¹ Pwo wa mana kakutunga zuwo lyenyi, alyoze pwo chiepuke kskushaha mwene nyi moko njenyi. ² Yoze wakwenda munjila nja ululi kakwivwila woma Zambi, alyoze yoze keshi nyi umwenemwene mumanjila njenyi makamulelesa. ³ Mukanwa kachihepuke mwakutuhuka yakuhilwisa hanyima, alyoze mivumbo yakwa mana mwikafunga. ⁴ Kuze kukushi ngombe, nyi mwakulila mushikupwa majilo, alyoze uji wayakulya wakatuka kutachi nja ngombe. ⁵ Chela chamwenemwene keshi kulyonga, alyoze chela wama huza kakuhwima wika makuli. ⁶ Akwa kulenya kafupa mana mba keshi kwawana, alyoze malijekela akwashiwa kakwiza kuli yoze wakulilongesa. ⁷ Katukamo ku mutu chihepuke, mumu kuchi kapwa chinyingi hamivwumbo yenyi. ⁸ Mana a yoze mukwamana ka kunyingikina mwe mu njila nyenyi, alyoze kuseuka cha yihepuke mahuza. ⁹ Yihepuke kakulenya muze malambula mulambu wakulikonekena, alyoze hali akwa ululi kapwa nyi vumbi. ¹⁰ Mbunge yakunyingika chize yinapihilila mumu kushi chilambala manyingika chiseke chenyi. ¹¹ Zuwo lya mutu yoze chingulungulu maka lyonona, alyoze mbala yakwa ululi muli waha. ¹² Kuli njila yakusoloka yipema kuli mutu alyoze kusula chacho chakutwala kukufwa. ¹³ Mbunge mwitela kusehejela hindu yina kolana alyoze chiseke muchisala nyi chinyengo. ¹⁴ Akwa kuhona umwenemwene mu mbunge njila njo mu jika kamba, alyoze mutu mupema makatambula yize hiyenyi ¹⁵ Yoze uli nyi wanuke kakufulyela yeswe, alyoze chikanyame kaku nyonga ha kwenda chenyi. ¹⁶ Mukwa mana kaku china nyi kukatuka ku upi, alyoze chihepuke kakulipwupwisa kusanda kukanyama. ¹⁷ Yoze wakupihilila washi kalinga yuma ya wuhepuke, nyi mutu yoze mataka wupi keshi ku muzanga. ¹⁸ Akwa kuhona mana kakuswana wuhepuke, alyoze yikanyame fweto yo malinjekela. ¹⁹ Akwa upi makalihetamina hashi kuli waze apema nyi waze akwa upi makalihetamina hashi kuyi kolo ya kwa ululi. ²⁰ Mutu chiswale keshi ku muzanga chipwe akwo, alyoze pichi kakwete masepa anji. ²¹ Yoze masolola kulelesa mwenyembo wenyi kana vulumuna, alyoze yoze masolola vumbi kuli chiswale mamuwahisa. ²² Kanda waze akwakutaka upi te kapyangukile? Alyoze waze malulika kulinga yipema makatamgula zango lipema nyi ufulyelo. ²³ Nyi kuhondangana cheswe chakuneha ku vumbuka, alyoze nyi hali pande wika, kucha kutwala ku uswale. ²⁴ Fweto ya akwa mana wupite wo, alyoze kuseuka cha yihepuke chakwa nehena kuseuka chiji wika. ²⁵ Chela wamwene kaku lamwina myono, alyoze yoze mahjika makuli kakumukana. ²⁶ Muwoma wa Yehova che kukunuka cha ngolo; mu chikapwa chihwimino cha ana njenyi. ²⁷ Woma wa Yehova mwe kaselwoke wa mono, hanga mutu akalunuke kufuma ku makambwila a ufwe. ²⁸ Ulemu wa mwanangana wapwa mu atu njenyi anji, alyoze kwakuhona atu nyi mwana wa mwanangana malyenyeka. ²⁹ Mutu wakulihumikiza kapwa nyi malinjekela anji, alyoze akwa kwivwa uli washi kakusolola kuseuka. ³⁰ Mbunge yingunu kuyakuhana mwono mujimba, alyoze akwa uli wakupolesa ifwaha. ³¹ Yoze wakupijisa chiswale kakusaula tangi yenyi, alyoze yoze masalola vumbi ku akwa kuhona kakulemesa iye mwene ³² Yingulungulu kakulimbuka nyi ilinga yo yipi, alyoze mukwa ululi kapwa nyi uhwimino ndo mu ufwe. ³³ Mana kahwimina mumbunge yakwa malinjekela, alyoze chipwe hakachi ka yihepuke kakusola mwene. ³⁴ Kulinga chipema cha kulemesa chifuchi, alyoze shili yakwivwisa sonyi atu anji. ³⁵ Vumbi lya mwanangana lyapwa nyi tuvumbi waze akulinga nti mana, alyoze ufwetulo wenyi wapwa nyi waze akulinga yasonyi.