¹ Muze atu hamona ngwo mose hanashimbula kwiza kushikumuka kumu lundu, yalikungulula kuli Alone yamba ngwo, " tweya, tulingile Zambi yoze matusongela. Mumu hayono Mose, mutu watuchijile muchifuchi cha Engitu, kutwanyingikine chalingiwa kuli iye. " ² Mba Alone wambile kuli ayo, "Zulenu ingelyengelye ya Olu yili kumatwi ja mapwo jienu, nyi kumatwi ja ana jienu ama lunga nyi ana amapwo, nyi kwineha kuli yami." ³ Atu eswe azulile ingelyengelye yo ya Olu yapwile kumatwi jo nyi kuyineha kuli Alone. ⁴ Watambwile Olu kumwoko jo nyi kwisangununa nyi kahia mba matunga chi zambi ngwe chipembe cha kuji. O yamba ngwo " yino yeyi zamba yenu, Yizalele, wanu chijile muchifuchi cha Engitu." ⁵ Muze Alone wamwene chino, watungile chilumbilo kulutwe lya ngombe nyi kusa mutambi; yamba ngwenyi, " Hamene mutukalinga chiwanyino cha kulemesa Yehova." ⁶ Atu akatukile chimenemene tangwa lya kaulaho nyi kulambula mulambu wa kwocha nawa anehene milambu yakulikungulula. Mba o atwamine hashi nyi kulya nyi kunwa, mba yakatuka yaneha zungo lya kukina. ⁷ Mba Yehova yamba kuli Mose, " yako kawashi ku atu jie, waze wachijile mu chifuchi cha Engitu, halinga chipi ene, ⁸ O hafuma washi mujila muze nalwezele. O hatunga chihamba chalifwa ngombe nyi kumu wayila nyi kumukombelela. Yamba ngwo, ' wano ema zambi jienu, Yizalele, wanuchijile mu chifuchi cha Engitu. ⁹ Mba Yehova yamba kuli Mose, "ngunanyingika wano atu. Tala, kala atu akukaluwa mbunge. ¹⁰ Halyapwila nawa, kanda weseka kungwechesa. Wuli wami muwashaha, chocho mungu enyeka. Mba mungu pwisa vungu linene muli yena. ¹¹ Alyoze mose wesekele kulembejieka Yehova Zambi yenyi. Wambile ngwenyi, " Yehova, kuchi mwivwila ufwatulo nyi kwocha atu jie, waze wachijile muchifuchi cha Engitu ku tachi nyi ngolo jia moko jie. ¹² Yika A - Engitu mamba ngwo, ' watuhwishile nyi malinjiekela api, kwashihila mumilundu nyi kuenyeka kumeso lya chifuchi?' Echa kama ufwatulo we wa lumune chino cha upatwilo kuli atu jie. ¹³ Yiwuluka kama Apalahama, nyi Isake nyi Yizalele, tu vumbi twe, kuli ayo walishingile kuli yena mwene nyi kwamba kuli ayo, ' mungukanupwisa mavungu aji ngwe tutongonoshi twa mwilu, mba mukukaha chifuchi chize nambile kumavungu jienu. Makaswenamo myaka yeswe. ''' ¹⁴ Mba Yehova yalumuna upatwilo wuze ambile ngwo makasa lupindo hali atu jienyi. ¹⁵ Mba Mose walumukine nyi kuhulumuka hashi lya mulundu, yambata mawe aali a shimbi ja usendo mukoko lyenyi. Mawe akusoneka sali nyi sali, ku eswe kulutwe nyi kunyima. ¹⁶ Mawe apwile kuzata cha mwene Zambi, nyi kusonewa mwene Zambi wasonekene, watotele ha mawe. ¹⁷ Muze Yoshuwa wevwile zungo lya atu muze makalumuka, wambile kuli Mose ngwenyi, " muli zungo lya jita mu mbalaka." ¹⁸ Alyoze Mose yamba ngwenyi hizungo ko lya mukwa kukumba, nawa hizungoko atu akumba, alyoze zungo lya myaso ngunevu." ¹⁹ Muze Mose hakundama ku musumba, wamwene ngombe nyi atu kanakinyi. Wevwile utenu kuhyana. Wambilile mawe kufuma mu kwoko lyenyi no yapalwoka mwishi lya mulundu. ²⁰ Mba yanda ngombe yoze atu alingile, yamocha, yamufwenya ifwenyu fwenyu nyi kuyimwangina mu meya. Mba ya nwisa A - Yizalele meya waze. ²¹ Mba Mose wambile kuli Alone ngwenyi, " Yika yize ano atu alinganga kuli yena, nyi kwanehena yino shili inene?" ²² Alone yamba ngwenyi, " kanda ungutenukina, mwata wami. Unanyingika ano atu kakulihana hakulinga yipi. ²³ Yangwamba ngwo, 'tulingile zambi yoze matutetekela. Mumu ha yono Mose, mutu watutuhwishile mu chifuchi cha Engitu, kutwanyingikine chize chamu lingikina.' ²⁴ Mba yingwamba kuli ayo, " mweswawo uli nyi Olu, ayizule.' yangunehena Olu yinguyisa mukahya, mba himukatuka yono ngombe." ²⁵ Mose yamona chize atu machinyina mu yambu ( mumu Alone hatayijisa kuli lingila, kunehenena akwakole kwasaula ). ²⁶ Mba Mose yamana hachikolo cha musumba nyi kwamba ngwenyi, " yoze uli kusali lya Yehova, eze kuli yami." Eswe Alevi amukungulukile. ²⁷ Yamba kuli ayo ngwenyi, " Yehova, Zambi wa A - Yizalele, kamba ngwenyi: ' mutu mweswe aswelele mukwale wenyi nyi kuhiluka nyi kupalyeka chikolo nyi chikolo cha musumba weswe, ashihe ndumbwenyi walunga, nyi masepa jienyi nyi enyembo jienyi.''' ²⁸ Alevi yalinga ngwe chize Mose ambile. Lize tangwa kweseka nyi tununu atatu atu yafwa. ²⁹ Mose yamba kuli Alevi ngwenyi, " Musono uno hanukujika ku milimo ya Yehova, chila umwe halituna nyi mwanenyi wa lunga nyi ndumbwenyi wa lunga, mba Yehova manuwahisa lya musono. ³⁰ Tangwa lya kawulaho, Mose yambila atu ngwenyi, " kunwavulumuna ku hyana. Halyapwila kanakanduka kuli Yehova. Haji mungu tela kulinga hatomesa cha shili jienyi." ³¹ Mose yahiluka kuli Yehova nyi kwamba ngwenyi, " Aa, ano atu havulumuna kuhiana nawa hatenga hamba wa Olu. ³² Alyoze halyapwila, akonekene kama shili jo; alyoze nyi kuusolo, jimuna jina lyami mumukanda uze hunasoneka." ³³ Yehova yamba kuli Mose, mweswawo wanguvulumunanga, yono mutu mungu mujimuna mumukanda wami. ³⁴ Halyapwila nawa yako, utwale atu kuchihela chize nakulwezele. Tala, mungelo wami makutetekela. Alyoze hatangwa lize mukapatwila milonga yo, mukapatwila ha shili jo." ³⁵ Yehova yatuma lamba hali atu mumu yalinga ngombe, yoze Alone alingile.