¹ Pholo, muthu wa gisalo wa Yesu Kilisto wa tamegeye ha gukhala thumwa, wa hagele mu gingenga ha gulonga sango ya bonga ya Nzambi. ² Sango yinyi mwene a jiyishile katuga mwa leha mu njila ya ba profeta nu mu mikanda ya santu, ³ mu ndaga idi mu talela Munenji yonu wa butugile mu gifwanisu gia muthu mu gikanda gia Davidi. ⁴ Mona mwene wa jiyiye egi udi muna Nzambi mu ngolo jia pheve Santu gu nyima ya guzuga gwenji gu lufwa. ⁵ Mu njila yenji ta zudile mutshima wa bonga wa gimbuta ha gukhala a thumwa nu ha gu lemvuga mu nsadisa ya lukwikilu mu katshi dia ikanda ikima mukunda nu jina dienji. ⁶ Mwa tamegeye mu katshi dia ikanda yene ha gukhala athu a Yesu Kilisto. ⁷ Gwa athu wanyi akima adi gu dimbo dia Roma, athu wanyi Nzambi a tshigina, athu wanyi a tamegeye ha gukhala athu a santu; khalenu mu ngemba ya koma idi mu katuga gwa Tata Nzambi nu gwa Fumu wetu Yesu Kilisto. ⁸ Ha gudiangela, ngu mu vutula matondo gwa Nzambi wetu mukunda nu lukwikilu lwenu ludi mu zweleya mu thotho ikima. ⁹ Mukunda Nzambi yonu nga nu salela gisalo gia bonga gia gu jiyisa sango jia munenji nga mu zula mu githemwe mukunda nga nu mi haga mu isambu tangwa dikima. ¹⁰ Nga nu lomba nji egi nga jiya guza mu mi tala gula Nzambi wa kangula njila mu luzolo lwenji. ¹¹ Mukunda ngudi nu nzala ya guza ha gu mi mona, ha gu mi hwa mabula a gipheve mukunda nu ngolo jenu; ¹² to ha gudi hwa gikhesa mu njila ya lukwikilu lwetu akima. ¹³ Lulu ngagi, nga tshigina mu jiye egi, mbala jia vula nga nu kanesa ha guza mu mi tala uvi ti nu tangwa didi njila idi ya gu kanga, mu khala nji mu jiye egi ngu feto za ha gu zula mu katshi dienu ga bundu ga moshi mu phila nga zudile n'eme gwa athu ako a mitshima ya bonga. ¹⁴ Ngudi nu fuga gwa ba Greki, gwa nzenza, gwa athu a tema nu gwa ikata. ¹⁵ Hene, ngudi nu nzala ya vula ha gu jiyisa sango ya bonga gwa athu wanyi adi gu Roma. ¹⁶ Hene ngu shi nu sonyi go ha gu jiyisa sango. Idi ngolo jia Nzambi mukunda nu gu guluga gwa muthu mukima udi mu kwikila, idi mu talela thomo ba yuda nu ba greki. ¹⁷ Mukunda idi mu njila ya sango yene, Nzambi adi mu monesa ngolo jenji mu njila ya lukwikilu mu phila ya sonegeye egi: " muthu wa masonga mba udi mu jinga mukunda nu lukwikilu". ¹⁸ Khabu jia Nzambi jidi mu katuga gosa ha guza holu dia ndaga jikima jidi jia masumu nu ndaga jinyi jikima jia mambo athu adi mu kita ha gu kanga masonga njila. ¹⁹ Nzambi udi mu hana ndola mukunda nu ndaga jenji jinyi athu adi mu mona pwelele mu katshi diawo, mukunda Nzambi udi mu a monesa najio pwelele. ²⁰ Katuga luyandigu ndaga jikima jia giswegi jidi mu talela Ginzambi nu ngolo jenji jia mvula nu mvula jia moneseye pwelele mu njila ya ima ikima ya salamele. Hene a shi go nu gima gia guzwela. ²¹ Mukunda ata a jiyile Nzambi, a mu hwile go lukumu nu khembo. Mukunda ngindu jiawo nu mitshima jia kitugile jia phamba jia unzoba wa mu phipha. ²² Ata a nu zwela egi adi athu a tema, lulu ngagi adi a unga. ²³ Ole a hane lukumu gwa Nzambi adi mu sambela itege ya nu fukha ya muthu, ya ganjila, ya mbiji jia mabotela, nga ndo jia mbiji jinyi jia nu wendela ha vumo. ²⁴ Hene, ha gu talela nzala jia mitshima yawo, Nzambi wa a bembele ha gu kita ndaga jia mvindu mukunda ha gu hwa mwila wawo sonyi mu katshi diawo; ²⁵ a phonele gawo njila ya luvunu a bemba njila ya masonga a Nzambi; a nu sambela gawo itege a bemba ha gu salela yonu wa gangele ima ikima yonu a feto hwa lukumu lwa mvula nu mvula. Amen! ²⁶ Hene Nzambi wa a hwile nzala ya vula ya gu vugisa mwila wawo mu ndaga jia sonyi, mukunda akajiawo a bemba gawo gu salela phila inyi ya bonga ya gu vugisa mwila. ²⁷ Phila imoshi gwa mala a bemba njila ya bonga ya gu vugisa mwila nu akajiawo ene nji a zala nu nzala ya vula ya gu vugisa mwila nu aphangiawo amala, a mu kita ndaga jia sonyi hene Nzambi adi mu a hwa ndola mukunda nu ndaga jiawo jia bola. ²⁸ Mukunda a tunyile Nzambi, hene mwene a abembele ha gu hata ngindu jinyi mwene a nu tshigina go, mukunda a kite ndaga jinyi jidi jia bola ^{29 30 31} Enji adi a zala nu ndaga jinyi jia konda masonga, ndaga jia bola, ndaga jia waza, nu jia mambo. Adi a zala nu nzala ya ima, ya gu shiya athu,ya gu mana, ya gu zwela mwa vula, ya songi-songi, ya gu feta athu, ya gu konda gu lemvugila ibuti yawo. A shi gawo nu mayele a gu jiyila ndaga go, nu gu konda khenda. ³² Adi mu jiya mwa bonga egi Nzambi mba udi mu sambesa athu;mukunda athu adi mu kita ndaga jia phila inyi mba adi mu shiyiya. Ishi kaka ndaga jia nganyi a nu kita go; uvi adi nji mu zola ha phelo wanyi a nu kita ndaga jene.