¹ Nga mi tumila Febe, phangi'etu wa mukhetu, yonu wa nu kita gisalo gu dingumba dia gu dimbo dia Senkre, ² mu yambenu mwa bonga mu jina dia Fumu Yesu Kilistu mu phila bonga ya a kilistu, enji mu mu kwatese mu ndaga jikima adi najio funu, mukunda nu mwene nji wa salesele athu a vula, n'eme mwene gibeni. ³ Mbote ya vula gwa Priska nu Akila aphangi'ami a gisalo mu Yesu Kilistu, ⁴ a bolo shiyiya mukunda nu gu ngu gulusa. Ngu mu a vutudila matondo a vula, ishi eme ha khami go, uvi nu wanyi akima a dingumba dia wanyi ashi a kilistu go. ⁵ Mbote ya vula gwa enya dingumba dia nu tagana mu gisapha giawo. ⁶ Mbote gwa Mariya yonu wa nu kita gisalo gia vula, ⁷ mbote gwa Andromikusi, gwa Zuniasi, aphangi wanyi a kalele mu bologo, adi a thumwa a jiyanele mwa vula, a kitugile a thumwa gu twama diami. ⁸ Mbote gwa Ampliyatus phangi nga tshigina, tudi nenji mu gimvuga nu kilistu, mwene nji wa kitugile thumwa gu twama diami. ⁹ Mbote gwa irbin phangi'etu wa gisalo mu kilistu, mbote iko gwa stakis phangi nga tshigina. Mbote iko gwa Apelesi yonu wadi monesele muthu wa gikesa mu ndaga jia kilistu. ¹⁰ Mbote iko gwa wanyi a mu gisapha gia Aristobule. ¹¹ Mbote gwa Erodioni phangi'ami wa mu yuda, mbote iko gwa wanyi adi mu gisapha gia Narsise, adi mu gi kilistu. ¹² Mbote gwa trifene nu trifoze a nu kita gisalo gia ngolo gia Fumu. Mbote gwa Perside futa diami mwene nji wa nu kita gisalo gia vula gui Fumu Yesu. ¹³ Mbote gwa Rifis, mu kilistu wa gikesa wa phoneye mu gisalo gia Fumu, mbote iko gwa ginenji udi nji ginami. ¹⁴ Mbote gwa Asinkritus flegoni, Ermes, patrobasi, Ermasi nu aphangi wanyi adi mu katshi diawo. ¹⁵ Mbote gwa filologe nu jili, nu Nere nu phangienji wa mukhetu, nu gwa Olimpasi, nu gwa a kilistu adi mu katshi diawo. ¹⁶ Di hwenu mbote mu katshi dienu nu gudi kondeza. Enya mangumba ako a kilistu a mi tumila mbote. ¹⁷ Lulu ngagi, ngu mu mi bondila, ha gu yindula wanyi adi mu bata gudi kapha nu gu kita ima ya phamba, nu gu tuna malongi wanyi mwa a longele. Lengenu athu a nganyi. ¹⁸ Athu ene a nganyi a nu salesa gawo Fumu wetu Kilistu go, uvi a nu salesa kaka mavumo awo, nu guya nu gu zwela izwele zwele ya gudimba athu mu ndaga jiawo jia mambo. ¹⁹ Mbandu yenu ya gu lemvuga, athu akima adi mu i jiya. Hene ngu di nu kiese mukunda nu enwe, mukunda nu nganyi nga tshigina egi mu kale nu gimbangi nu gu tema, gu ndaga jidi jia bonga, enji gu tuna ndaga jia bola. ²⁰ Gwa bega tangwa gabiyo Nzambi wa maweze a bwise satana goshia malu enu. Khenda jia Fumu wetu Yesu Kilistu ji kale mu katshi dienu. ²¹ Timote futa diami wa gisalo, nu aphangi'ami wawa, Lusiesu, Jazon, Sosipater a mi tumila lumene. ²² Eme Tertiusi nga sonega mukanda wuwu, nga mi tumila lumene mu jina dia Fumu. ²³ Gayusi wa mi tumila lumene. Eraste mubumbi wa falanga wa dimbo wa mi tumile lumene, nu phangienji Kwartusi. ²⁴ Khenda jia Fumu wetu Yesu Kilistu ji kale mu katshi dienu. Amen! ²⁵ Tu vutulenu lukumu gwa nzambi, mwene udi nu giyega gia gu tu hwa gikesa mu lukwikilu lwenu, mu phila malongi a bonga nga mi longele adi mu talela Yesu Kilistu, enji mu phila tu di mu jiya ndaga jia kielega jinyi nzambi a swegele mvula jia vula. ²⁶ Uvi tangwa didi mikanda ya sonegeye idi mu leza mwa bonga bonga ndaga jia kielega, mukunda Nzambi wa mvula nu mvula wa tuna athu ha gu jiyisa ndaga gu ikanda ikima ya athu. ²⁷ Nganyi a jiya gu haga mutshima gwa Yesu Kilistu nu gu mu lemvugila. Amen!