wa Yehova matangwa eswe. ¹⁸ Chamwenemwene kuli lutwe nyi kutalatala che kechi kachichizaho. ¹⁹ Hano - yena - mwanami, nawa pwako nyi mana nawa ukasongwele mbunge ye mu jila. ²⁰ Kanda utwama hakachi ka waze akunwa chinji walwa, chipwe waze akulya yifwo chinji, ²¹ mumu mukwa kuzengewa nyi akulya yifwo meza kupwa yiswale nyi kunongwoka muchikajika mutu nyi yipuzu. ²² Ivwa kuli tatenu yoze wakusemene kanda ulelesa noko muze mapwa kashinakaji. ²³ landa umwenemwene, alyoze kanda ulanjisa; landa mana, longeso nyi malinjekela. ²⁴ Tato ya mukwa ululi ka kuwahilila chikolo, nyi yoze masema mwana wa mana mazukako uwahililo. ²⁵ Echa tatenu nyi noko akawahe nyi kwecha yoze wakusemene aka wahilile. ²⁶ Mwanami, ngwehe mbunge ye echa meso je ashishike ha majila jami. ²⁷ Mumu chikoyi kapwa wina usuku, nyi pwo weka iye wumba lya kulipola. ²⁸ Kaku swaminyina ngwe mwiji nyi kwokesa akwa kulikehesa hakachi ka atu akulinga upi. ²⁹ Aya akwa lamba? Aya akwa chinyengo? Aya akwa ndombo? Aya akwa kulinyenga? Aya akwa yilonda keshi yitela? Aya akwa kuchila Meso? ³⁰ Waze akutwama shimbu ku walwa, waze akweseka kuchinga walwa. ³¹ Kanda utala walya shimbu yina chili muze mu yinatejima mu musenge nyi kusenunuka kanawa. ³² Ku songo muyisumana ngwe kapela nyi kusumana ngwe yenge. ³³ Meso je kuma kamona yikomokeso nyi mbunge ye kumuyihanjika yuma ya kupihya. ³⁴ Mwopwa ngwe yoze unapombo ha kachi ka kalunga lwiji chipwe yoze unapombo helu lya nguji lya wato. ³⁵ "Ka ngufufula," mwamba ngwe, "Alyoze chalemanyine. Hangulamba, alyoze chachivwile. Tangwa lika mukahinduka? Mungu fupa cheka nawa chakunwa."