¹ Kumbululo lya vumbi lya kuchiza ufwatulo, alyoze liji likalu lyakusangumuna utenu. ² Limi lya atu akwa mana lyakuhanj9ika yinyingi kanawa, alyoze kanwa lya yihepuke kulyakusolola kuseuka. ³ Meso ja Yehova kakumona kweswe, kakumona ha yipi nyi yipema. ⁴ Limi lyakuwuka lyapwa mutondo wa mwono, alyoze limi lya uhenge lyakumakuna shipilitu. ⁵ Chihepuke kaku lelesa longeso ya tato, alyoze yoze mata kumukanjisa iye mukwa mana. ⁶ Muzuwo lya mukwa ululi mwatwama upite unji, alyoze kufumbuka cha chingulungulu chakumu hana kupinda. ⁷ Miviumbo ya akwa mana yakuhana yinyingi , alyoze nhi chocho ko nyi mbunge yakwa yihepuke. ⁸ Milambu ya akwa yingulungulu yapwa yizelwokeso kuli Yehova, alyoze kulemba cha mukwa ululi chapwa che kuwahilila chenyi. ⁹ Ndako ja chingulungulu japwa chizelwokeso kuli Yehova, alyoze iye kakuzanga yoze wakulinga yize ya ululi. ¹⁰ Kufumba chikalu chinashimbwila yoze mweswe mehuka jila nyi yoze keshi kuzanga longeso kumafwa. ¹¹ Fuka nyi kwonwona chapwa zwalala kumeso ja Yehova; mba kuchi muchipwa nyi mbunge ja ana ja atu? ¹² Mukwa ku lenya keshi kuzanga yoze mamukanjisa ; kechi kuya kuli mukwa mana. ¹³ Mbunge yachiseke kuyakuwahisa ku meso, alyoze chinyengo mu mbunge chakumakuna shipilitu. ¹⁴ Mbunge ya malinjekela yakuzanga chinyingi, alyoze kanwa ka yihepuke ka kulya kaseuka. ¹⁵ Matangwa neswe a mukwa kupinda kapwa api, alyoze mbunge yachiseke yapwa ngwe chilika chakulya chije chishi kuhwa. ¹⁶ Chipema kupwa nyi yikehe nyi woma wa Yehova kuhyana kupwa nyi upite wunji nyi lamba. ¹⁷ Chipema kulya nyi mafwo mafwo nyi zango kuhyana kulya nyi ngombe munene wamaji nyi kole. ¹⁸ Chifwatulo kakusangumuna jita, alyoze mutu yoze keshi kwivwa utenu kawashi ka kuholesa kulitachika. ¹⁹ Jila ya chilenda yili ngwe chihela chize chinajiki nyi mbimbo, alyoze jila ya mukwa ululi yakusoloka kanawa. ²⁰ Mwana walunga wamana kakuneha kuwahilila kuli tato, alyoze chihepuke kakulelesa naye. ²¹ Yihepuke kakwivwa kanawa mutu yoze keshi nyi mana, alyoze yoze uli nyi malinjekela ka kwenda mu jila ya kwololoka. ²² Nyi kushi chiyulo kuhala ku kuchi kulumbunuka, alyoze ku wunji wa akwa kuyula ka kukumba. ²³ Mutu kakuwana kuwahilila muze mahana kumbululo lilemu lya kanwa kenyi; liji lya ha ola lyakulita lipema! ²⁴ Kuli akwa mana jila yo yapwa yaku kanduka, hanga akahichike jila ya mwishi ya fuka. ²⁵ Yehova kakupupa zuwo lya mukwa kulengumuka, alyoze iye kakukinga yikwata ya tuliwa. ²⁶ Manyonga ja chingulungulu kapwa chizelwokeso kuloi Yehova, alyoze maliji apema kapwa a ululi. ²⁷ Mutu yoze wakufumbuka kukatuka kuli chingulungulu ka kuneha kupinda ha chisemuko chenyi, alyoze yoze keshi kuzanga chindo mapwa nyi mwono. ²⁸ Mbunge ya mukwa ululi yakunyonga shimbu kanda achi kumbulula, alyoze kanwa ka yingulungulu ka kuhanjika yuma yipi. ²⁹ Yehova kapwa kusuku nyi yingulungulu, alyoze iye ka kwivwa kulemba cha atu akwa ululi. ³⁰ Pangu lya meso lya kuneha kuwahilila ku mbunge nyi sango lipema hi mwono upema ku mujimba. ³¹ Twitwi lyakupanjika ku kukanjisa cha mwono mulikatwama hakachi ka atu amana. ³² Yoze malituna maliji a kufumba kakulilelesa mwene, alyoze yoze wa kupanjika ku liji lya kumukanjisa ka kuwana malinjekela. ³³ Woma wa Yehova wakulongesa mana, nyi kulikehesa chakutetekela ulemu.