¹ Mba Yehova yamba kuli Mose ngwenyi, ² " tala, hinatambika umwe kujina lyenyi Mbazalele mwana wa Uli mwana wa Hule, kukatuka kuvungu lya yunda. ³ Hinamuzalisa Mbazalele nyi Shipilitu yami, hanga yikamwehe mana, malinjekela, nyi yinyingi, nyi ulangaji weka, ⁴ nyi kulinga milimo ya ulangaji nyi kulinga mulimo mu Olu, nyi Palata, nyi Unengu; ⁵ nawa nyi kutota mawe nyi kuasa muyituwo yo nyi mukwola hamitondo - nyi kulinga ulangaji weswe. ⁶ Yami hinamusela hamwe nenyi, Oholyambe mwana wa Ahisamake yose hinatongola, kukatuka ku vungu lya Ndane. Hinasa mana mu mbunge ya waze eswe akosa mana hanga akalinge yeswe nakwambile. Yuma hino ⁷ mbalaka ya chikungulwila, mushete wa shindakenyo, nyi chifuko chiliho helu lya mushete, nyi yikashi yeswe yamu mbalaka - ⁸ nyi mesa hamwe nyi yikashi yayo, nyi chikwachilo cha ndeya cha Olu yakusayisa hamwe nyi yikashi yayo, nyi chilumbilo cha insensu, ⁹ nyi chilumbilo cha milambu yakulumba hamwe nyi yakashi yayo, nyi lumbasia nyi nganda yalwo. ¹⁰ Hamwe nyi mazalo a kutonga nyi ulangaji - mazalo asandu ja Alone mwe sasendote nyi ana jenyi amalunga, akangulingile no usasendote. ¹¹ Hamuwika nyi maji akuwayisa nyi insensu ya lupembo mupema ya muma musandu. Wano alanaaji akalinge yuma yeswe yino ngwe chizechene nakulwezele." ¹² Mba Yehova yamba kuli Mose ngwenyi, ¹³ " Amba kuli akwa Yizalele: ' chamwenemwene nukafunge matangwa a sambata ja Yehova, mumu kuchapwa chilayi hakachi kenu nyi yiye ndusu ku yisemuko yenu yeswe hanga nu nyingike ngwo iye mwe Yehova, ka kutusela ku usandu. ¹⁴ Chocho nukafunge sambata, mumu kuyapwa yisandu kuli yenu, hana yisela kuli iye. Yoze mweswe kechi kuyilemesa yiye a kamushihe. Mweswawo malinga milimo ha sambata, yoze mutu aka mutete ha kachi ka atu jenyi. ¹⁵ Mulimo akawulinge ha matangwa asambano, alyoze tangwa lya muchishimbyaali likapwe sambata ya uhwimino, lisandu kumeso ja Yehova. Mweswawo malinga milimo ha tangwa lya sambata akamushihe lume. ¹⁶ Keshika akwa Yizalele akafunge ye sambata. Mukuyisela ndusu nyi kuyisemoko yo chikapwe usendo wa mutolo. ¹⁷ Ye sambata kuchapwa chilayi hakachi ka Yehova nyi akwa Yizalele, mumu mu matangwa asambano Yehova watengela malilu nyi hashi, nyi hatangwa lya muchi shibyaali ya hwima nawa yasanguluka. ¹⁸ Muze Zambi ya hwisa kuhajika kuli Mose ha mulundu wa Sinai, yahana mikanda yaali ya shindakenyo, mikanda ayilingile nyi mawe, ya kusoneka nyi munwe wa Zambi.