1 Anji hanambate mulimo wakusa hamwe sango lya kutwala kuyikuma yize hiyinamanunuka hakachi ketu, 2 ngwe chizechene atukunjikileyo kuli waze atangu apwile yela nyi tulala twa ma liji. 3 Changupemenene yami nawa, mumu hingunanyingika yuma yeswe kanawa kufuma ku uputukilo, kusoneka kuli yenu , yuma yinawaisa Teofwilu, 4 hanga ukanyingike pundu yuma yize akulongesele. 5 Muma tangwa a Helonde mwanangana wa Yundeya kwapwile umwe sasendote walijina lya Zakaliya ku chihela cha Abija; mukwo pwo wakuli ana Alone lijina lyenyi wapwile Izabele. 6 Eswe aali apwile akwa ululi kumeso ja Zambi, kanende mu shimbi jeswe nyi mu upatwilo wa Mwene. 7 Alyoze kapwile nyi mwana mumu Izabele wapwile mumba , nawa eswe aali myaka yo hiyoka. 8 Mba shimbu alingile usasendote wenyi ku meso ja Zambi nyi kulita nyi ngango yenyi . 9 Nyikulita nyi ndako yakusakula sasendote wuze mazata, iye amusakwile ha kuta chela kunjila mu tembele ya Mwene nyi kwocha insensu. 10 Mbunga yeswe yatu yapwile nyi kulemba haze wola muze insensu apwile nyi ku yocha. 11 Halyapwila mungelo wa Mwene wasolokele kuli iye kanamana kusali lya chindume lya chilumbilo cha insensu. 12 Muze Zachaliya amumwene , walipikalile , nyi ,kwivwa woma. 13 Alyoze mungelo wahanjikile kuli iye , '' Kanda wivwa woma , Zakaliya , mumu kulemba che hachivwa. Ni mukwenu pwo Izabele kumakakusemena mwana wa lunga. Ukamuluke jina ngwe Yowano. 14 Kumukapwa nyi uwahililo nyi kulikwiza, nyi anji makawahilila ha kusemuka chenyi. 15 Mumu kumakapwa munene ku meso ja Mwene. Kanda akanwa vinyu chipwe kunwa chimwe chisasu , makazala nyi Shipilitu Musandu chize kujimo lya naye. 16 Anji ana kufuma ku Izalele kumakatewulwila kuli Zambi Mwene wo. 17 Iye kumakaya kumeso ja Mwene mu Shipilitu nyi tachi ja Eliya, nyi kwalumuna mbunge ja atato kuli ana nyi yihulya ku ukanyame wakwa ululi - mukululikila Mwene atu alulikile.'' 18 Zakaliya wambile kuli mungelo , '' Kuchi te munguchinyingika achino? mumu ngulimukulwana nyi mukwetu pwo myaka hiyoka.'' 19 Mungelo wamukumbulwile nyi kwamba kuli iye , '' Yami Gabliele wuze unamane kumeso ja Zambi. Angutumine muku hanjikaka kuli yena , nkwambulwile sango lino lipema. 20 Tala! kumuhola, kuushi kuhanjika , ndo yuma yeswe ayi muyikalingika. Mumu ku wafulyelele maliji jami, waze makamanunuka ha wola yacho.'' 21 Halyapwila atu apwile nyiku shimbwila Zakaliya. O akomokene mumu ha kushimbula chenyi mu tembele. 22 Alyoze muze atuhukile haze, kahanjikile kuli ayo. Ayo anyingikine ngwo hamona usolwelo shimbu apwanga mu tembele. Wapwile nyikulinga yilayi kuli ayo alyoze wasalile kamama. 23 Chejile muze matangwa jenyi akulinga amanunukine , iye yaya ku zuwo lyenyi. 24 Kulutwe lya matangwa waze , mukwo pwo Izabele wasesekele ufumba nyi kulisweka mwene ha tukwejia atano . Yamba ngwo, 25 ''chocho Mwene hanangulingila kuli yami muze akutalile yami nyi keke hanga achize luchoko yoze akungwamba hakachi ka atu.'' 26 Mukakweji wa muchisambano , Zambi watumine mungelo Gabliele ku chihunda cha Ngalileya jina lyacho Nazare, 27 kuli mwanapwo uze kanda achinyingika lunga uze hanamulakenya kuli lunga uze jinalyenyi wapwile Yosefwa, wapwile mwana wa kukatuka kuli Ndawichi, nyi jina lya mwana pwo uze kanda achiliwanaho nyi lunga iye Maliya. 28 Wejile kuli iye nyi kwamba ngwo, '' Vulye, yena hanakuvumbisa ! Mwene kali nyi yena.'' 29 Alyoze yiye walipikalile chikolo ha maliji jenyi wanyongene chize kumeneka chino muchipwa. 30 Mungelo wambile kuli iye, '' kanda wivwa woma , Maliya , mumu hiunawane vumbi kumeso ja Zambi . 31 Tala, museseka mujimo lye nyi kusema mwana wa lunga . Munumuluka jina ngwo 'Yesu'. 32 Kumakapwa munene mba ma kamuvuluka ngo mwana wa chitunda. Mwene Zambi kumakamwaha kunja ya tato Ndawichi. 33 Iye kumakayula akwa zuwo lya Yakomba ku myaka ya mutolo , nyi uwanangana wenyi ku uchi kuhwa.'' 34 Maliya wambile ku mungelo, '' kuchi chino muchikalingika, mumu kunanyingikine chipwe lunga umwe?'' 35 Mungelo wamukumbulwile nyi kwamba kuli iye , '' Shipilitu Musandu kumeza ha li yena , nyi tachi ja chitunda mujiza hali yena . Hanga musandu wuze masemuka makamuvuluka ngwo mwana wa Zambi. 36 Tala , wusoko we Izabele iye nawa haseseka mwana wa lunga ha ushinakaji wenyi. Nyi yono mwe kakweji wa muchisambano, kuli yoze amuvulukile ngwo mumba. 37 Mumu kuli Zambi nyichimwe muchihonewa.'' 38 Maliya , yamba ngwo, '' Tala , nguli ndungo wapwo wa Mwene . Chikapwe kuli yami nyi kulita nyi liji lye.'' Mba mungelo wamuhichikile. 39 Mba Maliya wakatukile mumatangwa waze nyi kuya kapupushi ku chifuchi cha milundu , kulimbo lya Yunda. 40 Yaya ku zuwo lya Zakaliya nyi kumeneka Izabele. 41 Muze Izabele wevwile kumeneka kwa Maliya , mwana kemba watumbukile mujimo lyenyi, nyi Izabele wazalile nyi Shipilitu Musanda. 42 Wakololokele nyi liji lyenyi linene, '' kuwawaha mukachi ka mapwo , nyi muhuko wa jimo lye kuwawaha. 43 Kuchi te hichasoloka chino kuli yami hanga naye ya Mwene wami eze kuli yami? 44 Mumu tala, muze liji lyakumeneka che lyanjila mu matwi jami, kemba mujimo lyami katumbuka nyi kulikwiza. 45 Kawaha yoze mwana pwo wuze wafulyela ngo kumukapwa kumanununa kwa yuma yize amulwekele kukatuka kuli Mwene.'' 46 Maliya yamba ngwenyi, '' Mbunge yami yina lemesa Mwene, 47 nyi Shipilitu yami hiyinalikwiza mu li Zambi chilamwina chami. 48 Mumu hanatele ulelu wa undungo wenyi wapwo. Mumu tala, chize ku lyapwila yisemuka muyika nguvuluka ngwo kawaha. 49 Mumu iye watachi hanangulingila yuma yinene , nyi jina lyenyi lisandu. 50 Keke yenyi kuyili ku yisemuko nyi kuyisemuko kuli waze akumuvwila woma. 51 Hanase tachi nyi kwokwo lyenyi; hanamwange akwakulengumuka mu kunyonga cha mbunge jo. 52 Hanambile hashi ana ja myanangana kufuma ha ngunja nyi kunangamisa akwa kulilelesa. 53 Hana kuchisa akwa zala nyi yuma yipema, alyoze hanakatwisa pichi mokomoko. 54 Hana hane ukwaso kuli Izalele ndungo wenyi hanga akewuluke keke 55 { muze mwene ambile kuli tulamba twetu} kuli Apalahama nyi kuli ana jenyi ndo ku myaka ya mutolo.'' 56 Maliya watwamine hamwe nyi Izabele ngwe ha tukweji atatu mba wahilukile ku zuwo lyenyi. 57 Muze shimbu yaheta ya kusema mwanenyi kemba Izabele wasemene mwana wa lunga. 58 Enyembo jenyi nyi usoko wenyi kevwile ngwo Mwene hokesa keke yenyi kuli iye , no awahililile hamwe nenyi. 59 Muze chalingikile ha tangwa lya mu chinake ejile nyi kumupwisa ngalami mwe mwana walunga. O ambile kumuluka ngwo ''Zakaliya'', jina lya tato. 60 Alyoze naye wakumbulwile ngwenyi, '' Hi chocho ko makamuvuluka ngwo Yowano'' . 61 Yamba kuli iye ngwo , '' wakuhi nyi umwe kuli usoko wenu akuvuluka kuli ali lijina .'' 62 Yalimga yilayi kuli tato hanga amuhule chize mazanga kumuluka. 63 Tato wechile mukanda haze hakusoneka nyi kusoneka , ''jina lyenyi Yowano.'' No eswe akomokene ali achi. 64 Hohene nyi kanwa kenyi kapakukile nyi limi lyenyi lya tusukile . Wahanjikile nyi ku fumanyisa Zambi . 65 woma wejile kuli eswe atwamine nenyi ha kwajingilika. Yuma yeswe ayi yahetele kweswe kuchifuchi cha milundu cha Yunda. 66 Eswe waze evwile ayipachikile mu mbunge jo, nyi kuhanjika, ''Yono mwana kuchi makapwa?'' mumu kwoko lya Mwene lyapwanga nyi iye. 67 Tato Zakaliya wazalile nyi Shipilitu Musandu yapulofeteza, ngwenyi, 68 Mwene Zambi ya Izalele afumane, mumu haneza nyi kutukwasa hanawise ukule wa atu jenyi. 69 Hanasolola mbinga ya ulamwino hali yetu muzuwo lya ndungo wenyi Ndawichi 70 { muze ahanjikile nyi kanwa ka tupulofeta asandu ku myaka}, 71 ulamwino ku moko jakwa kole nyi ku moko kuli waze akutuvwila kole. 72 Iye machilinga chino mukulweza keke kutulamba twetu nyi kwiuluka usendo wenyi wa usandu, 73 shingo yize ahanjikile kuli kulwetu Apalahama. 74 Mukuhana kuli yetu , tukapuluke ku moko ja akwa kole jetu , tukamulingile nyi woma wakuhi 75 mu usandu nyi ululi kumeso jenyi matangwa eswe a mwono wetu. 76 Ewa , nyi yena, mwana, kumakakuvuluka ngwo pulofeta wa chitunda, mumu mukaya kumeso ja Mwene mukuwahisa jila jenyi, mukululika atu cha kwiza chenyi, 77 mukunyingikisa atu jenyi ulamwino ha ukonekeno wa hashili jo. 78 Achi muchi kasoloka mumu wa keke ya Zambi yetu. ku yenayo cha cha tangwa kwilu muchikacha hali yetu, 79 mukupanguka hali waze atwama mumilima nyi mu chizulye cha kufwa. Iye machilinga mu kulama molu mujila ya sambukila.'' 80 Muze mwana yakola wafundwile mu Shipilitu, mba yapwa mu puya chize ndo tangwa asolokele ku mbunga ya Izalele.