¹ Mu tangwa diene, gwa zogele shigo ya Kayisala ha guya mu sonega athu wanyi akima a kalele mu gifumu gia enya gu loma. ² Gu sonegesa majina gwene gwa salamele mu tangwa Kirinusi a kalele fumu wa gu Siriya. ³ Athu akima a kalele muya mudi sonegesa konso muthu mu dimbo dienji dia gishina. ⁴ Yozefi wa katugile gu Nazareti gu Galileya, mukunda nu guya gu Yudeya, dimbo dia Davidi dia nu tamegeya egi Beteleyemi; mukunda wa kalele muthu wa mu gikanda gia Davidi, ⁵ ha gudi sonegesa nu mukajenji wa kalele gu vumo. ⁶ Tangwa a kumile, tangwa dia gubuta dia lungile. ⁷ Wa butile mona yala munenji wa thomo wa mu sudigile milele enji wa mu hagele mu ginda dia nu dila mbiji ima, mukunda mu inzo ya nzenza mwa kalele mwa zala nu athu. ⁸ Mu njiunga gu khanda yene athu a kalele mu balegesa phipha mu temu ha gu tala ivwamena yawo. ⁹ Wanjo mu moshi wa fumu we jile mudi monesa gu twama diawo enji khembo ya fumu ya kalele mu sema mu khulo yawo; hene a vile woma. ¹⁰ Wanjo wa zwelele egi : " Mu vi woma go, Mukunda nga mi batela sango ya bonga, ya mbo kala ndaga ya kiese gwa athu akima. ¹¹ Magino gwa mi butugila, mu dimbo dia Davidi, muthu wa gu mi katula mu phashi udi Kilistu, Fumu. ¹² Talenu gidimbu gi mwa mbo jiyila: mu mu sanga mona wa katuga gubutuga wa gu sudiga milele enji wa swama mu gima gia nu dila mbiji." ¹³ Mu mbala imoshi gimvuga gia ma wanjo a gosa ejile mu sanga wanjo yonu,nu gu kumisa Nzambi egi : ¹⁴ " Lukumu gwa Nzambi gunu gosa, nu haha ha mavu, ngemba mu katshi dia athu a nu tala." ¹⁵ Tangwa ma wanjo ene a vutugile gosa, enya gu tala ivwamena adi lezele mu katshi diawo egi : " Tu yenu gu Beteleyemi tu tale ndaga ya katuga gu salama, inyi Fumu a katuga gu tu monesa." ¹⁶ A katugile muya phushi phushi a sangele Mariya nu Yozefi nu mona wa butuga wa swama mu gima gia nu dila mbiji. ¹⁷ Gu nyima ya gu mona ndaga yene, a jiyishile athu ndaga phila a monele mukunda nu gu butuga gwa mona mwene. ¹⁸ Athu wanyi akima a vile ndaga yene a yitugile mwa vula gu ndaga enya gu tala ivwamena a kalele mu zwela. ¹⁹ Uvi Mariya, wa kalele mu yindula mwa vula nu gu kamba disongidila ya ndaga yene. ²⁰ Hene enya gu tala ivwamena a vutugile nu gu kumisa Nzambi mukunda nu ndaga a vile nu phila a monele, mu phila ndaga yene ya a jiyishiye. ²¹ Mu gilumbu gia nana, mona wa butugile wa mbiye mu luyotoshi nu gu hwiya jina dia Yesu; jina dinyi dia zwelele wanjo gu twama mwene a butuge. ²² Gu nyima tangwa gilumbu giawo gia gudi wova gia lungile mu phila ya shigo ja Moyize, Yozefi nu Mariya a batele mona mwene gu yelusalemi ha gu mu monesa gwa Fumu. ²³ Ha gu tala ndaga ya sonegeye gu mukanda wa shigo wa Fumu egi : " Mona yala mukima wa somi, wa feto haneya gwa Fumu. ²⁴ A ile nji ha gu hana makapho mu phila ya sonegeye gu mukanda wa shigo egi gu hana twana twa pijio tu yadi to pijio ja kolale jiyadi mu phila ya sonegeye gu mukanda wa shigo wa Fumu. ²⁵ Uvi, gu Yelusalemi gwa kalele nu muthu mu moshi jina dienji Simeyoni. Muthu mwene wa kalele muthu wa masonga wa hima. Wa kalele mu nenga tangwa dia gu katula khenda ja nzambi enji Pheve Santu ya kalele mu katshi dienji. ²⁶ Wa moneseye gu ma twama mu njila ya pheve Santu egi mba gwa shi mu fwa go gula gwa monele go Mesiya yonu u mu tamegeya egi Fumu. ²⁷ Pheve Santu ya mu phushile ha guya mu inzo ya isambu, enji mu phila ibuti ya kalele mu bata munawo Yesu ha gu lungisa ndaga ya sonegeye gu mukanda wa shigo ; ²⁸ hene Simeyoni a mu zudile ha mago, wa sagumunile Nzambi nu gu zwela egi : ²⁹ " Lulu ngagi Fumu, ngu bembe eme muthu waye wa gisalo ngu ye mu ngemba mu phila ndinga yaye idi mu zwela. ³⁰ Mukunda meso ami a mona gu guluga gwaye, ³¹ gunu wa londele gu twama dia athu a gu Izalayele." ³² Mba u mu kala mwanya mukunda nu gu jiyana gwa aphagano, enji lukumu mukunda nu athu a gu Izalayele." ³³ Shenji nu ginenji a kalele mu yituga gu ndaga ja kalele mu lezeya munawo. ³⁴ Simeyoni wa a sagumunile nu gu leza ginenji egi :" Mona yogu udi mukunda nu gubwa nu gu zuga gwa athu a vula a gu izalayele enji udi gidimbu mba gi bata tunga tunga. ³⁵ Ata eye gibeni, phogo ya khusa mba idi mu gu tshigisa monyo mukunda ngindu ja mitshima ya vula ji jiyane. ³⁶ Gwa kalele nji nu profeta mu moshi wa mukhetu jina dienji Anna, shenji Fanwele, mu gikanda gia Aser. Wa kalele nu mvula ja vula. Gu nyima ya gu jinga mvula makumi a sambwadi nu mulumienji katuga gilenge gienji; ³⁷ wa begele mufidi enji wa kuyishile mvula makumi gi nana nu a wana, gwa bembele go inzo ya isambu gwa leha enji wa kalele mu samba mu njila ya gu tuna gudia phipha nu mwanya. ³⁸ We jile mu monega hene mu gi tulumwisa, hene a yandigile gu kumisa Nzambi nu gu zwela ndaga ja kalele mu talela mona mwene; gwa wanyi a kalele mu nenga gu guluga gwa Yelusalemi. ³⁹ Tangwa a manesele ndaga jikima ja sonegeye gu mukanda wa shigo wa Fumu, a vutugile gu dimbo diawo gu Nazareti gu Galileya. ⁴⁰ Mona wa kalele mu kula nu ngolo jikima, wa kalele wa zala nu ngangu enji Khenda ja Nzambi ja kalele mu katshi dienji. ⁴¹ Ibuti ya Yesu a kalele muya nu Yelusalemi konso mvula mukunda nu gu ta khinji ya phage. ⁴² Tangwa a lungishile mvula kumi nu jiyadi, a kandugile gu Yelusalemi mu phila ya shigo khinji yawo. ⁴³ Tangwa ilumbu yene ya hwile enji a kalele mu vutuga, Yesu wa begele gu Yelusalemi, uvi ibuti yenji a jiyile go. ⁴⁴ A kalele mu yindula egi udi nu aphangi'awo wanyi ako, hene a kitile gilumbu gi moshi gia gu wenda gu twama dia gu mu kamba mu katshi dia aphangi'awo. ⁴⁵ Mu phila a dile gu mu mona ndo, a vutugile ti nu gu Yelusalemi ha gu mu kamba. ⁴⁶ Hene gu nyima ya ilumbu itatu a mu monele wa hena mu inzo Nzambi, wa di tumbiga mu katshi dia a longi, wa kalele mu hata nu gu a hula mihu. ⁴⁷ Athu akima a kalele mu vwa ndaga a kalele mu zwela a kalele mu yituga ngangu nu mvutu a kalele mu hana. ⁴⁸ Tangwa a mu monele, a yitugile mwa vula enji ginenji wa mu lezele egi : " Munami, mukunda nu ikhi wa kita ndaga ja ngagi? N'eme nu shaye, ta gu kamba mwa vula nu phashi!" ⁴⁹ Wa a lezele egi : " Mukunda nu ikhi mudi mu ngu kamba, mu shi mu jiya go nga feto kita gisalo gia Shami ?" ⁵⁰ Uvi a bagishile go ndaga a kalele mu zwela. ⁵¹ Wa vutugile nawo nu Nazareti, wa kalele mu a lemvugila. Ginenji wa kalele mu bumba ndaga jene jikima gu mutshima wenji. ⁵² Yesu wa kalele mu kula nu ngangu, nu gikesa nu mu khenda gu twama dia Nzambi nu gu meso a athu.