¹ Gu shi go nu gu lolula mukunda nu eye, muthu udi mu sambesa athu ako , tangwa adi mu sambesa athu ako udi eye udi ha gife ha khaye, udi mu sambesa mu kita giteso gi moshi ole ene. ² Tu di mu jiya egi gu sambesa gwa Nzambi gudi mukunda nu masonga a athu wanyi a nu kita ndaga ya phila yiyi. ³ Ha gu tala ndaga jiji, eye udi mu fisa athu adi mu salela ndaga jia fwana jiji, nu gu salela nji udi nu mabanza egi, udi mu longa gu sambesa gwa Nzambi? ⁴ Udi mu bolesa gimvwama jidi gu tshigina gwa Nzambi, mukunda nu gubonga nu khenda jenji nu phila adi mu kanga mutshima wenji. ⁵ Eye udi mu kolesa mutwe waye, ushi mu tshigina gu balula mutshima waye go. Ndola ya koma idi mu gu nenga mu tangwa mba di vutuga Nzambi. ⁶ Gu sambesa gwenji mba gu hata gisalo gia muthu nu muthu. ⁷ Gwi athu a mu haga mitshima yawo ya bonga, mu gisalo gia Nzambi, a mu kamba lukumu nu monyo wa mvula nu mvula. ⁸ Enya mitshima ya bola a mula gu lemvuga ndo, adi mu kita ndaga jia bola, enji adi mu hwa Nzambi khabu. ⁹ Phashi jia ngolo mba jidi mu bwila muthu mukima udi mu katshi dia gu bola. Athu a thomo adi a yuda, a giyadi adi athu wanyi a shi go ba yuda. ¹⁰ Uvi Nzambi mba udi mu hana lukumu, lujitu nu ngemba gwa athu wanyi akima a nu kita ndaga jia bonga, ha thomo ba yuda, gu nyima wanyi a shi ba yuda go. ¹¹ Mukunda Nzambi wa nu tshigina athu akima giteso gi moshi. ¹² Athu wanyi a shi ba yuda go adi mu jiya shigo jia Moyize go. A nu kita gawo masumu, hene mba adi mu fwa konda gu jiya shigo; uvi ene nji a nu kita masumu, hene shigo mba jidi mu a kesela ndola. ¹³ Nzambi gwa nu tshigina go athu egi mukunda a nu hata go shigo, uvi wa nu gu a tshigina mukunda a nu kita ndaga shigo jia nu tshigina. ¹⁴ Athu wanyi a shi ba yuda go a jiya go shigo jia Moyize, uvi gula a nu kita mu luzolo ndaga jinyi shigo jia nu zwela, a nu di haga shigo mukunda nu ene ha khawo, ata a jiya shigo jene go. ¹⁵ Nganyi a mu leza egi, ndaga jia nu zwela shigo, a ji sonegele mu mitshima yawo. Mitshima yawo ya nu leza egi ndaga jene jidi jia kielega. Tangwa diko ngindu jiawo jia nu gu a belesa go, uvi tangwa diko jia nu a belesa. ¹⁶ Mba i kala kaka giteso gi moshi mu gilumbu ginyi Nzambi mba a hana giyega gwa Yesu Kilisto ha gu sambesa athu gu ndaga jikima jinyi jidi jia gu swega mu mitshima yawo, mu phila ndinga ya bonga nga nu longa idi mu zwela. ¹⁷ Uvi eye muthu wa nu zwela egi udi wa muyuda, wa nu haga mutshima gu shigo, enji wa nu di monesa mukunda nu Nzambi waye, ¹⁸ u feto jiya ndaga khi Nzambi a nu tshigina egi u feto kita, enji shigo jia nu gu longa ha gu sola ndaga jinyi jidi jia bonga. ¹⁹ Wa nu yindula egi udi wa muthu yonu wa nu leza njila gwa ifwa meso: wa nu tangiza nji egi udi wa mwinda ha gu leza gieji gieji gwa athu adi mu phipha. ²⁰ Wa nu tangiza egi udi wa longi wa athu wanyi a jiya gima go, enji egi udi wa longi wa ana mitumba, mukunda wa nu haga mutshima egi, shigo jia nu gu leza ndaga jia kielega nu ndaga wa nu jiya. ²¹ Gula wa nu longa athu ako, mukunda ni ikhi wa jiyile go gudi longa eye hakhaye? U mu longa athu ako egi gu kuya ndo, keti eye wa nu kuya go? ²² U mu longa athu ako egi gu kita uthambi ndo, keti eye wa nu kita go? Eye udi mu tuna nzambi wa itege, mukunda nu ikhi udi muya mu zula itege idi mu inzo nzambi? ²³ Eye udi mu di leza egi udi mu katshi dia shigo, mukunda nu ikhi udi mu kwatesa nzambi sonyi? ²⁴ Jina dia nzambi didi mu moneseya sonyi mukunda nu eye mu phila ya sonegeye egi," Athu wanyi a shi ba yuda go adi mu monesa jina dia Nzambi sonyi." ²⁵ Gula udi mu hata shigo, gu batula wa batudiye gu mukanda gudi nu funu; uvi gula wa nu hata go shigo udi wa fwana muthu yonu gwa batudiye go gu mukanda. ²⁶ Hene muthu gwa batudiye go gu mukanda, gula wa nu hata ndaga shigo jidi mu zwela, keti Nzambi mba gwa shi mu mu zangula go ole muthu yonu wa batudiye gu mukanda? ²⁷ Muthu yonu gwa batudiye go gu mukanda uvi wa nu hata shigo, mba udi mu gu funda eye muyuda yonu wa nu la gu hata ndo shigo, ata wa jiya sha mwa bonga shigo jene jia sonegeye, enji ata wa batudiye gu mukanda! ²⁸ Mukunda muyuda wa kielega gwa shi go yonu udi mu monega gu meso a athu, nga ndo yonu wa batudiye gu mukanda. ²⁹ Uvi muyuda wa kielega udi yonu udi muyuda mu katshi dia mutshima, enji udi yonu wa batudiye gu mukanda mu katshi dia mutshima, gu batudiya gwene gwa gu mukanda gu shi go gisalo gia gia gu hata shigo jia Nzambi, uvi muyuda wa kielega gwa nu zula lukumu gwa athu go, uvi gwa Nzambi.