¹ Halyapwila mu matangwa waze , kwakatukile shimbi kuli Sesale Angusetu akasoneke atu eswe anatwama mu chifuchi. ² Aku kusoneka kwapwile kwatangu muze Kwilinu wapwile nguvulu ya Silya. ³ Mutu mweswe wayile kuchifuchi chenyi hanga akasonekese. ⁴ Yosefwa neye wayile ku Ngalileya,kukatuka kuchihela cha Nazale, kuya ku Yundeya, chifuchi cha Ndawichi, chize anatambika ngwo Mbeteleme, mumu wapwile mukwa zuwo nyi muchisemuko cha Ndawichi. ⁵ Wayile kuze nyikusonekesa hamwe nyi Maliya , pwo lyenyi te kali nyi ufumba. ⁶ Mba muze apwile kuze, shimbu apwile kuze matangwa akusema chenyi amanunukile. ⁷ Iye wasemene mwanenyi walunga, mwana mutangu wenyi, wamuvungile mumahina wamupombesele mu chililo, mumu kumwapwile muhela hali ayo kuze kwakuzeka ngeji. ⁸ Kwapwile tufunga mu chihela chize waze apwile nyi kutwama mumawande, kufunga mapanga jo muufuku. ⁹ Mba mungelo wa Zambi wasolokele kuli ayo, nawa uhenya wa Mwene watemukine ha kwajingilika , no evwile woma wunji. ¹⁰ Mungelo wambile kuli ayo , ''Kanda nwivwa woma, mumu ngunaneha kuli yenu sango lipema lize mulineha uwahililo kuli atu eswe. ¹¹ Musono muchifuchi cha Ndawichi! chilamwina kanasemuka kuli yenu iye Kilishitu Mwene! ¹² Chino che chilayi chize manuhana : Munuwana mwana kemba wa kuvunga mu mahina kanapombe mu chililo.'' ¹³ Mba susumuku kwapile hamwe nyi mungelo yizavu yinene kukatuka mwilu, kanahalisa Zambi nyi kwamba ngwo, ¹⁴ ''Uhenya kuli Zambi mwilu mwahyana hashi, chocho hakapwe sambukila hashi hali atu waze akumuwahila.'' ¹⁵ Muze mungelo wakatukile kuli ayo kuya mwilu, tufunga yahanjika kuli umwe nyi mukwo , Hapwila tuyenu ku Mbeteleme nyi kumona chino chuma chize chalingika , chize Mwene hanachisolola kuli yetu.'' ¹⁶ O ejile kapupushi nyi kumuwana Maliya , Yosefwa, nyi mwana kemba , wuze wapombele mu chililo. ¹⁷ Muze amumwene , alumbunwine liji lize lyakutwala kuli iye mwana. ¹⁸ Eswe evwile chino akomokene chize kumaliji waze ahanjikile tufunga . ¹⁹ Alyoze Maliya wafungile yuma yeswe evwile nyi kwazewula mu mbunge yenyi. ²⁰ Tufunga ahilukile, nyikuchichimyeka nyi kuhalisa Zambi ku yuma yize yeswe evwile nyi kumona , ngwe chizechene ahanjikanga kuli ayo. ²¹ Muze kusongo lya matangwa nake , muze hapwisa ngalami , amuvulukile ngwo Yesu, jina lize amuhele kuli mungelo muze te jimo kanda lichiseseka. ²² Muze matangwa akupemesa hapalika, nyikulita ku shimbi ya Mose , yamuneha kutembele mu Yelusaleme mukumutumbika kuli Mwene. ²³ Muzemwene chinasonewa mu shimbi ya Mwene, '' Mwana mweswe walunga malyangila kusemuka kumakamuvuluka ngwo musandu kuli mwene.'' ²⁴ chocho ahanyine chitapo nyikulita chize ahanjikile mu shimbi ya Mwene, '' tutele aali , hanji ana ali a membe.'' ²⁵ Talenu, kwapwile lunga umwe mu Yelusaleme jina lyenyi apwile Shimone, nawa awu mutu wapwile wa ululi nyi mukwa kuwayila Zambi. Kanatatatata kulembejeka cha Izalele ,nyi Shipilitu musandu wapwile hali iye. ²⁶ Achisolwesele kuli iye kuli Shipilitu Musandu ngwo kechi kamona kufwa shimbu kanda amone Mwene Kilishitu. ²⁷ Ku tachi ja Shipilitu, Shimone wanjilile mutembele. Muze yisemi anehene mwana kemba Yesu , akamulingile nyikulita nyi ndako ya shimbi, ²⁸ wamutambwile mumoko jenyi nyi kuhalisa Zambi, nyi kwamba ngwo, '' ²⁹ Halyapwila echenu ndungo ye akatuke kama nyi sambukila, Mwene , nyikulita nyi maliji je. ³⁰ Mumu meso jami hamona ulamwino, ³¹ uze hiunalulika kumeso ja atu eswe: ³² Pangu lyakutemwina akwa mavungu nyi uhenya kuli atu a izalele je.'' ³³ Tatenyi nyi naye akomokene kuyuma yize ahanjikile kuli iye. ³⁴ Shimone waawahishile nyi kwamba kuli Maliya naye, ''Talenu , awu mwana hanamusela ha kulimbuka nyi hakukatuka atu anji mu i Izalele nyi chilayi chize anachihamikina- ³⁵ nyi katana kumakatuwa mu mbunge ya yena mwene- hanga akasolole manyonga a mbunge jinji. ³⁶ Profeta anavuluka ngwo Ana wapwileko. wapwile mwana wapwo wa Fwanwele wa ku vungu lya Ashe. Matangwa jenyi hoka. watwamine hamwe nyi mukwo lunga myaka shimbyali chize ku umbachiso wenyi, ³⁷ wapwile twamishi ndo ku myaka makumi nake a myaka nyi myaka yiwana. Kakakatukile ku tembele alyoze wavumbikile Zambi nyikulitwamina kulya nyi kulemba, ufuku nyi mwalwa. ³⁸ Ha ola yizeyene wayile kukamwihi kuli ayo nyi kusakwilila kuli Zambi, nawa yahanjika kutwala hali hali mwana kuli mweswe uze wapwile nyi kumanyina ukule wa Yelusaleme. ³⁹ Muze hamanununa yeswe nyikulita nyi shimbi ya Mwene, ya hiluka ku Ngalileya , ku chifuchi cho cha Nazale. ⁴⁰ Mwe mwana watatukile , watatukile mu Shipilitu wazalile to nyi nyi mana , nyi vumbi lya Zambi lyapwile hali iye. ⁴¹ Yisemi apwile nyi kuya mwaka ha mwaka ku Yelusaleme ha chiwanyino cha chizomboka. ⁴² Muze apwile nyi myaka kumi nyi aali , ayile ku Yelusaleme nyi kulita nyi ndako ya chiwanyino. ⁴³ Muze te hamanununa matangwa a chiwanyino, aputukile kukinduluka kuzuwo. Alyoze mwana walunga Yesu wasalile kunyima mu Yelusaleme nyi yisemi jenyi kachinyingikine. ⁴⁴ Achinyongene ngwo apwile hamwe nyi akwo apwile nyi kwenda hamwe,chocho endele tangwa limuwika. Yaputuka kumufupa iye kuli usoko jo nyi akwo. ⁴⁵ Muze kamuwanyineko, ahilukile ku Yelusaleme nyi kuputuka kumufupa iye kuze kwene. ⁴⁶ Chapwile kulutwe lya matangwa atatu amuwanyine mu tembele , kanatwame hakachi ka alongeshi, kwivwilila kuli ayo nyi kwahula . ⁴⁷ Eswe amwivwile akomokene ha malinjekele nyi makumbululo jenyi. ⁴⁸ Muze amumwene, alishimwokene. Naye yamba kuli iye, '' Mwanami, kuchi te hiwalinga chize nyi yetu? Tala, tatenu nyi yami hitunakufupu nyi kupinda. ⁴⁹ ''Yamba kuli ayo, ''kuchi te nunakangufupa? kunwanyingikine ngwe changutamba kulinga yuma ya Tata , nyi? ⁵⁰ Alyoze kulyaalumbunukine liji lize ahanjikile kuli ayo. ⁵¹ Iye wapalumukine hamwe no ku Nazale nawa wazeyele kuli ayo. Naye wafungile maliji ano eswe mu mbunge yenyi . ⁵² Alyoze Yesu wasenyene kulutwe nyi mana nyi chizundamo, nyi kuwana vumbi kumeso ja Zambi nyi atu.